(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၁၄၈. (က) ယဿ ကာယသင်္ခါရော ဥပ္ပဇ္ဇတိ တဿ ဝစီသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝစီသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ ဝစီသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇတိ.

(က) ယဿ ကာယသင်္ခါရော ဥပ္ပဇ္ဇတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇတိ.

၁၄၉. (က) ယဿ ဝစီသင်္ခါရော ဥပ္ပဇ္ဇတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ဝစီသင်္ခါရော ဥပ္ပဇ္ဇတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ဝစီသင်္ခါရော ဥပ္ပဇ္ဇတိ. ဝိတက္ကဝိစာရာနံ ဥပ္ပါဒက္ခဏေ တေသံ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ ဥပ္ပဇ္ဇတိ.

(ခ) အနုလောမဩကာသော

၁၅၀. ယတ္ထ ကာယသင်္ခါရော ဥပ္ပဇ္ဇတိ။ပေ။.

(ဂ) အနုလောမပုဂ္ဂလောကာသာ

၁၅၁. (က) ယဿ ယတ္ထ ကာယသင်္ခါရော ဥပ္ပဇ္ဇတိ တဿ တတ္ထ ဝစီသင်္ခါရော နိရုဇ္ဈိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ကာယသင်္ခါရော ဥပ္ပဇ္ဇတိ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ကာယသင်္ခါရော စ ဥပ္ပဇ္ဇတိ ဝစီသင်္ခါရော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော ဥပ္ပဇ္ဇတီတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ဝစီသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇတိ.

(က) ယဿ ယတ္ထ ကာယသင်္ခါရော ဥပ္ပဇ္ဇတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော ဥပ္ပဇ္ဇတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ တတ္ထ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇတိ.

၁၅၂. (က) ယဿ ယတ္ထ ဝစီသင်္ခါရော ဥပ္ပဇ္ဇတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော ဥပ္ပဇ္ဇတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော ဥပ္ပဇ္ဇတိ. ဝိတက္ကဝိစာရာနံ ဥပ္ပါဒက္ခဏေ တေသံ တတ္ထ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ ဥပ္ပဇ္ဇတိ.

(ဃ) ပစ္စနီကပုဂ္ဂလော

၁၅၃. (က) ယဿ ကာယသင်္ခါရော နုပ္ပဇ္ဇတိ တဿ ဝစီသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော နုပ္ပဇ္ဇတိ၊ နော စ တေသံ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော စ နုပ္ပဇ္ဇတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ဝစီသင်္ခါရော န နိရုဇ္ဈိဿတိ တဿ ကာယသင်္ခါရော နုပ္ပဇ္ဇတီတိ? အာမန္တာ.

(က) ယဿ ကာယသင်္ခါရော နုပ္ပဇ္ဇတိ တဿ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန စိတ္တသင်္ခါရော န နိရုဇ္ဈိဿတိ တဿ ကာယသင်္ခါရော နုပ္ပဇ္ဇတီတိ? အာမန္တာ.

၁၅၄. (က) ယဿ ဝစီသင်္ခါရော နုပ္ပဇ္ဇတိ တဿ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန စိတ္တသင်္ခါရော န နိရုဇ္ဈိဿတိ တဿ ဝစီသင်္ခါရော နုပ္ပဇ္ဇတီတိ? အာမန္တာ.

(င) ပစ္စနီကဩကာသော

၁၅၅. ယတ္ထ ကာယသင်္ခါရော နုပ္ပဇ္ဇတိ။ပေ။.

(စ) ပစ္စနီကပုဂ္ဂလောကာသာ

၁၅၆. (က) ယဿ ယတ္ထ ကာယသင်္ခါရော နုပ္ပဇ္ဇတိ တဿ တတ္ထ ဝစီသင်္ခါရော န နိရုဇ္ဈိဿတီတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇတိ၊ နော စ တေသံ တတ္ထ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော နုပ္ပဇ္ဇတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နုပ္ပဇ္ဇတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ ကာယသင်္ခါရော စ နုပ္ပဇ္ဇတိ.

(က) ယဿ ယတ္ထ ကာယသင်္ခါရော နုပ္ပဇ္ဇတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ တတ္ထ ကာယသင်္ခါရော နုပ္ပဇ္ဇတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော နုပ္ပဇ္ဇတီတိ? အာမန္တာ.

၁၅၇. (က) ယဿ ယတ္ထ ဝစီသင်္ခါရော နုပ္ပဇ္ဇတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ တတ္ထ ဝစီသင်္ခါရော နုပ္ပဇ္ဇတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ဝစီသင်္ခါရော နုပ္ပဇ္ဇတီတိ? အာမန္တာ.