၁. ဆန္နသုတ္တဝဏ္ဏနာ

၇၂. တတိယဿ ပဌမေ ဆန္နောတိ ဧဝံနာမကော ဆန္နပရိဗ္ဗာဇကော. တုမှေပိ၊ အာဝုသောတိ၊ အာဝုသော၊ ယထာ မယံ ရာဂါဒီနံ ပဟာနံ ပညာပေမ၊ ကိံ ဧဝံ တုမှေပိ ပညာပေထာတိ ပုစ္ဆတိ. တတော ထေရော ‘‘အယံ ပရိဗ္ဗာဇကော အမှေ ရာဂါဒီနံ ပဟာနံ ပညာပေမာတိ ဝဒတိ၊ နတ္ထိ ပနေတံ ဗာဟိရသမယေ’’တိ တံ ပဋိက္ခိပန္တော မယံ ခေါ၊ အာဝုသောတိအာဒိမာဟ. တတ္ထ ခေါတိ အဝဓာရဏတ္ထေ နိပါတော၊ မယမေဝ ပညာပေမာတိ အတ္ထော. တတော ပရိဗ္ဗာဇကော စိန္တေသိ ‘‘အယံ ထေရော ဗာဟိရသမယံ လုဉ္စိတွာ ဟရန္တော ‘မယမေဝါ’တိ အာဟ. ကိံ နု ခေါ အာဒီနဝံ ဒိသွာ ဧတေ ဧတေသံ ပဟာနံ ပညာပေန္တီ’’တိ. အထ ထေရံ ပုစ္ဆန္တော ကိံ ပန တုမှေတိအာဒိမာဟ. ထေရော တဿ ဗျာကရောန္တော ရတ္တော ခေါတိအာဒိမာဟ. တတ္ထ အတ္တတ္ထန္တိ ဒိဋ္ဌဓမ္မိကသမ္ပရာယိကံ လောကိယလောကုတ္တရံ အတ္တနော အတ္ထံ. ပရတ္ထဥဘယတ္ထေသုပိ ဧသေဝ နယော.

အန္ဓကရဏောတိအာဒီသု ယဿ ရာဂေါ ဥပ္ပဇ္ဇတိ၊ တံ ယထာဘူတဒဿနနိဝါရဏေန အန္ဓံ ကရောတီတိ အန္ဓကရဏော. ပညာစက္ခုံ န ကရောတီတိ အစက္ခုကရဏော. ဉာဏံ န ကရောတီတိ အညာဏကရဏော. ကမ္မဿကတပညာ ဈာနပညာ ဝိပဿနာပညာတိ ဣမာ တိဿော ပညာ အပ္ပဝတ္တိကရဏေန နိရောဓေတီတိ ပညာနိရောဓိကော. အနိဋ္ဌဖလဒါယကတ္တာ ဒုက္ခသင်္ခါတဿ ဝိဃာတဿေဝ ပက္ခေ ဝတ္တတီတိ ဝိဃာတပက္ခိကော. ကိလေသနိဗ္ဗာနံ န သံဝတ္တေတီတိ အနိဗ္ဗာနသံဝတ္တနိကော. အလဉ္စ ပနာဝုသော အာနန္ဒ၊ အပ္ပမာဒါယာတိ၊ အာဝုသော အာနန္ဒ၊ သစေ ဧဝရူပါ ပဋိပဒါ အတ္ထိ၊ အလံ တုမှာကံ အပ္ပမာဒါယ ယုတ္တံ အနုစ္ဆဝိကံ၊ အပ္ပမာဒံ ကရောထ၊ အာဝုသောတိ ထေရဿ ဝစနံ အနုမောဒိတွာ ပက္ကာမိ. ဣမသ္မိံ သုတ္တေ အရိယမဂ္ဂေါ လောကုတ္တရမိဿကော ကထိတော. သေသမေတ္ထ ဥတ္တာနတ္ထမေဝါတိ.