လကုဏ္ဍကဘဒ္ဒိယတ္ထေရဝတ္ထု

၁၉၄. သတ္တမေ မဉ္ဇုဿရာနန္တိ မဓုရဿရာနံ. လကုဏ္ဍကဘဒ္ဒိယောတိ ဥဗ္ဗေဓေန ရဿော၊ နာမေန ဘဒ္ဒိယော. တဿာပိ ပဉှကမ္မေ အယမနုပုဗ္ဗိကထာ – အယမ္ပိ ဟိ ပဒုမုတ္တရဗုဒ္ဓကာလေ ဟံသဝတီနဂရေ မဟာဘောဂကုလေ နိဗ္ဗတ္တော ဝုတ္တနယေနေဝ ဓမ္မဿဝနတ္ထာယ ဝိဟာရံ ဂတော. တသ္မိံ သမယေ သတ္ထာရံ ဧကံ မဉ္ဇုဿရံ ဘိက္ခုံ ဧတဒဂ္ဂေ ဌပေန္တံ ဒိသွာ ‘‘အဟော ဝတာဟမ္ပိ အနာဂတေ အယံ ဘိက္ခု ဝိယ ဧကဿ ဗုဒ္ဓဿ သာသနေ မဉ္ဇုဿရာနံ ဘိက္ခူနံ အဂ္ဂေါ ဘဝေယျ’’န္တိ စိတ္တံ ဥပ္ပါဒေတွာ သတ္ထာရံ နိမန္တေတွာ သတ္တ ဒိဝသာနိ ဗုဒ္ဓပ္ပမုခဿ ဘိက္ခုသံဃဿ မဟာဒါနံ ဒတွာ၊ ‘‘ဘန္တေ၊ အဟံ ဣမဿ ဒါနဿ ဖလေန န အညံ သမ္ပတ္တိံ အာကင်္ခါမိ၊ အနာဂတေ ပန ဧကဿ ဗုဒ္ဓဿ သာသနေ မဉ္ဇုဿရာနံ ဘိက္ခူနံ အဂ္ဂေါ ဘဝေယျ’’န္တိ ပတ္ထယိတွာ သတ္ထုပါဒမူလေ နိပဇ္ဇိ. သတ္ထာ အနာဂတံ ဩလောကေန္တော သမိဇ္ဈနဘာဝံ ဒိသွာ ‘‘သမိဇ္ဈိဿတိ တေ ဣဒံ ကမ္မံ၊ ဣတော ကပ္ပသတသဟဿာဝသာနေ ဂေါတမော နာမ ဗုဒ္ဓေါ ဥပ္ပဇ္ဇိဿတိ၊ တွံ တဿ သာသနေ မဉ္ဇုဿရာနံ ဘိက္ခူနံ အဂ္ဂေါ ဘဝိဿသီ’’တိ ဗျာကရိတွာ ဝိဟာရံ အဂမာသိ.

သောပိ တံ ဗျာကရဏံ လဘိတွာ ယာဝဇီဝံ ကလျာဏကမ္မံ ကတွာ တတော ကာလကတော ဒေဝေသု စ မနုဿေသု စ သံသရန္တော ဝိပဿီသမ္မာသမ္ဗုဒ္ဓကာလေ စိတ္တပတ္တကောကိလော နာမ ဟုတွာ ခေမေ မိဂဒါယေ ဝသန္တော ဧကဒိဝသံ ဟိမဝန္တံ ဂန္တွာ မဓုရံ အမ္ဗဖလံ တုဏ္ဍေန ဂဟေတွာ အာဂစ္ဆန္တော ဘိက္ခုသံဃပရိဝုတံ သတ္ထာရံ ဒိသွာ စိန္တေသိ – ‘‘အဟံ အညေသု ဒိဝသေသု ရိတ္တကော တထာဂတံ ပဿာမိ၊ အဇ္ဇ ပန မေ ဣမံ အမ္ဗပက္ကံ ပုတ္တကာနံ အတ္ထာယ အာဂတံ. တေသံ အညမ္ပိ အာဟရိတွာ ဒဿာမိ၊ ဣမံ ပန ဒသဗလဿ ဒါတုံ ဝဋ္ဋတီ’’တိ ဩတရိတွာ အာကာသေ စရတိ. သတ္ထာ တဿ စိတ္တံ ဉတွာ အသောကတ္ထေရံ နာမ ဥပဋ္ဌာကံ ဩလောကေသိ. သော ပတ္တံ နီဟရိတွာ သတ္ထု ဟတ္ထေ ဌပေသိ. သော ကောကိလော ဒသဗလဿ ပတ္တေ အမ္ဗပက္ကံ ပတိဋ္ဌာပေသိ. သတ္ထာ တတ္ထေဝ နိသီဒိတွာ တံ ပရိဘုဉ္ဇိ. ကောကိလော ပသန္နစိတ္တော ပုနပ္ပုနံ ဒသဗလဿ ဂုဏေ အာဝဇ္ဇေတွာ ဒသဗလံ ဝန္ဒိတွာ အတ္တနော ကုလာဝကံ ဂန္တွာ သတ္တာဟံ ပီတိသုခေန ဝီတိနာမေသိ. ဧတ္တကံ တသ္မိံ အတ္တဘာဝေ ကလျာဏကမ္မံ၊ ဣမိနာဿ ကမ္မေန သရော မဓုရော အဟောသိ.

ကဿပသမ္မာသမ္ဗုဒ္ဓကာလေ ပန စေတိယေ အာရဒ္ဓေ ‘‘ကိံပမာဏံ ကရောမ? သတ္တယောဇနပ္ပမာဏံ. အတိမဟန္တံ ဧတံ၊ ဆယောဇနံ ကရောမ. ဣဒမ္ပိ အတိမဟန္တံ၊ ပဉ္စယောဇနံ ကရောမ၊ စတုယောဇနံ၊ တိယောဇနံ၊ ဒွိယောဇန’’န္တိ ဝုတ္တေ အယံ တဒါ ဇေဋ္ဌဝဍ္ဎကီ ဟုတွာ ‘‘ဧထ၊ ဘော၊ အနာဂတေ သုခပဋိဇဂ္ဂိယံ ကာတုံ ဝဋ္ဋတီ’’တိ ဝတွာ ရဇ္ဇုံ အာဒါယ ပရိက္ခိပန္တော ဂါဝုတမတ္တကေ ဌတွာ ‘‘ဧကေကံ မုခံ ဂါဝုတံ ဂါဝုတံ ဟောတု၊ စေတိယံ ယောဇနာဝဋ္ဋံ ယောဇနုဗ္ဗေဓံ ဘဝိဿတီ’’တိ အာဟ. တေ တဿ ဝစနေ အဋ္ဌံသု. ဣတိ အပ္ပမာဏဿ ဗုဒ္ဓဿ ပမာဏံ အကာသီတိ. တေန ကမ္မေန နိဗ္ဗတ္တနိဗ္ဗတ္တဋ္ဌာနေ အညေဟိ ဟီနတရပ္ပမာဏော အဟောသိ. သော အမှာကံ သတ္ထု ကာလေ သာဝတ္ထိယံ မဟာဘောဂကုလေ နိဗ္ဗတ္တိ. ‘‘ဘဒ္ဒိယော’’တိဿ နာမံ အကံသု. သော ဝယပ္ပတ္တော သတ္ထရိ ဇေတဝနမဟာဝိဟာရေ ပဋိဝသန္တေ ဝိဟာရံ ဂန္တွာ ဓမ္မဒေသနံ သုတွာ ပဋိလဒ္ဓသဒ္ဓေါ ပဗ္ဗဇိတွာ သတ္ထု သန္တိကေ ကမ္မဋ္ဌာနံ ဂဟေတွာ ဝိပဿနာယ ကမ္မံ ကရောန္တော အရဟတ္တံ ပါပုဏိ. အထ နံ သတ္ထာ အပရဘာဂေ အရိယဝရဂဏမဇ္ဈေ နိသိန္နော မဉ္ဇုဿရာနံ ဘိက္ခူနံ အဂ္ဂဋ္ဌာနေ ဌပေသိ.