(၆) အတီတာနာဂတဝါရော
(က) အနုလောမပုဂ္ဂလော
၁၁၈. (က) ယဿ ကာယသင်္ခါရော နိရုဇ္ဈိတ္ထ တဿ ဝစီသင်္ခါရော နိရုဇ္ဈိဿတီတိ?
သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော နိရုဇ္ဈိတ္ထ၊ နော စ တေသံ ဝစီသင်္ခါရော နိရုဇ္ဈိဿတိ. ဣတရေသံ တေသံ ကာယသင်္ခါရော စ နိရုဇ္ဈိတ္ထ ဝစီသင်္ခါရော စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
(က) ယဿ ကာယသင်္ခါရော နိရုဇ္ဈိတ္ထ တဿ စိတ္တသင်္ခါရော နိရုဇ္ဈိဿတီတိ?
ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော နိရုဇ္ဈိတ္ထ၊ နော စ တေသံ စိတ္တသင်္ခါရော နိရုဇ္ဈိဿတိ. ဣတရေသံ တေသံ ကာယသင်္ခါရော စ နိရုဇ္ဈိတ္ထ စိတ္တသင်္ခါရော စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
၁၁၉. (က) ယဿ ဝစီသင်္ခါရော နိရုဇ္ဈိတ္ထ တဿ စိတ္တသင်္ခါရော နိရုဇ္ဈိဿတီတိ?
ပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော နိရုဇ္ဈိတ္ထ၊ နော စ တေသံ စိတ္တသင်္ခါရော နိရုဇ္ဈိဿတိ. ဣတရေသံ တေသံ ဝစီသင်္ခါရော စ နိရုဇ္ဈိတ္ထ စိတ္တသင်္ခါရော စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
(ခ) အနုလောမဩကာသော
၁၂၀. ယတ္ထ ကာယသင်္ခါရော နိရုဇ္ဈိတ္ထ။ပေ။.
(ဂ) အနုလောမပုဂ္ဂလောကာသာ
၁၂၁. (က) ယဿ ယတ္ထ ကာယသင်္ခါရော နိရုဇ္ဈိတ္ထ တဿ တတ္ထ ဝစီသင်္ခါရော နိရုဇ္ဈိဿတီတိ?
ကာမာဝစရေ ပစ္ဆိမစိတ္တဿ ဘင်္ဂက္ခဏေ ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ကာယသင်္ခါရော နိရုဇ္ဈိတ္ထ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ကာယသင်္ခါရော န နိရုဇ္ဈိတ္ထ ဝစီသင်္ခါရော စ နိရုဇ္ဈိဿတိ.
(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈိတ္ထာတိ?
ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈိတ္ထ. ပဌမဇ္ဈာနံ သမာပန္နာနံ ကာမာဝစရာနံ တေသံ တတ္ထ ဝစီသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိတ္ထ.
(က) ယဿ ယတ္ထ ကာယသင်္ခါရော နိရုဇ္ဈိတ္ထ တဿ တတ္ထ စိတ္တသင်္ခါရော နိရုဇ္ဈိဿတီတိ?
ကာမာဝစရေ ပစ္ဆိမစိတ္တဿ ဘင်္ဂက္ခဏေ တေသံ တတ္ထ ကာယသင်္ခါရော နိရုဇ္ဈိတ္ထ၊ နော စ တေသံ တတ္ထ စိတ္တသင်္ခါရော နိရုဇ္ဈိဿတိ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ကာယသင်္ခါရော စ နိရုဇ္ဈိတ္ထ စိတ္တသင်္ခါရော စ နိရုဇ္ဈိဿတိ.
(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈိတ္ထာတိ?
စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈိတ္ထ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ကာမာဝစရာနံ တေသံ တတ္ထ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိတ္ထ.
၁၂၂. (က) ယဿ ယတ္ထ ဝစီသင်္ခါရော နိရုဇ္ဈိတ္ထ တဿ တတ္ထ စိတ္တသင်္ခါရော နိရုဇ္ဈိဿတီတိ?
သဝိတက္ကသဝိစာရဘူမိယံ ပစ္ဆိမစိတ္တဿ ဘင်္ဂက္ခဏေ တေသံ တတ္ထ ဝစီသင်္ခါရော နိရုဇ္ဈိတ္ထ၊ နော စ တေသံ တတ္ထ စိတ္တသင်္ခါရော နိရုဇ္ဈိဿတိ. ဣတရေသံ သဝိတက္ကသဝိစာရဘူမိယံ တေသံ တတ္ထ ဝစီသင်္ခါရော စ နိရုဇ္ဈိတ္ထ စိတ္တသင်္ခါရော စ နိရုဇ္ဈိဿတိ.
(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော နိရုဇ္ဈိတ္ထာတိ?
အဝိတက္ကအဝိစာရဘူမိယံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော နိရုဇ္ဈိတ္ထ. သဝိတက္ကသဝိစာရဘူမိယံ တေသံ တတ္ထ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈိတ္ထ.
(ဃ) ပစ္စနီကပုဂ္ဂလော
၁၂၃. (က) ယဿ ကာယသင်္ခါရော န နိရုဇ္ဈိတ္ထ တဿ ဝစီသင်္ခါရော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန ဝစီသင်္ခါရော န နိရုဇ္ဈိဿတိ တဿ ကာယသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.
(က) ယဿ ကာယသင်္ခါရော န နိရုဇ္ဈိတ္ထ တဿ စိတ္တသင်္ခါရော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန စိတ္တသင်္ခါရော န နိရုဇ္ဈိဿတိ တဿ ကာယသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.
၁၂၄. (က) ယဿ ဝစီသင်္ခါရော န နိရုဇ္ဈိတ္ထ တဿ စိတ္တသင်္ခါရော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန စိတ္တသင်္ခါရော န နိရုဇ္ဈိဿတိ တဿ ဝစီသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.
(င) ပစ္စနီကဩကာသော
၁၂၅. ယတ္ထ ကာယသင်္ခါရော န နိရုဇ္ဈိတ္ထ။ပေ။.
(စ) ပစ္စနီကပုဂ္ဂလောကာသာ
၁၂၆. (က) ယဿ ယတ္ထ ကာယသင်္ခါရော န နိရုဇ္ဈိတ္ထ တဿ တတ္ထ ဝစီသင်္ခါရော န နိရုဇ္ဈိဿတီတိ?
ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈိတ္ထ၊ နော စ တေသံ တတ္ထ ဝစီသင်္ခါရော န နိရုဇ္ဈိဿတိ. ရူပါဝစရေ အရူပါဝစရေ သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈိတ္ထ ဝစီသင်္ခါရော စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော န နိရုဇ္ဈိတ္ထာတိ?
ကာမာဝစရေ ပစ္ဆိမစိတ္တဿ ဘင်္ဂက္ခဏေ ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော န နိရုဇ္ဈိတ္ထ. ရူပါဝစရေ အရူပါဝစရေ သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ ကာယသင်္ခါရော စ န နိရုဇ္ဈိတ္ထ.
(က) ယဿ ယတ္ထ ကာယသင်္ခါရော န နိရုဇ္ဈိတ္ထ တဿ တတ္ထ စိတ္တသင်္ခါရော န နိရုဇ္ဈိဿတီတိ?
စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈိတ္ထ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ရူပါဝစရေ အရူပါဝစရေ ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈိတ္ထ စိတ္တသင်္ခါရော စ န နိရုဇ္ဈိဿတိ.
(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော န နိရုဇ္ဈိတ္ထာတိ?
ကာမာဝစရေ ပစ္ဆိမစိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော န နိရုဇ္ဈိတ္ထ. ရူပါဝစရေ အရူပါဝစရေ ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ စိတ္တသင်္ခါရော စ န နိရုဇ္ဈိဿတိ ကာယသင်္ခါရော စ န နိရုဇ္ဈိတ္ထ.
၁၂၇. (က) ယဿ ယတ္ထ ဝစီသင်္ခါရော န နိရုဇ္ဈိတ္ထ တဿ တတ္ထ စိတ္တသင်္ခါရော န နိရုဇ္ဈိဿတီတိ?
အဝိတက္ကအဝိစာရဘူမိယံ တေသံ တတ္ထ ဝစီသင်္ခါရော န နိရုဇ္ဈိတ္ထ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. အဝိတက္ကအဝိစာရဘူမိယံ ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိတ္ထ စိတ္တသင်္ခါရော စ န နိရုဇ္ဈိဿတိ.
(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ဝစီသင်္ခါရော န နိရုဇ္ဈိတ္ထာတိ?
သဝိတက္ကသဝိစာရဘူမိယံ ပစ္ဆိမစိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော န နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော န နိရုဇ္ဈိတ္ထ. အဝိတက္ကအဝိစာရဘူမိယံ ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ စိတ္တသင်္ခါရော စ န နိရုဇ္ဈိဿတိ ဝစီသင်္ခါရော စ န နိရုဇ္ဈိတ္ထ.
နိရောဓဝါရော.