(၉) နိရုဇ္ဈမာနုပ္ပန္နဝါရော

၇၇. (က) ယဿ စိတ္တံ နိရုဇ္ဈမာနံ တဿ စိတ္တံ ဥပ္ပန္နန္တိ? အာမန္တာ.

(ခ) ယဿ ဝါ ပန စိတ္တံ ဥပ္ပန္နံ တဿ စိတ္တံ နိရုဇ္ဈမာနန္တိ?

စိတ္တဿ ဥပ္ပါဒက္ခဏေ တေသံ စိတ္တံ ဥပ္ပန္နံ၊ နော စ တေသံ စိတ္တံ နိရုဇ္ဈမာနံ. စိတ္တဿ ဘင်္ဂက္ခဏေ တေသံ စိတ္တံ ဥပ္ပန္နဉ္စေဝ နိရုဇ္ဈမာနဉ္စ.

(က) ယဿ စိတ္တံ န နိရုဇ္ဈမာနံ တဿ စိတ္တံ န ဥပ္ပန္နန္တိ?

စိတ္တဿ ဥပ္ပါဒက္ခဏေ တေသံ စိတ္တံ န နိရုဇ္ဈမာနံ၊ နော စ တေသံ စိတ္တံ န ဥပ္ပန္နံ. နိရောဓသမာပန္နာနံ အသညသတ္တာနံ တေသံ စိတ္တံ န စေဝ နိရုဇ္ဈမာနံ န စ ဥပ္ပန္နံ.

(ခ) ယဿ ဝါ ပန စိတ္တံ န ဥပ္ပန္နံ တဿ စိတ္တံ န နိရုဇ္ဈမာနန္တိ? အာမန္တာ.