(၂) ဥပ္ပါဒုပ္ပန္နဝါရော

၆၄. (က) ယဿ စိတ္တံ ဥပ္ပဇ္ဇတိ တဿ စိတ္တံ ဥပ္ပန္နန္တိ? အာမန္တာ.

(ခ) ယဿ ဝါ ပန စိတ္တံ ဥပ္ပန္နံ တဿ စိတ္တံ ဥပ္ပဇ္ဇတီတိ?

စိတ္တဿ ဘင်္ဂက္ခဏေ တေသံ စိတ္တံ ဥပ္ပန္နံ၊ နော စ တေသံ စိတ္တံ ဥပ္ပဇ္ဇတိ. စိတ္တဿ ဥပ္ပါဒက္ခဏေ တေသံ စိတ္တံ ဥပ္ပန္နဉ္စေဝ ဥပ္ပဇ္ဇတိ စ.

(က) ယဿ စိတ္တံ န ဥပ္ပဇ္ဇတိ တဿ စိတ္တံ န ဥပ္ပန္နန္တိ?

စိတ္တဿ ဘင်္ဂက္ခဏေ တေသံ စိတ္တံ န ဥပ္ပဇ္ဇတိ၊ နော စ တေသံ စိတ္တံ န ဥပ္ပန္နံ. နိရောဓသမာပန္နာနံ အသညသတ္တာနံ တေသံ စိတ္တံ န စေဝ ဥပ္ပဇ္ဇတိ န စ ဥပ္ပန္နံ.

(ခ) ယဿ ဝါ ပန စိတ္တံ န ဥပ္ပန္နံ တဿ စိတ္တံ န ဥပ္ပဇ္ဇတီတိ? အာမန္တာ.