(၄) ပစ္စုပ္ပန္နာတီတဝါရော

(က) အနုလောမပုဂ္ဂလော

၉၈. (က) ယဿ ကာယသင်္ခါရော နိရုဇ္ဈတိ တဿ ဝစီသင်္ခါရော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ဝစီသင်္ခါရော နိရုဇ္ဈိတ္ထ တဿ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော နိရုဇ္ဈိတ္ထ၊ နော စ တေသံ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ ဝစီသင်္ခါရော စ နိရုဇ္ဈိတ္ထ ကာယသင်္ခါရော စ နိရုဇ္ဈတိ.

(က) ယဿ ကာယသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိတ္ထ တဿ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိတ္ထ၊ နော စ တေသံ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈိတ္ထ ကာယသင်္ခါရော စ နိရုဇ္ဈတိ.

၉၉. (က) ယဿ ဝစီသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိတ္ထ တဿ ဝစီသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော နိရုဇ္ဈိတ္ထ၊ နော စ တေသံ ဝစီသင်္ခါရော နိရုဇ္ဈတိ. ဝိတက္ကဝိစာရာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈိတ္ထ ဝစီသင်္ခါရော စ နိရုဇ္ဈတိ.

(ခ) အနုလောမဩကာသော

၁၀၀. ယတ္ထ ကာယသင်္ခါရော နိရုဇ္ဈတိ။ပေ။.

(ဂ) အနုလောမပုဂ္ဂလောကာသာ

၁၀၁. (က) ယဿ ယတ္ထ ကာယသင်္ခါရော နိရုဇ္ဈတိ တဿ တတ္ထ ဝစီသင်္ခါရော နိရုဇ္ဈိတ္ထာတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံ တတ္ထ ကာယသင်္ခါရော နိရုဇ္ဈတိ၊ နော စ တေသံ တတ္ထ ဝစီသင်္ခါရော နိရုဇ္ဈိတ္ထ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ တတ္ထ ကာယသင်္ခါရော စ နိရုဇ္ဈတိ ဝစီသင်္ခါရော စ နိရုဇ္ဈိတ္ထ.

(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိတ္ထ တဿ တတ္ထ ကာယသင်္ခါရော နိရုဇ္ဈတီတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိတ္ထ၊ နော စ တေသံ တတ္ထ ကာယသင်္ခါရော နိရုဇ္ဈတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ တတ္ထ ဝစီသင်္ခါရော စ နိရုဇ္ဈိတ္ထ ကာယသင်္ခါရော စ နိရုဇ္ဈတိ.

(က) ယဿ ယတ္ထ ကာယသင်္ခါရော နိရုဇ္ဈတိ တဿ တတ္ထ စိတ္တသင်္ခါရော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိတ္ထ တဿ တတ္ထ ကာယသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော နိရုဇ္ဈိတ္ထ၊ နော စ တေသံ တတ္ထ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ တတ္ထ စိတ္တသင်္ခါရော စ နိရုဇ္ဈိတ္ထ ကာယသင်္ခါရော စ နိရုဇ္ဈတိ.

၁၀၂. (က) ယဿ ယတ္ထ ဝစီသင်္ခါရော နိရုဇ္ဈတိ တဿ တတ္ထ စိတ္တသင်္ခါရော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိတ္ထ တဿ တတ္ထ ဝစီသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ တတ္ထ စိတ္တသင်္ခါရော နိရုဇ္ဈိတ္ထ၊ နော စ တေသံ တတ္ထ ဝစီသင်္ခါရော နိရုဇ္ဈတိ. ဝိတက္ကဝိစာရာနံ ဘင်္ဂက္ခဏေ တေသံ တတ္ထ စိတ္တသင်္ခါရော စ နိရုဇ္ဈိတ္ထ ဝစီသင်္ခါရော စ နိရုဇ္ဈတိ.

(ဃ) ပစ္စနီကပုဂ္ဂလော

၁၀၃. (က) ယဿ ကာယသင်္ခါရော န နိရုဇ္ဈတိ တဿ ဝစီသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန ဝစီသင်္ခါရော န နိရုဇ္ဈိတ္ထ တဿ ကာယသင်္ခါရော န နိရုဇ္ဈတီတိ? နတ္ထိ.

(က) ယဿ ကာယသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန စိတ္တသင်္ခါရော န နိရုဇ္ဈိတ္ထ တဿ ကာယသင်္ခါရော န နိရုဇ္ဈတီတိ? နတ္ထိ.

၁၀၄. (က) ယဿ ဝစီသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန စိတ္တသင်္ခါရော န နိရုဇ္ဈိတ္ထ တဿ ဝစီသင်္ခါရော န နိရုဇ္ဈတီတိ? နတ္ထိ.

(င) ပစ္စနီကဩကာသော

၁၀၅. ယတ္ထ ကာယသင်္ခါရော န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၁၀၆. (က) ယဿ ယတ္ထ ကာယသင်္ခါရော န နိရုဇ္ဈတိ တဿ တတ္ထ ဝစီသင်္ခါရော န နိရုဇ္ဈိတ္ထာတိ?

ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈတိ၊ နော စ တေသံ တတ္ထ ဝစီသင်္ခါရော န နိရုဇ္ဈိတ္ထ. ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ စတုတ္ထဇ္ဈာနံ သမာပန္နာနံ သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈတိ ဝစီသင်္ခါရော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိတ္ထ တဿ တတ္ထ ကာယသင်္ခါရော န နိရုဇ္ဈတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံ တတ္ထ ဝစီသင်္ခါရော န နိရုဇ္ဈိတ္ထ၊ နော စ တေသံ တတ္ထ ကာယသင်္ခါရော န နိရုဇ္ဈတိ. ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဘင်္ဂက္ခဏေ စတုတ္ထဇ္ဈာနံ သမာပန္နာနံ သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိတ္ထ ကာယသင်္ခါရော စ န နိရုဇ္ဈတိ.

(က) ယဿ ယတ္ထ ကာယသင်္ခါရော န နိရုဇ္ဈတိ တဿ တတ္ထ စိတ္တသင်္ခါရော န နိရုဇ္ဈိတ္ထာတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ တတ္ထ ကာယသင်္ခါရော န နိရုဇ္ဈတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိတ္ထ တဿ တတ္ထ ကာယသင်္ခါရော န နိရုဇ္ဈတီတိ? အာမန္တာ.

၁၀၇. (က) ယဿ ယတ္ထ ဝစီသင်္ခါရော န နိရုဇ္ဈတိ တဿ တတ္ထ စိတ္တသင်္ခါရော န နိရုဇ္ဈိတ္ထာတိ?

သဗ္ဗေသံ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ တတ္ထ ဝစီသင်္ခါရော န နိရုဇ္ဈတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိတ္ထ တဿ တတ္ထ ဝစီသင်္ခါရော န နိရုဇ္ဈတီတိ? အာမန္တာ.