၂. အာဇီဝကသုတ္တဝဏ္ဏနာ

၇၃. ဒုတိယေ တေန ဟိ ဂဟပတီတိ ထေရော ကိရ စိန္တေသိ – ‘‘အယံ ဣဓ အာဂစ္ဆန္တော န အညာတုကာမော ဟုတွာ အာဂမိ၊ ပရိဂ္ဂဏှနတ္ထံ ပန အာဂတော. ဣမိနာ ပုစ္ဆိတပဉှံ ဣမိနာဝ ကထာပေဿာမီ’’တိ. ဣတိ တံယေဝ ကထံ ကထာပေတုကာမော တေန ဟီတိအာဒိမာဟ. တတ္ထ တေန ဟီတိ ကာရဏာပဒေသော. ယသ္မာ တွံ ဧဝံ ပုစ္ဆသိ၊ တသ္မာ တညေဝေတ္ထ ပဋိပုစ္ဆာမီတိ. ကေသံ နောတိ ကတမေသံ နု. သဓမ္မုက္ကံသနာတိ အတ္တနော လဒ္ဓိယာ ဥက္ခိပိတွာ ဌပနာ. ပရဓမ္မာပသာဒနာတိ ပရေသံ လဒ္ဓိယာ ဃဋ္ဋနာ ဝမ္ဘနာ အဝက္ခိပနာ. အာယတနေဝ ဓမ္မဒေသနာတိ ကာရဏသ္မိံယေဝ ဓမ္မဒေသနာ. အတ္ထော စ ဝုတ္တောတိ မယာ ပုစ္ဆိတပဉှာယ အတ္ထော စ ပကာသိတော. အတ္တာ စ အနုပနီတောတိ အမှေ ဧဝရူပါတိ ဧဝံ အတ္တာ စ န ဥပနီတော. နုပနီတောတိပိ ပါဌော.