(၇) ဥပ္ပဇ္ဇမာန-နနိရောဓဝါရော

၉၆. (က) ယံ စိတ္တံ ဥပ္ပဇ္ဇတိ တံ စိတ္တံ န နိရုဇ္ဈတီတိ? အာမန္တာ.

(ခ) ယံ ဝါ ပန စိတ္တံ န နိရုဇ္ဈတိ တံ စိတ္တံ ဥပ္ပဇ္ဇတီတိ?

အတီတာနာဂတံ စိတ္တံ န နိရုဇ္ဈတိ၊ နော စ တံ စိတ္တံ ဥပ္ပဇ္ဇတိ. ဥပ္ပါဒက္ခဏေ စိတ္တံ န နိရုဇ္ဈတိ စေဝ ဥပ္ပဇ္ဇတိ စ.

(က) ယံ စိတ္တံ န ဥပ္ပဇ္ဇတိ တံ စိတ္တံ နိရုဇ္ဈတီတိ?

အတီတာနာဂတံ စိတ္တံ န ဥပ္ပဇ္ဇတိ၊ နော စ တံ စိတ္တံ နိရုဇ္ဈတိ. ဘင်္ဂက္ခဏေ စိတ္တံ န ဥပ္ပဇ္ဇတိ စေဝ နိရုဇ္ဈတိ စ.

(ခ) ယံ ဝါ ပန စိတ္တံ နိရုဇ္ဈတိ တံ စိတ္တံ န ဥပ္ပဇ္ဇတီတိ? အာမန္တာ.