(၆) ဥပ္ပါဒနိရောဓဝါရော

၉၃. (က) ယံ စိတ္တံ ဥပ္ပဇ္ဇတိ တံ စိတ္တံ နိရုဇ္ဈိတ္ထာတိ? နော.

(ခ) ယံ ဝါ ပန စိတ္တံ နိရုဇ္ဈိတ္ထ တံ စိတ္တံ ဥပ္ပဇ္ဇတီတိ? နော.

(က) ယံ စိတ္တံ န ဥပ္ပဇ္ဇတိ တံ စိတ္တံ န နိရုဇ္ဈိတ္ထာတိ?

အတီတံ စိတ္တံ န ဥပ္ပဇ္ဇတိ၊ နော စ တံ စိတ္တံ န နိရုဇ္ဈိတ္ထ. ဘင်္ဂက္ခဏေ အနာဂတဉ္စ စိတ္တံ န စေဝ ဥပ္ပဇ္ဇတိ န စ နိရုဇ္ဈိတ္ထ.

(ခ) ယံ ဝါ ပန စိတ္တံ န နိရုဇ္ဈိတ္ထ တံ စိတ္တံ န ဥပ္ပဇ္ဇတီတိ?

ဥပ္ပါဒက္ခဏေ စိတ္တံ န နိရုဇ္ဈိတ္ထ၊ နော စ တံ စိတ္တံ န ဥပ္ပဇ္ဇတိ. ဘင်္ဂက္ခဏေ အနာဂတဉ္စ စိတ္တံ န စေဝ နိရုဇ္ဈိတ္ထ န စ ဥပ္ပဇ္ဇတိ.

၉၄. (က) ယံ စိတ္တံ ဥပ္ပဇ္ဇတိ တံ စိတ္တံ နိရုဇ္ဈိဿတီတိ? အာမန္တာ.

(ခ) ယံ ဝါ ပန စိတ္တံ နိရုဇ္ဈိဿတိ တံ စိတ္တံ ဥပ္ပဇ္ဇတီတိ?

အနာဂတံ စိတ္တံ နိရုဇ္ဈိဿတိ၊ နော စ တံ စိတ္တံ ဥပ္ပဇ္ဇတိ. ဥပ္ပါဒက္ခဏေ စိတ္တံ နိရုဇ္ဈိဿတိ စေဝ ဥပ္ပဇ္ဇတိ စ.

(က) ယံ စိတ္တံ န ဥပ္ပဇ္ဇတိ တံ စိတ္တံ န နိရုဇ္ဈိဿတီတိ?

အနာဂတံ စိတ္တံ န ဥပ္ပဇ္ဇတိ၊ နော စ တံ စိတ္တံ န နိရုဇ္ဈိဿတိ. ဘင်္ဂက္ခဏေ အတီတဉ္စ စိတ္တံ န စေဝ ဥပ္ပဇ္ဇတိ န စ နိရုဇ္ဈိဿတိ.

(ခ) ယံ ဝါ ပန စိတ္တံ န နိရုဇ္ဈိဿတိ တံ စိတ္တံ န ဥပ္ပဇ္ဇတီတိ? အာမန္တာ.

၉၅. (က) ယံ စိတ္တံ ဥပ္ပဇ္ဇိတ္ထ တံ စိတ္တံ နိရုဇ္ဈိဿတီတိ? နော.

(ခ) ယံ ဝါ ပန စိတ္တံ နိရုဇ္ဈိဿတိ တံ စိတ္တံ ဥပ္ပဇ္ဇိတ္ထာတိ? နော.

(က) ယံ စိတ္တံ န ဥပ္ပဇ္ဇိတ္ထ တံ စိတ္တံ န နိရုဇ္ဈိဿတီတိ?

ဥပ္ပါဒက္ခဏေ အနာဂတဉ္စ စိတ္တံ န ဥပ္ပဇ္ဇိတ္ထ၊ နော စ တံ စိတ္တံ န နိရုဇ္ဈိဿတိ. ဘင်္ဂက္ခဏေ စိတ္တံ န စေဝ ဥပ္ပဇ္ဇိတ္ထ န စ နိရုဇ္ဈိဿတိ.

(ခ) ယံ ဝါ ပန စိတ္တံ န နိရုဇ္ဈိဿတိ တံ စိတ္တံ န ဥပ္ပဇ္ဇိတ္ထာတိ?

အတီတံ စိတ္တံ န နိရုဇ္ဈိဿတိ၊ နော စ တံ စိတ္တံ န ဥပ္ပဇ္ဇိတ္ထ. ဘင်္ဂက္ခဏေ စိတ္တံ န စေဝ နိရုဇ္ဈိဿတိ န စ ဥပ္ပဇ္ဇိတ္ထ.