(၃) အနာဂတဝါရော

(က) အနုလောမပုဂ္ဂလော

၈၈. (က) ယဿ ကာယသင်္ခါရော နိရုဇ္ဈိဿတိ တဿ ဝစီသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝစီသင်္ခါရော နိရုဇ္ဈိဿတိ တဿ ကာယသင်္ခါရော နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဝစီသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော နိရုဇ္ဈိဿတိ. ဣတရေသံ တေသံ ဝစီသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိဿတိ.

(က) ယဿ ကာယသင်္ခါရော နိရုဇ္ဈိဿတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ကာယသင်္ခါရော နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော နိရုဇ္ဈိဿတိ. ဣတရေသံ တေသံ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိဿတိ.

၈၉. (က) ယဿ ဝစီသင်္ခါရော နိရုဇ္ဈိဿတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ဝစီသင်္ခါရော နိရုဇ္ဈိဿတီတိ?

အဝိတက္ကအဝိစာရပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ဝစီသင်္ခါရော နိရုဇ္ဈိဿတိ. ဣတရေသံ တေသံ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈိဿတိ.

(ခ) အနုလောမဩကာသော

၉၀. ယတ္ထ ကာယသင်္ခါရော နိရုဇ္ဈိဿတိ။ပေ။.

(ဂ) အနုလောမပုဂ္ဂလောကာသာ

၉၁. (က) ယဿ ယတ္ထ ကာယသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော နိရုဇ္ဈိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ကာယသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ကာမာဝစရာနံ တေသံ တတ္ထ ကာယသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ဝစီသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိဿတိ.

(က) ယဿ ယတ္ထ ကာယသင်္ခါရော နိရုဇ္ဈိဿတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နိရုဇ္ဈိဿတိ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ နိရုဇ္ဈိဿတိ.

၉၂. (က) ယဿ ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော နိရုဇ္ဈိဿတီတိ?

အဝိတက္ကအဝိစာရပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ စတုတ္ထဇ္ဈာနံ သမာပန္နာနံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ကာမာဝစရာနံ ဣတရေသံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ နိရုဇ္ဈိဿတိ.

(ဃ) ပစ္စနီကပုဂ္ဂလော

၉၃. (က) ယဿ ကာယသင်္ခါရော န နိရုဇ္ဈိဿတိ တဿ ဝစီသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ကာယသင်္ခါရော န နိရုဇ္ဈိဿတိ၊ နော စ တေသံ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော စ န နိရုဇ္ဈိဿတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

(က) ယဿ ကာယသင်္ခါရော န နိရုဇ္ဈိဿတိ တဿ စိတ္တသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ကာယသင်္ခါရော န နိရုဇ္ဈိဿတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော စ န နိရုဇ္ဈိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

၉၄. (က) ယဿ ဝစီသင်္ခါရော န နိရုဇ္ဈိဿတိ တဿ စိတ္တသင်္ခါရော န နိရုဇ္ဈိဿတီတိ?

အဝိတက္ကအဝိစာရပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ဝစီသင်္ခါရော န နိရုဇ္ဈိဿတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော စ န နိရုဇ္ဈိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

(င) ပစ္စနီကဩကာသော

၉၅. ယတ္ထ ကာယသင်္ခါရော န နိရုဇ္ဈိဿတိ။ပေ။.

(စ) ပစ္စနီကပုဂ္ဂလောကာသာ

၉၆. (က) ယဿ ယတ္ထ ကာယသင်္ခါရော န နိရုဇ္ဈိဿတိ တဿ တတ္ထ ဝစီသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈိဿတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော န နိရုဇ္ဈိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ ကာယသင်္ခါရော စ န နိရုဇ္ဈိဿတိ.

(က) ယဿ ယတ္ထ ကာယသင်္ခါရော န နိရုဇ္ဈိဿတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော န နိရုဇ္ဈိဿတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော န နိရုဇ္ဈိဿတီတိ? အာမန္တာ.

၉၇. (က) ယဿ ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

အဝိတက္ကအဝိစာရပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ စတုတ္ထဇ္ဈာနံ သမာပန္နာနံ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ စိတ္တသင်္ခါရော န နိရုဇ္ဈိဿတိ တဿ တတ္ထ ဝစီသင်္ခါရော န နိရုဇ္ဈိဿတီတိ? အာမန္တာ.