(၂) ဥပ္ပါဒုပ္ပန္နဝါရော

၈၅. (က) ယံ စိတ္တံ ဥပ္ပဇ္ဇတိ တံ စိတ္တံ ဥပ္ပန္နန္တိ? အာမန္တာ.

(ခ) ယံ ဝါ ပန စိတ္တံ ဥပ္ပန္နံ တံ စိတ္တံ ဥပ္ပဇ္ဇတီတိ?

ဘင်္ဂက္ခဏေ စိတ္တံ ဥပ္ပန္နံ၊ နော စ တံ စိတ္တံ ဥပ္ပဇ္ဇတိ. ဥပ္ပါဒက္ခဏေ စိတ္တံ ဥပ္ပန္နဉ္စေဝ ဥပ္ပဇ္ဇတိ စ.

(က) ယံ စိတ္တံ န ဥပ္ပဇ္ဇတိ တံ စိတ္တံ န ဥပ္ပန္နန္တိ?

ဘင်္ဂက္ခဏေ စိတ္တံ န ဥပ္ပဇ္ဇတိ၊ နော စ တံ စိတ္တံ န ဥပ္ပန္နံ. အတီတာနာဂတံ စိတ္တံ န စေဝ ဥပ္ပဇ္ဇတိ န စ ဥပ္ပန္နံ.

(ခ) ယံ ဝါ ပန စိတ္တံ န ဥပ္ပန္နံ တံ စိတ္တံ န ဥပ္ပဇ္ဇတီတိ? အာမန္တာ.