၄. အာနေဉ္ဇသုတ္တဝဏ္ဏနာ

၁၁၇. စတုတ္ထေ တဒဿာဒေတီတိ တံ ဈာနံ အဿာဒေတိ. တံ နိကာမေတီတိ တဒေဝ ပတ္ထေတိ. တေန စ ဝိတ္တိံ အာပဇ္ဇတီတိ တေန ဈာနေန တုဋ္ဌိံ အာပဇ္ဇတိ. တတြ ဌိတောတိ တသ္မိံ ဈာနေ ဌိတော. တဒဓိမုတ္တောတိ တတ္ထေဝ အဓိမုတ္တော. တဗ္ဗဟုလဝိဟာရီတိ တေန ဗဟုလံ ဝိဟရန္တော. သဟဗျတံ ဥပပဇ္ဇတီတိ သဟဘာဝံ ဥပပဇ္ဇတိ၊ တသ္မိံ ဒေဝလောကေ နိဗ္ဗတ္တတီတိ အတ္ထော. နိရယမ္ပိ ဂစ္ဆတီတိအာဒိ နိရယာဒီဟိ အဝိပ္ပမုတ္တတ္တာ အပရပရိယာယဝသေန တတ္ထ ဂမနံ သန္ဓာယ ဝုတ္တံ. န ဟိ တဿ ဥပစာရဇ္ဈာနတော ဗလဝတရံ အကုသလံ အတ္ထိ၊ ယေန အနန္တရံ အပါယေ နိဗ္ဗတ္တေယျ. ဘဂဝတော ပန သာဝကောတိ သောတာပန္နသကဒါဂါမိအနာဂါမီနံ အညတရော. တသ္မိံယေဝ ဘဝေတိ တတ္ထေဝ အရူပဘဝေ. ပရိနိဗ္ဗာယတီတိ အပ္ပစ္စယပရိနိဗ္ဗာနေန ပရိနိဗ္ဗာယတိ. အဓိပ္ပယာသောတိ အဓိကပ္ပယောဂေါ. သေသမေတ္ထ ဝုတ္တနယေနေဝ ဝေဒိတဗ္ဗံ. ဣမသ္မိံ ပန သုတ္တေ ပုထုဇ္ဇနဿ ဥပပတ္တိဇ္ဈာနံ ကထိတံ၊ အရိယသာဝကဿ တဒေဝ ဥပပတ္တိဇ္ဈာနဉ္စ ဝိပဿနာပါဒကဇ္ဈာနဉ္စ ကထိတံ.