(၃) နိရောဓုပ္ပန္နဝါရော

၈၆. (က) ယံ စိတ္တံ နိရုဇ္ဈတိ တံ စိတ္တံ ဥပ္ပန္နန္တိ? အာမန္တာ.

(ခ) ယံ ဝါ ပန စိတ္တံ ဥပ္ပန္နံ တံ စိတ္တံ နိရုဇ္ဈတီတိ?

ဥပ္ပါဒက္ခဏေ စိတ္တံ ဥပ္ပန္နံ၊ နော စ တံ စိတ္တံ နိရုဇ္ဈတိ. ဘင်္ဂက္ခဏေ စိတ္တံ ဥပ္ပန္နဉ္စေဝ နိရုဇ္ဈတိ စ.

(က) ယံ စိတ္တံ န နိရုဇ္ဈတိ တံ စိတ္တံ န ဥပ္ပန္နန္တိ?

ဥပ္ပါဒက္ခဏေ စိတ္တံ န နိရုဇ္ဈတိ၊ နော စ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ နိရုဇ္ဈတိ န စ ဥပ္ပန္နံ.

(ခ) ယံ ဝါ ပန စိတ္တံ န ဥပ္ပန္နံ တံ စိတ္တံ န နိရုဇ္ဈတီတိ? အာမန္တာ.