(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၁၀၈. (က) ယဿ ကာယသင်္ခါရော နိရုဇ္ဈတိ တဿ ဝစီသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝစီသင်္ခါရော နိရုဇ္ဈိဿတိ တဿ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ ဝစီသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈတိ.

(က) ယဿ ကာယသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈတိ.

၁၀၉. (က) ယဿ ဝစီသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈိဿတီတိ?

သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော နိရုဇ္ဈတိ၊ နော စ တေသံ စိတ္တသင်္ခါရော နိရုဇ္ဈိဿတိ. ဣတရေသံ ဝိတက္ကဝိစာရာနံ ဘင်္ဂက္ခဏေ တေသံ ဝစီသင်္ခါရော စ နိရုဇ္ဈတိ စိတ္တသင်္ခါရော စ နိရုဇ္ဈိဿတိ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ဝစီသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ဝစီသင်္ခါရော နိရုဇ္ဈတိ. ဝိတက္ကဝိစာရာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈတိ.

(ခ) အနုလောမဩကာသော

၁၁၀. ယတ္ထ ကာယသင်္ခါရော နိရုဇ္ဈတိ။ပေ။.

(ဂ) အနုလောမပုဂ္ဂလောကာသာ

၁၁၁. (က) ယဿ ယတ္ထ ကာယသင်္ခါရော နိရုဇ္ဈတိ တဿ တတ္ထ ဝစီသင်္ခါရော နိရုဇ္ဈိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံ တတ္ထ ကာယသင်္ခါရော နိရုဇ္ဈတိ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ တတ္ထ ကာယသင်္ခါရော စ နိရုဇ္ဈတိ ဝစီသင်္ခါရော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈတီတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ တတ္ထ ဝစီသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈတိ.

(က) ယဿ ယတ္ထ ကာယသင်္ခါရော နိရုဇ္ဈတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ တတ္ထ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈတိ.

၁၁၂. (က) ယဿ ယတ္ထ ဝစီသင်္ခါရော နိရုဇ္ဈတိ တဿ တတ္ထ စိတ္တသင်္ခါရော နိရုဇ္ဈိဿတီတိ?

သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ တေသံ တတ္ထ ဝစီသင်္ခါရော နိရုဇ္ဈတိ၊ နော စ တေသံ တတ္ထ စိတ္တသင်္ခါရော နိရုဇ္ဈိဿတိ. ဣတရေသံ ဝိတက္ကဝိစာရာနံ ဘင်္ဂက္ခဏေ တေသံ တတ္ထ ဝစီသင်္ခါရော စ နိရုဇ္ဈတိ စိတ္တသင်္ခါရော စ နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော နိရုဇ္ဈတိ. ဝိတက္ကဝိစာရာနံ ဘင်္ဂက္ခဏေ တေသံ တတ္ထ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈတိ.

(ဃ) ပစ္စနီကပုဂ္ဂလော

၁၁၃. (က) ယဿ ကာယသင်္ခါရော န နိရုဇ္ဈတိ တဿ ဝစီသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော န နိရုဇ္ဈတိ၊ နော စ တေသံ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော စ န နိရုဇ္ဈတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ဝစီသင်္ခါရော န နိရုဇ္ဈိဿတိ တဿ ကာယသင်္ခါရော န နိရုဇ္ဈတီတိ? အာမန္တာ.

(က) ယဿ ကာယသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော န နိရုဇ္ဈတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

၁၁၄. (က) ယဿ ဝစီသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော န နိရုဇ္ဈတိ၊ နော စ တေသံ စိတ္တသင်္ခါရော န နိရုဇ္ဈိဿတိ. အဝိတက္ကအဝိစာရပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန စိတ္တသင်္ခါရော န နိရုဇ္ဈိဿတိ တဿ ဝစီသင်္ခါရော န နိရုဇ္ဈတီတိ?

သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ တေသံ စိတ္တသင်္ခါရော န နိရုဇ္ဈိဿတိ၊ နော စ တေသံ ဝစီသင်္ခါရော န နိရုဇ္ဈတိ. အဝိတက္ကအဝိစာရပစ္ဆိမစိတ္တဿ ဘင်္ဂက္ခဏေ တေသံ စိတ္တသင်္ခါရော စ န နိရုဇ္ဈိဿတိ ဝစီသင်္ခါရော စ န နိရုဇ္ဈတိ.

(င) ပစ္စနီကဩကာသော

၁၁၅. ယတ္ထ ကာယသင်္ခါရော န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၁၁၆. (က) ယဿ ယတ္ထ ကာယသင်္ခါရော န နိရုဇ္ဈတိ တဿ တတ္ထ ဝစီသင်္ခါရော န နိရုဇ္ဈိဿတီတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈတိ၊ နော စ တေသံ တတ္ထ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော န နိရုဇ္ဈတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော န နိရုဇ္ဈတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ ကာယသင်္ခါရော စ န နိရုဇ္ဈတိ.

(က) ယဿ ယတ္ထ ကာယသင်္ခါရော န နိရုဇ္ဈတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ တတ္ထ ကာယသင်္ခါရော န နိရုဇ္ဈတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

၁၁၇. (က) ယဿ ယတ္ထ ဝစီသင်္ခါရော န နိရုဇ္ဈတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ တတ္ထ ဝစီသင်္ခါရော န နိရုဇ္ဈတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. အဝိတက္ကအဝိစာရပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ဝစီသင်္ခါရော န နိရုဇ္ဈတီတိ?

သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော န နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော န နိရုဇ္ဈတိ. အဝိတက္ကအဝိစာရပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ စိတ္တသင်္ခါရော စ န နိရုဇ္ဈိဿတိ ဝစီသင်္ခါရော စ န နိရုဇ္ဈတိ.