(၈) ဥပ္ပဇ္ဇမာနုပ္ပန္နဝါရော
၉၇. (က) ယံ စိတ္တံ ဥပ္ပဇ္ဇမာနံ တံ စိတ္တံ ဥပ္ပန္နန္တိ? အာမန္တာ.
(ခ) ယံ ဝါ ပန စိတ္တံ ဥပ္ပန္နံ တံ စိတ္တံ ဥပ္ပဇ္ဇမာနန္တိ?
ဘင်္ဂက္ခဏေ စိတ္တံ ဥပ္ပန္နံ၊ နော စ တံ စိတ္တံ ဥပ္ပဇ္ဇမာနံ. ဥပ္ပါဒက္ခဏေ စိတ္တံ ဥပ္ပန္နဉ္စေဝ ဥပ္ပဇ္ဇမာနဉ္စ.
(က) ယံ စိတ္တံ န ဥပ္ပဇ္ဇမာနံ တံ စိတ္တံ န ဥပ္ပန္နန္တိ?
ဘင်္ဂက္ခဏေ စိတ္တံ န ဥပ္ပဇ္ဇမာနံ၊ နော စ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ ဥပ္ပဇ္ဇမာနံ န စ ဥပ္ပန္နံ.
(ခ) ယံ ဝါ ပန စိတ္တံ န ဥပ္ပန္နံ တံ စိတ္တံ န ဥပ္ပဇ္ဇမာနန္တိ? အာမန္တာ.