၁. တိကံ

၂၂၃. ဒသိန္ဒြိယာ အဗျာကတာ. ဒေါမနဿိန္ဒြိယံ အကုသလံ. အနညာတညဿာမီတိန္ဒြိယံ ကုသလံ. စတ္တာရိန္ဒြိယာ သိယာ ကုသလာ၊ သိယာ အဗျာကတာ. ဆ ဣန္ဒြိယာ သိယာ ကုသလာ၊ သိယာ အကုသလာ၊ သိယာ အဗျာကတာ.

ဒွါဒသိန္ဒြိယာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ၊ ‘‘ဒုက္ခာယ ဝေဒနာယ သမ္ပယုတ္တာ’’တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ. ဆ ဣန္ဒြိယာ သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. တီဏိန္ဒြိယာ သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. ဇီဝိတိန္ဒြိယံ သိယာ သုခါယ ဝေဒနာယ သမ္ပယုတ္တံ၊ သိယာ ဒုက္ခာယ ဝေဒနာယ သမ္ပယုတ္တံ၊ သိယာ အဒုက္ခမသုခါယ ဝေဒနာယ သမ္ပယုတ္တံ၊ သိယာ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ၊ ‘‘ဒုက္ခာယ ဝေဒနာယ သမ္ပယုတ္တ’’န္တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ.

သတ္တိန္ဒြိယာ နေဝဝိပါကနဝိပါကဓမ္မဓမ္မာ. တီဏိန္ဒြိယာ ဝိပါကာ. ဒွိန္ဒြိယာ ဝိပါကဓမ္မဓမ္မာ. အညိန္ဒြိယံ သိယာ ဝိပါကံ၊ သိယာ ဝိပါကဓမ္မဓမ္မံ. နဝိန္ဒြိယာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. နဝိန္ဒြိယာ ဥပါဒိန္နုပါဒါနိယာ. ဒေါမနဿိန္ဒြိယံ အနုပါဒိန္နုပါဒါနိယံ. တီဏိန္ဒြိယာ အနုပါဒိန္နအနုပါဒါနိယာ. နဝိန္ဒြိယာ သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ၊ သိယာ အနုပါဒိန္နအနုပါဒါနိယာ.

နဝိန္ဒြိယာ အသံကိလိဋ္ဌသံကိလေသိကာ. ဒေါမနဿိန္ဒြိယံ သံကိလိဋ္ဌသံကိလေသိကံ. တီဏိန္ဒြိယာ အသံကိလိဋ္ဌအသံကိလေသိကာ. တီဏိန္ဒြိယာ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. ဆ ဣန္ဒြိယာ သိယာ သံကိလိဋ္ဌသံကိလေသိကာ၊ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. နဝိန္ဒြိယာ အဝိတက္ကအဝိစာရာ. ဒေါမနဿိန္ဒြိယံ သဝိတက္ကသဝိစာရံ. ဥပေက္ခိန္ဒြိယံ သိယာ သဝိတက္ကသဝိစာရံ၊ သိယာ အဝိတက္ကအဝိစာရံ. ဧကာဒသိန္ဒြိယာ သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ.

ဧကာဒသိန္ဒြိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ. သောမနဿိန္ဒြိယံ သိယာ ပီတိသဟဂတံ န သုခသဟဂတံ န ဥပေက္ခာသဟဂတံ၊ သိယာ န ဝတ္တဗ္ဗံ – ‘‘ပီတိသဟဂတ’’န္တိ. ဆ ဣန္ဒြိယာ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. စတ္တာရိန္ဒြိယာ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ၊ သိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ.

ပန္နရသိန္ဒြိယာ နေဝ ဒဿနေန န ဘာဝနာယ ပဟာတဗ္ဗာ. ဒေါမနဿိန္ဒြိယံ သိယာ ဒဿနေန ပဟာတဗ္ဗံ၊ သိယာ ဘာဝနာယ ပဟာတဗ္ဗံ. ဆ ဣန္ဒြိယာ သိယာ ဒဿနေန ပဟာတဗ္ဗာ၊ သိယာ ဘာဝနာယ ပဟာတဗ္ဗာ၊ သိယာ နေဝ ဒဿနေန န ဘာဝနာယ ပဟာတဗ္ဗာ. ပန္နရသိန္ဒြိယာ နေဝ ဒဿနေန န ဘာဝနာယ ပဟာတဗ္ဗဟေတုကာ. ဒေါမနဿိန္ဒြိယံ သိယာ ဒဿနေန ပဟာတဗ္ဗဟေတုကံ၊ သိယာ ဘာဝနာယ ပဟာတဗ္ဗဟေတုကံ. ဆ ဣန္ဒြိယာ သိယာ ဒဿနေန ပဟာတဗ္ဗဟေတုကာ၊ သိယာ ဘာဝနာယ ပဟာတဗ္ဗဟေတုကာ၊ သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ.

ဒသိန္ဒြိယာ နေဝါစယဂါမိနာပစယဂါမိနော. ဒေါမနဿိန္ဒြိယံ အာစယဂါမိ. အနညာတညဿာမီတိန္ဒြိယံ အပစယဂါမိ. အညိန္ဒြိယံ သိယာ အပစယဂါမိ၊ သိယာ နေဝါစယဂါမိနာပစယဂါမိ. နဝိန္ဒြိယာ သိယာ အာစယဂါမိနော၊ သိယာ အပစယဂါမိနော၊ သိယာ နေဝါစယဂါမိနာပစယဂါမိနော. ဒသိန္ဒြိယာ နေဝသေက္ခနာသေက္ခာ. ဒွိန္ဒြိယာ သေက္ခာ. အညာတာဝိန္ဒြိယံ အသေက္ခံ. နဝိန္ဒြိယာ သိယာ သေက္ခာ၊ သိယာ အသေက္ခာ၊ သိယာ နေဝသေက္ခနာသေက္ခာ.

ဒသိန္ဒြိယာ ပရိတ္တာ. တီဏိန္ဒြိယာ အပ္ပမာဏာ. နဝိန္ဒြိယာ သိယာ ပရိတ္တာ၊ သိယာ မဟဂ္ဂတာ၊ သိယာ အပ္ပမာဏာ. သတ္တိန္ဒြိယာ အနာရမ္မဏာ. ဒွိန္ဒြိယာ ပရိတ္တာရမ္မဏာ. တီဏိန္ဒြိယာ အပ္ပမာဏာရမ္မဏာ. ဒေါမနဿိန္ဒြိယံ သိယာ ပရိတ္တာရမ္မဏံ သိယာ မဟဂ္ဂတာရမ္မဏံ၊ န အပ္ပမာဏာရမ္မဏံ၊ သိယာ န ဝတ္တဗ္ဗံ – ‘‘ပရိတ္တာရမ္မဏ’’န္တိပိ၊ ‘‘မဟဂ္ဂတာရမ္မဏ’’န္တိ ပိ. နဝိန္ဒြိယာ သိယာ ပရိတ္တာရမ္မဏာ၊ သိယာ မဟဂ္ဂတာရမ္မဏာ၊ သိယာ အပ္ပမာဏာရမ္မဏာ၊ သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ၊ ‘‘မဟဂ္ဂတာရမ္မဏာ’’တိပိ၊ ‘‘အပ္ပမာဏာရမ္မဏာ’’တိပိ.

နဝိန္ဒြိယာ မဇ္ဈိမာ. ဒေါမနဿိန္ဒြိယံ ဟီနံ. တီဏိန္ဒြိယာ ပဏီတာ. တီဏိန္ဒြိယာ သိယာ မဇ္ဈိမာ၊ သိယာ ပဏီတာ. ဆ ဣန္ဒြိယာ သိယာ ဟီနာ၊ သိယာ မဇ္ဈိမာ၊ သိယာ ပဏီတာ. ဒသိန္ဒြိယာ အနိယတာ. အနညာတညဿာမီတိန္ဒြိယံ သမ္မတ္တနိယတံ. စတ္တာရိန္ဒြိယာ သိယာ သမ္မတ္တနိယတာ၊ သိယာ အနိယတာ. ဒေါမနဿိန္ဒြိယံ သိယာ မိစ္ဆတ္တနိယတံ၊ သိယာ အနိယတံ. ဆ ဣန္ဒြိယာ သိယာ မိစ္ဆတ္တနိယတာ၊ သိယာ သမ္မတ္တနိယတာ၊ သိယာ အနိယတာ. သတ္တိန္ဒြိယာ အနာရမ္မဏာ. စတ္တာရိန္ဒြိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ. အနညာတညဿာမီတိန္ဒြိယံ န မဂ္ဂါရမ္မဏံ၊ သိယာ မဂ္ဂဟေတုကံ၊ သိယာ မဂ္ဂါဓိပတိ၊ သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ၊ ‘‘မဂ္ဂါဓိပတီ’’တိပိ. အညိန္ဒြိယံ န မဂ္ဂါရမ္မဏံ၊ သိယာ မဂ္ဂဟေတုကံ၊ သိယာ မဂ္ဂါဓိပတိ၊ သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ၊ ‘‘မဂ္ဂါဓိပတီ’’တိပိ. နဝိန္ဒြိယာ သိယာ မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ.

ဒသိန္ဒြိယာ သိယာ ဥပ္ပန္နာ၊ သိယာ ဥပ္ပါဒိနော၊ န ဝတ္တဗ္ဗာ – ‘‘အနုပ္ပန္နာ’’တိ. ဒွိန္ဒြိယာ သိယာ ဥပ္ပန္နာ၊ သိယာ အနုပ္ပန္နာ၊ န ဝတ္တဗ္ဗာ – ‘‘ဥပ္ပါဒိနော’’တိ. ဒသိန္ဒြိယာ သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော၊ သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. သတ္တိန္ဒြိယာ အနာရမ္မဏာ. ဒွိန္ဒြိယာ ပစ္စုပ္ပန္နာရမ္မဏာ. တီဏိန္ဒြိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ. ဒသိန္ဒြိယာ သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ သိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ၊ သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. သတ္တိန္ဒြိယာ အနာရမ္မဏာ. တီဏိန္ဒြိယာ ဗဟိဒ္ဓါရမ္မဏာ. စတ္တာရိန္ဒြိယာ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ အဋ္ဌိန္ဒြိယာ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ၊ ‘‘ဗဟိဒ္ဓါရမ္မဏာ’’တိပိ၊ ‘‘အဇ္ဈတ္တဗဟိဒ္ဓါရမ္မဏာ’’တိပိ. ပဉ္စိန္ဒြိယာ အနိဒဿနသပ္ပဋိဃာ. သတ္တရသိန္ဒြိယာ အနိဒဿနအပ္ပဋိဃာ.