ဘဒ္ဒိယတ္ထေရဝတ္ထု

၁၉၃. ဆဋ္ဌေ ဥစ္စာကုလိကာနန္တိ ဥစ္စေ ကုလေ ဇာတာနံ. ဘဒ္ဒိယောတိ အနုရုဒ္ဓတ္ထေရေန သဒ္ဓိံ နိက္ခမန္တော သကျရာဇာ. ကာဠိဂေါဓာယ ပုတ္တောတိ ကာဠဝဏ္ဏာ သာ ဒေဝီ၊ ဂေါဓာတိ ပနဿာ နာမံ. တသ္မာ ကာဠိဂေါဓာတိ ဝုစ္စတိ၊ တဿာ ပုတ္တောတိ အတ္ထော. ကသ္မာ ပနာယံ ဥစ္စာကုလိကာနံ အဂ္ဂေါတိ ဝုတ္တော၊ ကိံ တတော ဥစ္စာကုလိကတရာ နတ္ထီတိ? အာမ နတ္ထိ. တဿ ဟိ မာတာ သာကိယာနီနံ အန္တရေ ဝယေန သဗ္ဗဇေဋ္ဌိကာ၊ သောယေဝ စ သာကိယကုလေ သမ္ပတ္တံ ရဇ္ဇံ ပဟာယ ပဗ္ဗဇိတော. တသ္မာ ဥစ္စာကုလိကာနံ အဂ္ဂေါတိ ဝုတ္တော. အပိစ ပုဗ္ဗပတ္ထနာနုဘာဝေန စေသ အနုပဋိပါဋိယာ ပဉ္စ ဇာတိသတာနိ ရာဇကုလေ နိဗ္ဗတ္တိတွာ ရဇ္ဇံ ကာရေသိယေဝ. ဣမိနာပိ ကာရဏေန ဥစ္စာကုလိကာနံ အဂ္ဂေါတိ ဝုတ္တော.

ပဉှကမ္မေ ပနဿ အယမနုပုဗ္ဗိကထာ – အယမ္ပိ ဟိ အတီတေ ပဒုမုတ္တရဗုဒ္ဓကာလေ မဟာဘောဂကုလေ နိဗ္ဗတ္တော ဝုတ္တနယေနေဝ ဓမ္မဿဝနတ္ထာယ ဂတော. တံဒိဝသံ သတ္ထာရံ ဧကံ ဘိက္ခုံ ဥစ္စာကုလိကာနံ ဘိက္ခူနံ အဂ္ဂဋ္ဌာနေ ဌပေန္တံ ဒိသွာ ‘‘မယာပိ အနာဂတေ ဧကဿ ဗုဒ္ဓဿ သာသနေ ဥစ္စာကုလိကာနံ ဘိက္ခူနံ အဂ္ဂေန ဘဝိတုံ ဝဋ္ဋတီ’’တိ တထာဂတံ နိမန္တေတွာ သတ္တ ဒိဝသာနိ ဗုဒ္ဓပ္ပမုခဿ ဘိက္ခုသံဃဿ မဟာဒါနံ ဒတွာ၊ ‘‘ဘန္တေ၊ အဟံ ဣမဿ ဒါနဿ ဖလေန နာညံ သမ္ပတ္တိံ အာကင်္ခါမိ၊ အနာဂတေ ပန ဧကဿ ဗုဒ္ဓဿ သာသနေ ဥစ္စာကုလိကာနံ ဘိက္ခူနံ အဂ္ဂေါ ဘဝေယျ’’န္တိ ပတ္ထယိတွာ ပါဒမူလေ နိပဇ္ဇိ.

သတ္ထာ အနာဂတံ ဩလောကေန္တော သမိဇ္ဈနဘာဝံ ဒိသွာ ‘‘သမိဇ္ဈိဿတိ တေ ဣဒံ ကမ္မံ၊ ဣတော ကပ္ပသတသဟဿာဝသာနေ ဂေါတမော နာမ ဗုဒ္ဓေါ ဥပ္ပဇ္ဇိဿတိ၊ တွံ တဿ သာသနေ ဥစ္စာကုလိကာနံ ဘိက္ခူနံ အဂ္ဂေါ ဘဝိဿသီ’’တိ ဗျာကရိတွာ ဘတ္တာနုမောဒနံ ကတွာ ဝိဟာရံ အဂမာသိ. သောပိ တံ ဗျာကရဏံ လဘိတွာ ဥစ္စာကုလိကသံဝတ္တနိကကမ္မံ ပုစ္ဆိတွာ ဓမ္မာသနာနိ ကာရေတွာ တေသု ပစ္စတ္ထရဏာနိ သန္ထရာပေတွာ ဓမ္မဗီဇနိယော ဓမ္မကထိကဝဋ္ဋံ ဥပေါသထာဂါရေ ပဒီပတေလဒါနန္တိ ဧဝံ ယာဝဇီဝံ ဗဟုဝိဓံ ကလျာဏကမ္မံ ကတွာ တတ္ထ ကာလကတော ဒေဝေသု စ မနုဿေသု စ သံသရန္တော ကဿပဒသဗလဿ စ အမှာကဉ္စ ဘဂဝတော အန္တရေ ဗာရာဏသိယံ ကုဋုမ္ဗိယဃရေ နိဗ္ဗတ္တော.

တေန စ သမယေန သမ္ဗဟုလာ ပစ္စေကဗုဒ္ဓါ ဂန္ဓမာဒနပဗ္ဗတာ အာဂမ္မ ဗာရာဏသိယံ ဂင်္ဂါယ တီရေ ဖာသုကဋ္ဌာနေ နိသီဒိတွာ ပိဏ္ဍပါတံ ပရိဘုဉ္ဇန္တိ. သော ကုဋုမ္ဗိယော တေသံ နိဗဒ္ဓမေဝ တသ္မိံ ဌာနေ ဘတ္တဝိဿဂ္ဂကရဏံ ဉတွာ အဋ္ဌ ပါသာဏဖလကာနိ အတ္ထရိတွာ ယာဝဇီဝံ ပစ္စေကဗုဒ္ဓေ ဥပဋ္ဌဟိ. အထေကံ ဗုဒ္ဓန္တရံ ဒေဝမနုဿေသု သံသရိတွာ ဣမသ္မိံ ဗုဒ္ဓုပ္ပါဒေ ကပိလဝတ္ထုနဂရေ ခတ္တိယကုလေ နိဗ္ဗတ္တိ. နာမဂ္ဂဟဏဒိဝသေ စဿ ဘဒ္ဒိယကုမာရောတိ နာမံ အကံသု. သော ဝယံ အာဂမ္မ ဟေဋ္ဌာ အနုရုဒ္ဓသုတ္တေ ဝုတ္တနယေနေဝ ဆန္နံ ခတ္တိယာနံ အဗ္ဘန္တရော ဟုတွာ သတ္ထရိ အနုပိယအမ္ဗဝနေ ဝိဟရန္တေ သတ္ထု သန္တိကေ ပဗ္ဗဇိတွာ အရဟတ္တံ ပါပုဏိ. အထ သတ္ထာ အပရဘာဂေ ဇေတဝနမဟာဝိဟာရေ ဝိဟရန္တော ‘‘မမ သာသနေ ဥစ္စာကုလိကာနံ ကာဠိဂေါဓာယ ပုတ္တော ဘဒ္ဒိယတ္ထေရော အဂ္ဂေါ’’တိ အဂ္ဂဋ္ဌာနေ ဌပေသိ.