(၄) ဥပ္ပါဒဝါရော

၈၇. (က) ယံ စိတ္တံ ဥပ္ပဇ္ဇတိ တံ စိတ္တံ ဥပ္ပဇ္ဇိတ္ထာတိ? နော.

(ခ) ယံ ဝါ ပန စိတ္တံ ဥပ္ပဇ္ဇိတ္ထ တံ စိတ္တံ ဥပ္ပဇ္ဇတီတိ? နော.

(က) ယံ စိတ္တံ န ဥပ္ပဇ္ဇတိ တံ စိတ္တံ န ဥပ္ပဇ္ဇိတ္ထာတိ?

အတီတံ စိတ္တံ န ဥပ္ပဇ္ဇတိ၊ နော စ တံ စိတ္တံ န ဥပ္ပဇ္ဇိတ္ထ. ဘင်္ဂက္ခဏေ အနာဂတဉ္စ စိတ္တံ န စေဝ ဥပ္ပဇ္ဇတိ န စ ဥပ္ပဇ္ဇိတ္ထ.

(ခ) ယံ ဝါ ပန စိတ္တံ န ဥပ္ပဇ္ဇိတ္ထ တံ စိတ္တံ န ဥပ္ပဇ္ဇတီတိ?

ဥပ္ပါဒက္ခဏေ စိတ္တံ န ဥပ္ပဇ္ဇိတ္ထ၊ နော စ တံ စိတ္တံ န ဥပ္ပဇ္ဇတိ. ဘင်္ဂက္ခဏေ အနာဂတဉ္စ စိတ္တံ န စေဝ ဥပ္ပဇ္ဇိတ္ထ န စ ဥပ္ပဇ္ဇတိ.

၈၈. (က) ယံ စိတ္တံ ဥပ္ပဇ္ဇတိ တံ စိတ္တံ ဥပ္ပဇ္ဇိဿတီတိ? နော.

(ခ) ယံ ဝါ ပန စိတ္တံ ဥပ္ပဇ္ဇိဿတိ တံ စိတ္တံ ဥပ္ပဇ္ဇတီတိ? နော.

(က) ယံ စိတ္တံ န ဥပ္ပဇ္ဇတိ တံ စိတ္တံ န ဥပ္ပဇ္ဇိဿတီတိ?

အနာဂတံ စိတ္တံ န ဥပ္ပဇ္ဇတိ၊ နော စ တံ စိတ္တံ န ဥပ္ပဇ္ဇိဿတိ. ဘင်္ဂက္ခဏေ အတီတဉ္စ စိတ္တံ န စေဝ ဥပ္ပဇ္ဇတိ န စ ဥပ္ပဇ္ဇိဿတိ.

(ခ) ယံ ဝါ ပန စိတ္တံ န ဥပ္ပဇ္ဇိဿတိ တံ စိတ္တံ န ဥပ္ပဇ္ဇတီတိ?

ဥပ္ပါဒက္ခဏေ စိတ္တံ န ဥပ္ပဇ္ဇိဿတိ၊ နော စ တံ စိတ္တံ န ဥပ္ပဇ္ဇတိ. ဘင်္ဂက္ခဏေ အတီတဉ္စ စိတ္တံ န စေဝ ဥပ္ပဇ္ဇိဿတိ န စ ဥပ္ပဇ္ဇတိ.

၈၉. (က) ယံ စိတ္တံ ဥပ္ပဇ္ဇိတ္ထ တံ စိတ္တံ ဥပ္ပဇ္ဇိဿတီတိ? နော.

(ခ) ယံ ဝါ ပန စိတ္တံ ဥပ္ပဇ္ဇိဿတိ တံ စိတ္တံ ဥပ္ပဇ္ဇိတ္ထာတိ? နော.

(က) ယံ စိတ္တံ န ဥပ္ပဇ္ဇိတ္ထ တံ စိတ္တံ န ဥပ္ပဇ္ဇိဿတီတိ?

အနာဂတံ စိတ္တံ န ဥပ္ပဇ္ဇိတ္ထ၊ နော စ တံ စိတ္တံ န ဥပ္ပဇ္ဇိဿတိ. ပစ္စုပ္ပန္နံ စိတ္တံ န စေဝ ဥပ္ပဇ္ဇိတ္ထ န စ ဥပ္ပဇ္ဇိဿတိ.

(ခ) ယံ ဝါ ပန စိတ္တံ န ဥပ္ပဇ္ဇိဿတိ တံ စိတ္တံ န ဥပ္ပဇ္ဇိတ္ထာတိ?

အတီတံ စိတ္တံ န ဥပ္ပဇ္ဇိဿတိ၊ နော စ တံ စိတ္တံ န ဥပ္ပဇ္ဇိတ္ထ. ပစ္စုပ္ပန္နံ စိတ္တံ န စေဝ ဥပ္ပဇ္ဇိဿတိ န စ ဥပ္ပဇ္ဇိတ္ထ.