၁၀. ဒုတိယနိဒါနသုတ္တဝဏ္ဏနာ

၁၁၃. ဒသမေ ကမ္မာနန္တိ ဝဋ္ဋဂါမိကမ္မာနမေဝ. ဆန္ဒရာဂဋ္ဌာနိယေတိ ဆန္ဒရာဂဿ ကာရဏဘူတေ. အာရဗ္ဘာတိ အာဂမ္မ သန္ဓာယ ပဋိစ္စ. ဆန္ဒောတိ တဏှာဆန္ဒော. ယော စေတသော သာရာဂေါတိ ယော စိတ္တဿ ရာဂေါ ရဇ္ဇနာ ရဇ္ဇိတတ္တံ၊ ဧတမဟံ သံယောဇနံ ဝဒါမိ၊ ဗန္ဓနံ ဝဒါမီတိ အတ္ထော. သုက္ကပက္ခေ ကမ္မာနန္တိ ဝိဝဋ္ဋဂါမိကမ္မာနံ. တဒဘိနိဝတ္တေတီတိ တံ အဘိနိဝတ္တေတိ. ယဒါ ဝါ တေန ဝိပါကော ဉာတော ဟောတိ ဝိဒိတော၊ တဒါ တေ စေဝ ဓမ္မေ တဉ္စ ဝိပါကံ အဘိနိဝတ္တေတိ. ဣမိနာ စ ပဒေန ဝိပဿနာ ကထိတာ၊ တဒဘိနိဝတ္တေတွာတိ ဣမိနာ မဂ္ဂေါ. စေတသာ အဘိနိဝိဇ္ဈိတွာတိ ဣမိနာ စ မဂ္ဂေါဝ. ပညာယ အတိဝိဇ္ဈ ပဿတီတိ သဟ ဝိပဿနာယ မဂ္ဂပညာယ နိဗ္ဗိဇ္ဈိတွာ ပဿတိ. ဧဝံ သဗ္ဗတ္ထ အတ္ထော ဝေဒိတဗ္ဗော. ဣမသ္မိံ ပန သုတ္တေ ဝဋ္ဋဝိဝဋ္ဋံ ကထိတန္တိ.

သမ္ဗောဓဝဂ္ဂေါ ပဌမော.