၁၀. မောနေယျသုတ္တဝဏ္ဏနာ

၁၂၃. ဒသမေ မောနေယျာနီတိ မုနိဘာဝါ. ကာယမောနေယျန္တိ ကာယဒွါရေ မုနိဘာဝေါ သာဓုဘာဝေါ ပဏ္ဍိတဘာဝေါ. သေသဒွယေပိ ဧသေဝ နယော. ဣဒံ ဝုစ္စတိ၊ ဘိက္ခဝေ၊ ကာယမောနေယျန္တိ ဣဒံ တိဝိဓကာယဒုစ္စရိတပ္ပဟာနံ ကာယမောနေယျံ နာမ. အပိစ တိဝိဓံ ကာယသုစရိတမ္ပိ ကာယမောနေယျံ၊ တထာ ကာယာရမ္မဏံ ဉာဏံ ကာယမောနေယျံ၊ ကာယပရိညာ ကာယမောနေယျံ၊ ပရိညာသဟဂတော မဂ္ဂေါ ကာယမောနေယျံ၊ ကာယေ ဆန္ဒရာဂဿ ပဟာနံ ကာယမောနေယျံ၊ ကာယသင်္ခါရနိရောဓော စတုတ္ထဇ္ဈာနသမာပတ္တိ ကာယမောနေယျံ. ဝစီမောနေယျေပိ ဧသေဝ နယော.

အယံ ပနေတ္ထ ဝိသေသော – ယထာ ဣဓ စတုတ္ထဇ္ဈာနသမာပတ္တိ၊ ဧဝံ တတ္ထ ဝစီသင်္ခါရနိရောဓော ဒုတိယဇ္ဈာနသမာပတ္တိ ဝစီမောနေယျန္တိ ဝေဒိတဗ္ဗာ. မနောမောနေယျမ္ပိ ဣမိနာဝ နယေန အတ္ထံ ဉတွာ စိတ္တသင်္ခါရနိရောဓော သညာဝေဒယိတနိရောဓသမာပတ္တိ မနောမောနေယျန္တိ ဝေဒိတဗ္ဗာ. ကာယမုနိန္တိ ကာယဒွါရေ မုနိံ ဥတ္တမံ ပရိသုဒ္ဓံ၊ ကာယေန ဝါ မုနိံ. သေသဒွယေပိ ဧသေဝ နယော. သဗ္ဗပ္ပဟာယိနန္တိ ခီဏာသဝံ. ခီဏာသဝေါ ဟိ သဗ္ဗပ္ပဟာယီ နာမာတိ.

အာပါယိကဝဂ္ဂေါ ဒုတိယော.