(၆) အတီတာနာဂတဝါရော

(က) အနုလောမပုဂ္ဂလော

၁၅၈. (က) ယဿ ကာယသင်္ခါရော ဥပ္ပဇ္ဇိတ္ထ တဿ ဝစီသင်္ခါရော နိရုဇ္ဈိဿတီတိ?

သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော ဥပ္ပဇ္ဇိတ္ထ၊ နော စ တေသံ ဝစီသင်္ခါရော နိရုဇ္ဈိဿတိ. ဣတရေသံ တေသံ ကာယသင်္ခါရော စ ဥပ္ပဇ္ဇိတ္ထ ဝစီသင်္ခါရော စ နိရုဇ္ဈိဿတိ.

(ခ) ယဿ ဝါ ပန ဝစီသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇိတ္ထာတိ? အာမန္တာ.

(က) ယဿ ကာယသင်္ခါရော ဥပ္ပဇ္ဇိတ္ထ တဿ စိတ္တသင်္ခါရော နိရုဇ္ဈိဿတီတိ?

ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော ဥပ္ပဇ္ဇိတ္ထ၊ နော စ တေသံ စိတ္တသင်္ခါရော နိရုဇ္ဈိဿတိ. ဣတရေသံ တေသံ ကာယသင်္ခါရော စ ဥပ္ပဇ္ဇိတ္ထ စိတ္တသင်္ခါရော စ နိရုဇ္ဈိဿတိ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇိတ္ထာတိ? အာမန္တာ.

(ယထာ နိရောဓဝါရေ အတီတာနာဂတာ ပုစ္ဆာ အနုလောမမ္ပိ ပစ္စနီကမ္ပိ ဧဝံ ဥပ္ပါဒနိရောဓဝါရေပိ အတီတာနာဂတာ ပုစ္ဆာ အနုလောမမ္ပိ ပစ္စနီကမ္ပိ ဝိဘဇိတဗ္ဗံ အသမ္မောဟန္တေန နိရောဓဝါရေန သဒိသံ၊ နတ္ထိ နာနာကရဏံ.)

ဥပ္ပါဒနိရောဓဝါရော.