(၁၀) ဥပ္ပန္နုပ္ပါဒဝါရော

၇၈. (က) ယဿ စိတ္တံ ဥပ္ပန္နံ တဿ စိတ္တံ ဥပ္ပဇ္ဇိတ္ထာတိ? အာမန္တာ.

(ခ) ယဿ ဝါ ပန စိတ္တံ ဥပ္ပဇ္ဇိတ္ထ တဿ စိတ္တံ ဥပ္ပန္နန္တိ?

နိရောဓသမာပန္နာနံ အသညသတ္တာနံ တေသံ စိတ္တံ ဥပ္ပဇ္ဇိတ္ထ၊ နော စ တေသံ စိတ္တံ ဥပ္ပန္နံ. စိတ္တသမင်္ဂီနံ တေသံ စိတ္တံ ဥပ္ပဇ္ဇိတ္ထ စေဝ ဥပ္ပန္နဉ္စ.

(က) ယဿ စိတ္တံ န ဥပ္ပန္နံ တဿ စိတ္တံ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.

(ခ) ယဿ ဝါ ပန စိတ္တံ န ဥပ္ပဇ္ဇိတ္ထ တဿ စိတ္တံ န ဥပ္ပန္နန္တိ? နတ္ထိ.

၇၉. (က) ယဿ စိတ္တံ ဥပ္ပန္နံ တဿ စိတ္တံ ဥပ္ပဇ္ဇိဿတီတိ?

ပစ္ဆိမစိတ္တသမင်္ဂီနံ တေသံ စိတ္တံ ဥပ္ပန္နံ၊ နော စ တေသံ စိတ္တံ ဥပ္ပဇ္ဇိဿတိ. ဣတရေသံ စိတ္တသမင်္ဂီနံ တေသံ စိတ္တံ ဥပ္ပန္နဉ္စေဝ ဥပ္ပဇ္ဇိဿတိ စ.

(ခ) ယဿ ဝါ ပန စိတ္တံ ဥပ္ပဇ္ဇိဿတိ တဿ စိတ္တံ ဥပ္ပန္နန္တိ?

နိရောဓသမာပန္နာနံ အသညသတ္တာနံ တေသံ စိတ္တံ ဥပ္ပဇ္ဇိဿတိ၊ နော စ တေသံ စိတ္တံ ဥပ္ပန္နံ. စိတ္တသမင်္ဂီနံ တေသံ စိတ္တံ ဥပ္ပဇ္ဇိဿတိ စေဝ ဥပ္ပန္နဉ္စ.

(က) ယဿ စိတ္တံ န ဥပ္ပန္နံ တဿ စိတ္တံ န ဥပ္ပဇ္ဇိဿတီတိ? ဥပ္ပဇ္ဇိဿတိ.

(ခ) ယဿ ဝါ ပန စိတ္တံ န ဥပ္ပဇ္ဇိဿတိ တဿ စိတ္တံ န ဥပ္ပန္နန္တိ? ဥပ္ပန္နံ.