(၆) ဥပ္ပါဒနိရောဓဝါရော

၇၂. (က) ယဿ စိတ္တံ ဥပ္ပဇ္ဇတိ တဿ စိတ္တံ နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန စိတ္တံ နိရုဇ္ဈိတ္ထ တဿ စိတ္တံ ဥပ္ပဇ္ဇတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ နိရုဇ္ဈိတ္ထ၊ နော စ တေသံ စိတ္တံ ဥပ္ပဇ္ဇတိ. စိတ္တဿ ဥပ္ပါဒက္ခဏေ တေသံ စိတ္တံ နိရုဇ္ဈိတ္ထ စေဝ ဥပ္ပဇ္ဇတိ စ.

(က) ယဿ စိတ္တံ န ဥပ္ပဇ္ဇတိ တဿ စိတ္တံ န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန စိတ္တံ န နိရုဇ္ဈိတ္ထ တဿ စိတ္တံ န ဥပ္ပဇ္ဇတီတိ? နတ္ထိ.

၇၃. (က) ယဿ စိတ္တံ ဥပ္ပဇ္ဇတိ တဿ စိတ္တံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တံ နိရုဇ္ဈိဿတိ တဿ စိတ္တံ ဥပ္ပဇ္ဇတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ နိရုဇ္ဈိဿတိ၊ နော စ တေသံ စိတ္တံ ဥပ္ပဇ္ဇတိ. စိတ္တဿ ဥပ္ပါဒက္ခဏေ တေသံ စိတ္တံ နိရုဇ္ဈိဿတိ စေဝ ဥပ္ပဇ္ဇတိ စ.

(က) ယဿ စိတ္တံ န ဥပ္ပဇ္ဇတိ တဿ စိတ္တံ န နိရုဇ္ဈိဿတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ န ဥပ္ပဇ္ဇတိ၊ နော စ တေသံ စိတ္တံ န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ စိတ္တံ န စေဝ ဥပ္ပဇ္ဇတိ န စ နိရုဇ္ဈိဿတိ.

(ခ) ယဿ ဝါ ပန စိတ္တံ န နိရုဇ္ဈိဿတိ တဿ စိတ္တံ န ဥပ္ပဇ္ဇတီတိ? အာမန္တာ.

၇၄. (က) ယဿ စိတ္တံ ဥပ္ပဇ္ဇိတ္ထ တဿ စိတ္တံ နိရုဇ္ဈိဿတီတိ?

ပစ္ဆိမစိတ္တဿ ဘင်္ဂက္ခဏေ တေသံ စိတ္တံ ဥပ္ပဇ္ဇိတ္ထ၊ နော စ တေသံ စိတ္တံ နိရုဇ္ဈိဿတိ. ဣတရေသံ တေသံ စိတ္တံ ဥပ္ပဇ္ဇိတ္ထ စေဝ နိရုဇ္ဈိဿတိ စ.

(ခ) ယဿ ဝါ ပန စိတ္တံ နိရုဇ္ဈိဿတိ တဿ စိတ္တံ ဥပ္ပဇ္ဇိတ္ထာတိ? အာမန္တာ.

(က) ယဿ စိတ္တံ န ဥပ္ပဇ္ဇိတ္ထ တဿ စိတ္တံ န နိရုဇ္ဈိဿတီတိ? နတ္ထိ.

(ခ) ယဿ ဝါ ပန စိတ္တံ န နိရုဇ္ဈိဿတိ တဿ စိတ္တံ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.