၂. ပဉှာပုစ္ဆကံ

၂၂၁. ဗာဝီသတိန္ဒြိယာနိ – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ မနိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ သုခိန္ဒြိယံ၊ ဒုက္ခိန္ဒြိယံ၊ သောမနဿိန္ဒြိယံ၊ ဒေါမနဿိန္ဒြိယံ၊ ဥပေက္ခိန္ဒြိယံ၊ သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ အနညာတညဿာမီတိန္ဒြိယံ၊ အညိန္ဒြိယံ၊ အညာတာဝိန္ဒြိယံ.

၂၂၂. ဗာဝီသတီနံ ဣန္ဒြိယာနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၂၂၃. ဒသိန္ဒြိယာ အဗျာကတာ. ဒေါမနဿိန္ဒြိယံ အကုသလံ. အနညာတညဿာမီတိန္ဒြိယံ ကုသလံ. စတ္တာရိန္ဒြိယာ သိယာ ကုသလာ၊ သိယာ အဗျာကတာ. ဆ ဣန္ဒြိယာ သိယာ ကုသလာ၊ သိယာ အကုသလာ၊ သိယာ အဗျာကတာ.

ဒွါဒသိန္ဒြိယာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ၊ ‘‘ဒုက္ခာယ ဝေဒနာယ သမ္ပယုတ္တာ’’တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ. ဆ ဣန္ဒြိယာ သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. တီဏိန္ဒြိယာ သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. ဇီဝိတိန္ဒြိယံ သိယာ သုခါယ ဝေဒနာယ သမ္ပယုတ္တံ၊ သိယာ ဒုက္ခာယ ဝေဒနာယ သမ္ပယုတ္တံ၊ သိယာ အဒုက္ခမသုခါယ ဝေဒနာယ သမ္ပယုတ္တံ၊ သိယာ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ၊ ‘‘ဒုက္ခာယ ဝေဒနာယ သမ္ပယုတ္တ’’န္တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ.

သတ္တိန္ဒြိယာ နေဝဝိပါကနဝိပါကဓမ္မဓမ္မာ. တီဏိန္ဒြိယာ ဝိပါကာ. ဒွိန္ဒြိယာ ဝိပါကဓမ္မဓမ္မာ. အညိန္ဒြိယံ သိယာ ဝိပါကံ၊ သိယာ ဝိပါကဓမ္မဓမ္မံ. နဝိန္ဒြိယာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. နဝိန္ဒြိယာ ဥပါဒိန္နုပါဒါနိယာ. ဒေါမနဿိန္ဒြိယံ အနုပါဒိန္နုပါဒါနိယံ. တီဏိန္ဒြိယာ အနုပါဒိန္နအနုပါဒါနိယာ. နဝိန္ဒြိယာ သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ၊ သိယာ အနုပါဒိန္နအနုပါဒါနိယာ.

နဝိန္ဒြိယာ အသံကိလိဋ္ဌသံကိလေသိကာ. ဒေါမနဿိန္ဒြိယံ သံကိလိဋ္ဌသံကိလေသိကံ. တီဏိန္ဒြိယာ အသံကိလိဋ္ဌအသံကိလေသိကာ. တီဏိန္ဒြိယာ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. ဆ ဣန္ဒြိယာ သိယာ သံကိလိဋ္ဌသံကိလေသိကာ၊ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. နဝိန္ဒြိယာ အဝိတက္ကအဝိစာရာ. ဒေါမနဿိန္ဒြိယံ သဝိတက္ကသဝိစာရံ. ဥပေက္ခိန္ဒြိယံ သိယာ သဝိတက္ကသဝိစာရံ၊ သိယာ အဝိတက္ကအဝိစာရံ. ဧကာဒသိန္ဒြိယာ သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ.

ဧကာဒသိန္ဒြိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ. သောမနဿိန္ဒြိယံ သိယာ ပီတိသဟဂတံ န သုခသဟဂတံ န ဥပေက္ခာသဟဂတံ၊ သိယာ န ဝတ္တဗ္ဗံ – ‘‘ပီတိသဟဂတ’’န္တိ. ဆ ဣန္ဒြိယာ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. စတ္တာရိန္ဒြိယာ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ၊ သိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ.

ပန္နရသိန္ဒြိယာ နေဝ ဒဿနေန န ဘာဝနာယ ပဟာတဗ္ဗာ. ဒေါမနဿိန္ဒြိယံ သိယာ ဒဿနေန ပဟာတဗ္ဗံ၊ သိယာ ဘာဝနာယ ပဟာတဗ္ဗံ. ဆ ဣန္ဒြိယာ သိယာ ဒဿနေန ပဟာတဗ္ဗာ၊ သိယာ ဘာဝနာယ ပဟာတဗ္ဗာ၊ သိယာ နေဝ ဒဿနေန န ဘာဝနာယ ပဟာတဗ္ဗာ. ပန္နရသိန္ဒြိယာ နေဝ ဒဿနေန န ဘာဝနာယ ပဟာတဗ္ဗဟေတုကာ. ဒေါမနဿိန္ဒြိယံ သိယာ ဒဿနေန ပဟာတဗ္ဗဟေတုကံ၊ သိယာ ဘာဝနာယ ပဟာတဗ္ဗဟေတုကံ. ဆ ဣန္ဒြိယာ သိယာ ဒဿနေန ပဟာတဗ္ဗဟေတုကာ၊ သိယာ ဘာဝနာယ ပဟာတဗ္ဗဟေတုကာ၊ သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ.

ဒသိန္ဒြိယာ နေဝါစယဂါမိနာပစယဂါမိနော. ဒေါမနဿိန္ဒြိယံ အာစယဂါမိ. အနညာတညဿာမီတိန္ဒြိယံ အပစယဂါမိ. အညိန္ဒြိယံ သိယာ အပစယဂါမိ၊ သိယာ နေဝါစယဂါမိနာပစယဂါမိ. နဝိန္ဒြိယာ သိယာ အာစယဂါမိနော၊ သိယာ အပစယဂါမိနော၊ သိယာ နေဝါစယဂါမိနာပစယဂါမိနော. ဒသိန္ဒြိယာ နေဝသေက္ခနာသေက္ခာ. ဒွိန္ဒြိယာ သေက္ခာ. အညာတာဝိန္ဒြိယံ အသေက္ခံ. နဝိန္ဒြိယာ သိယာ သေက္ခာ၊ သိယာ အသေက္ခာ၊ သိယာ နေဝသေက္ခနာသေက္ခာ.

ဒသိန္ဒြိယာ ပရိတ္တာ. တီဏိန္ဒြိယာ အပ္ပမာဏာ. နဝိန္ဒြိယာ သိယာ ပရိတ္တာ၊ သိယာ မဟဂ္ဂတာ၊ သိယာ အပ္ပမာဏာ. သတ္တိန္ဒြိယာ အနာရမ္မဏာ. ဒွိန္ဒြိယာ ပရိတ္တာရမ္မဏာ. တီဏိန္ဒြိယာ အပ္ပမာဏာရမ္မဏာ. ဒေါမနဿိန္ဒြိယံ သိယာ ပရိတ္တာရမ္မဏံ သိယာ မဟဂ္ဂတာရမ္မဏံ၊ န အပ္ပမာဏာရမ္မဏံ၊ သိယာ န ဝတ္တဗ္ဗံ – ‘‘ပရိတ္တာရမ္မဏ’’န္တိပိ၊ ‘‘မဟဂ္ဂတာရမ္မဏ’’န္တိ ပိ. နဝိန္ဒြိယာ သိယာ ပရိတ္တာရမ္မဏာ၊ သိယာ မဟဂ္ဂတာရမ္မဏာ၊ သိယာ အပ္ပမာဏာရမ္မဏာ၊ သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ၊ ‘‘မဟဂ္ဂတာရမ္မဏာ’’တိပိ၊ ‘‘အပ္ပမာဏာရမ္မဏာ’’တိပိ.

နဝိန္ဒြိယာ မဇ္ဈိမာ. ဒေါမနဿိန္ဒြိယံ ဟီနံ. တီဏိန္ဒြိယာ ပဏီတာ. တီဏိန္ဒြိယာ သိယာ မဇ္ဈိမာ၊ သိယာ ပဏီတာ. ဆ ဣန္ဒြိယာ သိယာ ဟီနာ၊ သိယာ မဇ္ဈိမာ၊ သိယာ ပဏီတာ. ဒသိန္ဒြိယာ အနိယတာ. အနညာတညဿာမီတိန္ဒြိယံ သမ္မတ္တနိယတံ. စတ္တာရိန္ဒြိယာ သိယာ သမ္မတ္တနိယတာ၊ သိယာ အနိယတာ. ဒေါမနဿိန္ဒြိယံ သိယာ မိစ္ဆတ္တနိယတံ၊ သိယာ အနိယတံ. ဆ ဣန္ဒြိယာ သိယာ မိစ္ဆတ္တနိယတာ၊ သိယာ သမ္မတ္တနိယတာ၊ သိယာ အနိယတာ. သတ္တိန္ဒြိယာ အနာရမ္မဏာ. စတ္တာရိန္ဒြိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ. အနညာတညဿာမီတိန္ဒြိယံ န မဂ္ဂါရမ္မဏံ၊ သိယာ မဂ္ဂဟေတုကံ၊ သိယာ မဂ္ဂါဓိပတိ၊ သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ၊ ‘‘မဂ္ဂါဓိပတီ’’တိပိ. အညိန္ဒြိယံ န မဂ္ဂါရမ္မဏံ၊ သိယာ မဂ္ဂဟေတုကံ၊ သိယာ မဂ္ဂါဓိပတိ၊ သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ၊ ‘‘မဂ္ဂါဓိပတီ’’တိပိ. နဝိန္ဒြိယာ သိယာ မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ.

ဒသိန္ဒြိယာ သိယာ ဥပ္ပန္နာ၊ သိယာ ဥပ္ပါဒိနော၊ န ဝတ္တဗ္ဗာ – ‘‘အနုပ္ပန္နာ’’တိ. ဒွိန္ဒြိယာ သိယာ ဥပ္ပန္နာ၊ သိယာ အနုပ္ပန္နာ၊ န ဝတ္တဗ္ဗာ – ‘‘ဥပ္ပါဒိနော’’တိ. ဒသိန္ဒြိယာ သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော၊ သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. သတ္တိန္ဒြိယာ အနာရမ္မဏာ. ဒွိန္ဒြိယာ ပစ္စုပ္ပန္နာရမ္မဏာ. တီဏိန္ဒြိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ. ဒသိန္ဒြိယာ သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ သိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ၊ သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. သတ္တိန္ဒြိယာ အနာရမ္မဏာ. တီဏိန္ဒြိယာ ဗဟိဒ္ဓါရမ္မဏာ. စတ္တာရိန္ဒြိယာ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ အဋ္ဌိန္ဒြိယာ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ၊ ‘‘ဗဟိဒ္ဓါရမ္မဏာ’’တိပိ၊ ‘‘အဇ္ဈတ္တဗဟိဒ္ဓါရမ္မဏာ’’တိပိ. ပဉ္စိန္ဒြိယာ အနိဒဿနသပ္ပဋိဃာ. သတ္တရသိန္ဒြိယာ အနိဒဿနအပ္ပဋိဃာ.

၂. ဒုကံ

၂၂၄. စတ္တာရိန္ဒြိယာ ဟေတူ. အဋ္ဌာရသိန္ဒြိယာ န ဟေတူ. သတ္တိန္ဒြိယာ သဟေတုကာ. နဝိန္ဒြိယာ အဟေတုကာ. ဆ ဣန္ဒြိယာ သိယာ သဟေတုကာ၊ သိယာ အဟေတုကာ. သတ္တိန္ဒြိယာ ဟေတုသမ္ပယုတ္တာ. နဝိန္ဒြိယာ ဟေတုဝိပ္ပယုတ္တာ. ဆ ဣန္ဒြိယာ သိယာ ဟေတုသမ္ပယုတ္တာ၊ သိယာ ဟေတုဝိပ္ပယုတ္တာ. စတ္တာရိန္ဒြိယာ ဟေတူ စေဝ သဟေတုကာ စ. နဝိန္ဒြိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိပိ၊ ‘‘သဟေတုကာ စေဝ န စ ဟေတူ’’တိပိ. တီဏိန္ဒြိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိ. သဟေတုကာ စေဝ န စ ဟေတူ. ဆ ဣန္ဒြိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိ၊ သိယာ သဟေတုကာ စေဝ န စ ဟေတူ၊ သိယာ န ဝတ္တဗ္ဗာ – ‘‘သဟေတုကာ စေဝ န စ ဟေတူ’’တိ.

စတ္တာရိန္ဒြိယာ ဟေတူ စေဝ ဟေတုသမ္ပယုတ္တာ စ. နဝိန္ဒြိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိပိ၊ ‘‘ဟေတုသမ္ပယုတ္တာ စေဝ န စ ဟေတူ’’တိပိ. တီဏိန္ဒြိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိ၊ ‘‘ဟေတုသမ္ပယုတ္တာ စေဝ န စ ဟေတူ’’. ဆ ဣန္ဒြိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိ၊ သိယာ ဟေတုသမ္ပယုတ္တာ စေဝ န စ ဟေတူ၊ သိယာ န ဝတ္တဗ္ဗာ – ‘‘ဟေတုသမ္ပယုတ္တာ စေဝ န စ ဟေတူ’’တိ.

နဝိန္ဒြိယာ န ဟေတူ အဟေတုကာ. တီဏိန္ဒြိယာ န ဟေတူ သဟေတုကာ. စတ္တာရိန္ဒြိယာ န ဝတ္တဗ္ဗာ – ‘‘န ဟေတူ သဟေတုကာ’’တိပိ၊ ‘‘န ဟေတူ အဟေတုကာ’’တိပိ. ဆ ဣန္ဒြိယာ သိယာ န ဟေတူ သဟေတုကာ၊ သိယာ န ဟေတူ အဟေတုကာ.

သပ္ပစ္စယာ. သင်္ခတာ. အနိဒဿနာ. ပဉ္စိန္ဒြိယာ သပ္ပဋိဃာ. သတ္တရသိန္ဒြိယာ အပ္ပဋိဃာ. သတ္တိန္ဒြိယာ ရူပါ. စုဒ္ဒသိန္ဒြိယာ အရူပါ. ဇီဝိတိန္ဒြိယံ သိယာ ရူပံ၊ သိယာ အရူပံ. ဒသိန္ဒြိယာ လောကိယာ. တီဏိန္ဒြိယာ လောကုတ္တရာ. နဝိန္ဒြိယာ သိယာ လောကိယာ၊ သိယာ လောကုတ္တရာ၊ ကေနစိ ဝိညေယျာ၊ ကေနစိ န ဝိညေယျာ.

နော အာသဝါ. ဒသိန္ဒြိယာ သာသဝါ. တီဏိန္ဒြိယာ အနာသဝါ. နဝိန္ဒြိယာ သိယာ သာသဝါ၊ သိယာ အနာသဝါ. ပန္နရသိန္ဒြိယာ အာသဝဝိပ္ပယုတ္တာ. ဒေါမနဿိန္ဒြိယံ အာသဝသမ္ပယုတ္တံ. ဆ ဣန္ဒြိယာ သိယာ အာသဝသမ္ပယုတ္တာ၊ သိယာ အာသဝဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ၊ ‘‘သာသဝါ စေဝ နော စ အာသဝါ’’. တီဏိန္ဒြိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိပိ၊ ‘‘သာသဝါ စေဝ နော စ အာသဝါ’’တိပိ. နဝိန္ဒြိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ၊ သိယာ သာသဝါ စေဝ နော စ အာသဝါ၊ သိယာ န ဝတ္တဗ္ဗာ – ‘‘သာသဝါ စေဝ နော စ အာသဝါ’’တိ.

ပန္နရသိန္ဒြိယာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိပိ၊ ‘‘အာသဝသမ္ပယုတ္တာ စေဝ နော စ အာသဝါ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘အာသဝေါ စေဝ အာသဝသမ္ပယုတ္တဉ္စာ’’တိ၊ ‘‘အာသဝသမ္ပယုတ္တဉ္စေဝ နော စ အာသဝေါ’’. ဆ ဣန္ဒြိယာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိ၊ သိယာ အာသဝသမ္ပယုတ္တာ စေဝ နော စ အာသဝါ၊ သိယာ န ဝတ္တဗ္ဗာ – ‘‘အာသဝသမ္ပယုတ္တာ စေဝ နော စ အာသဝါ’’တိ. နဝိန္ဒြိယာ အာသဝဝိပ္ပယုတ္တသာသဝါ. တီဏိန္ဒြိယာ အာသဝဝိပ္ပယုတ္တအနာသဝါ. ဒေါမနဿိန္ဒြိယံ န ဝတ္တဗ္ဗံ – ‘‘အာသဝဝိပ္ပယုတ္တသာသဝ’’န္တိပိ၊ ‘‘အာသဝဝိပ္ပယုတ္တအနာသဝ’’န္တိပိ. တီဏိန္ဒြိယာ သိယာ အာသဝဝိပ္ပယုတ္တသာသဝါ၊ သိယာ အာသဝဝိပ္ပယုတ္တအနာသဝါ. ဆ ဣန္ဒြိယာ သိယာ အာသဝဝိပ္ပယုတ္တသာသဝါ၊ သိယာ အာသဝဝိပ္ပယုတ္တအနာသဝါ၊ သိယာ န ဝတ္တဗ္ဗာ – ‘‘အာသဝဝိပ္ပယုတ္တသာသဝါ’’တိပိ၊ ‘‘အာသဝဝိပ္ပယုတ္တအနာသဝါ’’တိပိ.

နော သံယောဇနာ. ဒသိန္ဒြိယာ သံယောဇနိယာ. တီဏိန္ဒြိယာ အသံယောဇနိယာ. နဝိန္ဒြိယာ သိယာ သံယောဇနိယာ၊ သိယာ အသံယောဇနိယာ. ပန္နရသိန္ဒြိယာ သံယောဇနဝိပ္ပယုတ္တာ. ဒေါမနဿိန္ဒြိယံ သံယောဇနသမ္ပယုတ္တံ. ဆ ဣန္ဒြိယာ သိယာ သံယောဇနသမ္ပယုတ္တာ၊ သိယာ သံယောဇနဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ၊ သံယောဇနိယာ စေဝ နော စ သံယောဇနာ. တီဏိန္ဒြိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိပိ၊ ‘‘သံယောဇနိယာ စေဝ နော စ သံယောဇနာ’’တိပိ. နဝိန္ဒြိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ၊ သိယာ သံယောဇနိယာ စေဝ နော စ သံယောဇနာ၊ သိယာ န ဝတ္တဗ္ဗာ – ‘‘သံယောဇနိယာ စေဝ နော စ သံယောဇနာ’’တိ.

ပန္နရသိန္ဒြိယာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိပိ၊ ‘‘သံယောဇနသမ္ပယုတ္တာ စေဝ နော စ သံယောဇနာ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘သံယောဇနဉ္စေဝ သံယောဇနသမ္ပယုတ္တဉ္စာ’’တိ၊ သံယောဇနသမ္ပယုတ္တဉ္စေဝ နော စ သံယောဇနံ. ဆ ဣန္ဒြိယာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိ၊ သိယာ သံယောဇနသမ္ပယုတ္တာ စေဝ နော စ သံယောဇနာ၊ သိယာ န ဝတ္တဗ္ဗာ – ‘‘သံယောဇနသမ္ပယုတ္တာ စေဝ နော စ သံယောဇနာ’’တိ.

နဝိန္ဒြိယာ သံယောဇနဝိပ္ပယုတ္တသံယောဇနိယာ. တီဏိန္ဒြိယာ သံယောဇနဝိပ္ပယုတ္တအသံယောဇနိယာ. ဒေါမနဿိန္ဒြိယံ န ဝတ္တဗ္ဗံ – ‘‘သံယောဇနဝိပ္ပယုတ္တသံယောဇနိယ’’န္တိပိ၊ ‘‘သံယောဇနဝိပ္ပယုတ္တအသံယောဇနိယ’’န္တိပိ. တီဏိန္ဒြိယာ သိယာ သံယောဇနဝိပ္ပယုတ္တသံယောဇနိယာ၊ သိယာ သံယောဇနဝိပ္ပယုတ္တအသံယောဇနိယာ. ဆ ဣန္ဒြိယာ သိယာ သံယောဇနဝိပ္ပယုတ္တသံယောဇနိယာ၊ သိယာ သံယောဇနဝိပ္ပယုတ္တအသံယောဇနိယာ၊ သိယာ န ဝတ္တဗ္ဗာ – ‘‘သံယောဇနဝိပ္ပယုတ္တသံယောဇနိယာ’’တိပိ၊ ‘‘သံယောဇနဝိပ္ပယုတ္တအသံယောဇနိယာ’’တိပိ.

နော ဂန္ထာ. ဒသိန္ဒြိယာ ဂန္ထနိယာ. တီဏိန္ဒြိယာ အဂန္ထနိယာ. နဝိန္ဒြိယာ သိယာ ဂန္ထနိယာ၊ သိယာ အဂန္ထနိယာ. ပန္နရသိန္ဒြိယာ ဂန္ထဝိပ္ပယုတ္တာ. ဒေါမနဿိန္ဒြိယံ ဂန္ထသမ္ပယုတ္တံ. ဆ ဣန္ဒြိယာ သိယာ ဂန္ထသမ္ပယုတ္တာ၊ သိယာ ဂန္ထဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ၊ ဂန္ထနိယာ စေဝ နော စ ဂန္ထာ. တီဏိန္ဒြိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိပိ၊ ‘‘ဂန္ထနိယာ စေဝ နော စ ဂန္ထာ’’တိပိ. နဝိန္ဒြိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ၊ သိယာ ဂန္ထနိယာ စေဝ နော စ ဂန္ထာ၊ သိယာ န ဝတ္တဗ္ဗာ – ‘‘ဂန္ထနိယာ စေဝ နော စ ဂန္ထာ’’တိ.

ပန္နရသိန္ဒြိယာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိပိ၊ ‘‘ဂန္ထသမ္ပယုတ္တာ စေဝ နော စ ဂန္ထာ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တ’’ဉ္စာတိ၊ ဂန္ထသမ္ပယုတ္တဉ္စေဝ နော စ ဂန္ထော. ဆ ဣန္ဒြိယာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိ၊ သိယာ ဂန္ထသမ္ပယုတ္တာ စေဝ နော စ ဂန္ထာ၊ သိယာ န ဝတ္တဗ္ဗာ – ‘‘ဂန္ထသမ္ပယုတ္တာ စေဝ နော စ ဂန္ထာ’’တိ.

နဝိန္ဒြိယာ ဂန္ထဝိပ္ပယုတ္တဂန္ထနိယာ. တီဏိန္ဒြိယာ ဂန္ထဝိပ္ပယုတ္တအဂန္ထနိယာ. ဒေါမနဿိန္ဒြိယံ န ဝတ္တဗ္ဗံ – ‘‘ဂန္ထဝိပ္ပယုတ္တဂန္ထနိယ’’န္တိပိ၊ ‘‘ဂန္ထဝိပ္ပယုတ္တအဂန္ထနိယ’’န္တိပိ. တီဏိန္ဒြိယာ သိယာ ဂန္ထဝိပ္ပယုတ္တဂန္ထနိယာ၊ သိယာ ဂန္ထဝိပ္ပယုတ္တအဂန္ထနိယာ. ဆ ဣန္ဒြိယာ သိယာ ဂန္ထဝိပ္ပယုတ္တဂန္ထနိယာ၊ သိယာ ဂန္ထဝိပ္ပယုတ္တအဂန္ထနိယာ၊ သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ၊ ‘‘ဂန္ထဝိပ္ပယုတ္တအဂန္ထနိယာ’’တိပိ.

နော ဩဃာ။ပေ။ နော ယောဂါ။ပေ။ နော နီဝရဏာ. ဒသိန္ဒြိယာ နီဝရဏိယာ. တီဏိန္ဒြိယာ အနီဝရဏိယာ. နဝိန္ဒြိယာ သိယာ နီဝရဏိယာ၊ သိယာ အနီဝရဏိယာ. ပန္နရသိန္ဒြိယာ နီဝရဏဝိပ္ပယုတ္တာ. ဒေါမနဿိန္ဒြိယံ နီဝရဏသမ္ပယုတ္တံ. ဆ ဣန္ဒြိယာ သိယာ နီဝရဏသမ္ပယုတ္တာ၊ သိယာ နီဝရဏဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ၊ နီဝရဏိယာ စေဝ နော စ နီဝရဏာ. တီဏိန္ဒြိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိပိ၊ ‘‘နီဝရဏိယာ စေဝ နော စ နီဝရဏာ’’တိပိ. နဝိန္ဒြိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ၊ သိယာ နီဝရဏိယာ စေဝ နော စ နီဝရဏာ၊ သိယာ န ဝတ္တဗ္ဗာ – ‘‘နီဝရဏိယာ စေဝ နော စ နီဝရဏာ’’တိ.

ပန္နရသိန္ဒြိယာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိပိ၊ ‘‘နီဝရဏသမ္ပယုတ္တာ စေဝ နော စ နီဝရဏာ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘နီဝရဏဉ္စေဝ နီဝရဏသမ္ပယုတ္တဉ္စာ’’တိ၊ နီဝရဏသမ္ပယုတ္တဉ္စေဝ နော စ နီဝရဏံ. ဆ ဣန္ဒြိယာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိ၊ သိယာ နီဝရဏသမ္ပယုတ္တာ စေဝ နော စ နီဝရဏာ၊ သိယာ န ဝတ္တဗ္ဗာ – ‘‘နီဝရဏသမ္ပယုတ္တာ စေဝ နော စ နီဝရဏာ’’တိ.

နဝိန္ဒြိယာ နီဝရဏဝိပ္ပယုတ္တနီဝရဏိယာ. တီဏိန္ဒြိယာ နီဝရဏဝိပ္ပယုတ္တအနီဝရဏိယာ. ဒေါမနဿိန္ဒြိယံ န ဝတ္တဗ္ဗံ – ‘‘နီဝရဏဝိပ္ပယုတ္တနီဝရဏိယ’’န္တိပိ၊ ‘‘နီဝရဏဝိပ္ပယုတ္တအနီဝရဏိယ’’န္တိပိ. တီဏိန္ဒြိယာ သိယာ နီဝရဏဝိပ္ပယုတ္တနီဝရဏိယာ၊ သိယာ နီဝရဏဝိပ္ပယုတ္တအနီဝရဏိယာ. ဆ ဣန္ဒြိယာ သိယာ နီဝရဏဝိပ္ပယုတ္တနီဝရဏိယာ၊ သိယာ နီဝရဏဝိပ္ပယုတ္တအနီဝရဏိယာ၊ သိယာ န ဝတ္တဗ္ဗာ – ‘‘နီဝရဏဝိပ္ပယုတ္တနီဝရဏိယာ’’တိပိ၊ ‘‘နီဝရဏဝိပ္ပယုတ္တအနီဝရဏိယာ’’တိပိ.

နော ပရာမာသာ. ဒသိန္ဒြိယာ ပရာမဋ္ဌာ. တီဏိန္ဒြိယာ အပရာမဋ္ဌာ. နဝိန္ဒြိယာ သိယာ ပရာမဋ္ဌာ၊ သိယာ အပရာမဋ္ဌာ. သောဠသိန္ဒြိယာ ပရာမာသဝိပ္ပယုတ္တာ. ဆ ဣန္ဒြိယာ သိယာ ပရာမာသသမ္ပယုတ္တာ၊ သိယာ ပရာမာသဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ၊ ပရာမဋ္ဌာ စေဝ နော စ ပရာမာသာ. တီဏိန္ဒြိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိပိ၊ ‘‘ပရာမဋ္ဌာ စေဝ နော စ ပရာမာသာ’’တိပိ. နဝိန္ဒြိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ၊ သိယာ ပရာမဋ္ဌာ စေဝ နော စ ပရာမာသာ၊ သိယာ န ဝတ္တဗ္ဗာ – ‘‘ပရာမဋ္ဌာ စေဝ နော စ ပရာမာသာ’’တိ. ဒသိန္ဒြိယာ ပရာမာသဝိပ္ပယုတ္တပရာမဋ္ဌာ. တီဏိန္ဒြိယာ ပရာမာသဝိပ္ပယုတ္တအပရာမဋ္ဌာ. တီဏိန္ဒြိယာ သိယာ ပရာမာသဝိပ္ပယုတ္တပရာမဋ္ဌာ၊ သိယာ ပရာမာသဝိပ္ပယုတ္တအပရာမဋ္ဌာ. ဆ ဣန္ဒြိယာ သိယာ ပရာမာသဝိပ္ပယုတ္တပရာမဋ္ဌာ၊ သိယာ ပရာမာသဝိပ္ပယုတ္တအပရာမဋ္ဌာ၊ သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ၊ ‘‘ပရာမာသဝိပ္ပယုတ္တအပရာမဋ္ဌာ’’တိပိ.

သတ္တိန္ဒြိယာ အနာရမ္မဏာ. စုဒ္ဒသိန္ဒြိယာ သာရမ္မဏာ. ဇီဝိတိန္ဒြိယံ သိယာ သာရမ္မဏံ၊ သိယာ အနာရမ္မဏံ. ဧကဝီသတိန္ဒြိယာ နော စိတ္တာ. မနိန္ဒြိယံ စိတ္တံ. တေရသိန္ဒြိယာ စေတသိကာ. အဋ္ဌိန္ဒြိယာ အစေတသိကာ. ဇီဝိတိန္ဒြိယံ သိယာ စေတသိကံ၊ သိယာ အစေတသိကံ. တေရသိန္ဒြိယာ စိတ္တသမ္ပယုတ္တာ. သတ္တိန္ဒြိယာ စိတ္တဝိပ္ပယုတ္တာ. ဇီဝိတိန္ဒြိယံ သိယာ စိတ္တသမ္ပယုတ္တံ၊ သိယာ စိတ္တဝိပ္ပယုတ္တံ. မနိန္ဒြိယံ န ဝတ္တဗ္ဗံ – ‘‘စိတ္တေန သမ္ပယုတ္တ’’န္တိပိ၊ ‘‘စိတ္တေန ဝိပ္ပယုတ္တ’’န္တိပိ.

တေရသိန္ဒြိယာ စိတ္တသံသဋ္ဌာ. သတ္တိန္ဒြိယာ စိတ္တဝိသံသဋ္ဌာ. ဇီဝိတိန္ဒြိယံ သိယာ စိတ္တသံသဋ္ဌံ၊ သိယာ စိတ္တဝိသံသဋ္ဌံ. မနိန္ဒြိယံ န ဝတ္တဗ္ဗံ – ‘‘စိတ္တေန သံသဋ္ဌ’’န္တိပိ၊ ‘‘စိတ္တေန ဝိသံသဋ္ဌ’’န္တိပိ. တေရသိန္ဒြိယာ စိတ္တသမုဋ္ဌာနာ. အဋ္ဌိန္ဒြိယာ နော စိတ္တသမုဋ္ဌာနာ. ဇီဝိတိန္ဒြိယံ သိယာ စိတ္တသမုဋ္ဌာနံ၊ သိယာ နော စိတ္တသမုဋ္ဌာနံ.

တေရသိန္ဒြိယာ စိတ္တသဟဘုနော. အဋ္ဌိန္ဒြိယာ နော စိတ္တသဟဘုနော. ဇီဝိတိန္ဒြိယံ သိယာ စိတ္တသဟဘူ၊ သိယာ နော စိတ္တသဟဘူ. တေရသိန္ဒြိယာ စိတ္တာနုပရိဝတ္တိနော. အဋ္ဌိန္ဒြိယာ နော စိတ္တာနုပရိဝတ္တိနော. ဇီဝိတိန္ဒြိယံ သိယာ စိတ္တာနုပရိဝတ္တိ၊ သိယာ နော စိတ္တာနုပရိဝတ္တိ.

တေရသိန္ဒြိယာ စိတ္တသံသဋ္ဌသမုဋ္ဌာနာ. အဋ္ဌိန္ဒြိယာ နော စိတ္တသံသဋ္ဌသမုဋ္ဌာနာ. ဇီဝိတိန္ဒြိယံ သိယာ စိတ္တသံသဋ္ဌသမုဋ္ဌာနံ၊ သိယာ နော စိတ္တသံသဋ္ဌသမုဋ္ဌာနံ. တေရသိန္ဒြိယာ စိတ္တသံသဋ္ဌသမုဋ္ဌာနသဟဘုနော. အဋ္ဌိန္ဒြိယာ နော စိတ္တသံသဋ္ဌသမုဋ္ဌာနသဟဘုနော. ဇီဝိတိန္ဒြိယံ သိယာ စိတ္တသံသဋ္ဌသမုဋ္ဌာနသဟဘူ၊ သိယာ နော စိတ္တသံသဋ္ဌသမုဋ္ဌာနသဟဘူ. တေရသိန္ဒြိယာ စိတ္တသံသဋ္ဌသမုဋ္ဌာနာနုပရိဝတ္တိနော. အဋ္ဌိန္ဒြိယာ နော စိတ္တသံသဋ္ဌသမုဋ္ဌာနာနုပရိဝတ္တိနော. ဇီဝိတိန္ဒြိယံ သိယာ စိတ္တသံသဋ္ဌသမုဋ္ဌာနာနုပရိဝတ္တိ၊ သိယာ နော စိတ္တသံသဋ္ဌသမုဋ္ဌာနာနုပရိဝတ္တိ. ဆ ဣန္ဒြိယာ အဇ္ဈတ္တိကာ. သောဠသိန္ဒြိယာ ဗာဟိရာ.

သတ္တိန္ဒြိယာ ဥပါဒါ. စုဒ္ဒသိန္ဒြိယာ နော ဥပါဒါ. ဇီဝိတိန္ဒြိယံ သိယာ ဥပါဒါ၊ သိယာ နော ဥပါဒါ. နဝိန္ဒြိယာ ဥပါဒိန္နာ. စတ္တာရိန္ဒြိယာ အနုပါဒိန္နာ. နဝိန္ဒြိယာ သိယာ ဥပါဒိန္နာ၊ သိယာ အနုပါဒိန္နာ. နော ဥပါဒါနာ. ဒသိန္ဒြိယာ ဥပါဒါနိယာ. တီဏိန္ဒြိယာ အနုပါဒါနိယာ. နဝိန္ဒြိယာ သိယာ ဥပါဒါနိယာ၊ သိယာ အနုပါဒါနိယာ. သောဠသိန္ဒြိယာ ဥပါဒါနဝိပ္ပယုတ္တာ. ဆ ဣန္ဒြိယာ သိယာ ဥပါဒါနသမ္ပယုတ္တာ၊ သိယာ ဥပါဒါနဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ၊ ဥပါဒါနိယာ စေဝ နော စ ဥပါဒါနာ. တီဏိန္ဒြိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိပိ၊ ‘‘ဥပါဒါနိယာ စေဝ နော စ ဥပါဒါနာ’’တိပိ. နဝိန္ဒြိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ၊ သိယာ ဥပါဒါနိယာ စေဝ နော စ ဥပါဒါနာ. ဒသိန္ဒြိယာ သိယာ ဥပါဒါနိယာ စေဝ နော စ ဥပါဒါနာ၊ သိယာ န ဝတ္တဗ္ဗာ – ‘‘ဥပါဒါနိယာ စေဝ နော စ ဥပါဒါနာ’’တိ.

သောဠသိန္ဒြိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိပိ၊ ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိပိ. ဆ ဣန္ဒြိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိ၊ သိယာ ဥပါဒါနသမ္ပယုတ္တာ စေဝ နော စ ဥပါဒါနာ၊ သိယာ န ဝတ္တဗ္ဗာ – ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိ. ဒသိန္ဒြိယာ ဥပါဒါနဝိပ္ပယုတ္တဥပါဒါနိယာ. တီဏိန္ဒြိယာ ဥပါဒါနဝိပ္ပယုတ္တအနုပါဒါနိယာ. တီဏိန္ဒြိယာ သိယာ ဥပါဒါနဝိပ္ပယုတ္တဥပါဒါနိယာ၊ သိယာ ဥပါဒါနဝိပ္ပယုတ္တအနုပါဒါနိယာ. ဆ ဣန္ဒြိယာ သိယာ ဥပါဒါနဝိပ္ပယုတ္တဥပါဒါနိယာ၊ သိယာ ဥပါဒါနဝိပ္ပယုတ္တအနုပါဒါနိယာ၊ သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ၊ ‘‘ဥပါဒါနဝိပ္ပယုတ္တအနုပါဒါနိယာ’’တိပိ.

နော ကိလေသာ. ဒသိန္ဒြိယာ သံကိလေသိကာ. တီဏိန္ဒြိယာ အသံကိလေသိကာ. နဝိန္ဒြိယာ သိယာ သံကိလေသိကာ၊ သိယာ အသံကိလေသိကာ. ပန္နရသိန္ဒြိယာ အသံကိလိဋ္ဌာ. ဒေါမနဿိန္ဒြိယံ သံကိလိဋ္ဌံ. ဆ ဣန္ဒြိယာ သိယာ သံကိလိဋ္ဌာ၊ သိယာ အသံကိလိဋ္ဌာ. ပန္နရသိန္ဒြိယာ ကိလေသဝိပ္ပယုတ္တာ. ဒေါမနဿိန္ဒြိယံ ကိလေသသမ္ပယုတ္တံ. ဆ ဣန္ဒြိယာ သိယာ ကိလေသသမ္ပယုတ္တာ၊ သိယာ ကိလေသဝိပ္ပယုတ္တာ. ဒသိန္ဒြိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ၊ သံကိလေသိကာ စေဝ နော စ ကိလေသာ. တီဏိန္ဒြိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိပိ၊ ‘‘သံကိလေသိကာ စေဝ နော စ ကိလေသာ’’တိပိ. နဝိန္ဒြိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ၊ သိယာ သံကိလေသိကာ စေဝ နော စ ကိလေသာ၊ သိယာ န ဝတ္တဗ္ဗာ – ‘‘သံကိလေသိကာ စေဝ နော စ ကိလေသာ’’တိ.

ပန္နရသိန္ဒြိယာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိပိ၊ ‘‘သံကိလိဋ္ဌာ စေဝ နော စ ကိလေသာ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘ကိလေသော စေဝ သံကိလိဋ္ဌဉ္စာ’’တိ၊ သံကိလိဋ္ဌဉ္စေဝ နော စ ကိလေသော. ဆ ဣန္ဒြိယာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိ၊ သိယာ သံကိလိဋ္ဌာ စေဝ နော စ ကိလေသာ၊ သိယာ န ဝတ္တဗ္ဗာ – ‘‘သံကိလိဋ္ဌာ စေဝ နော စ ကိလေသာ’’တိ.

ပန္နရသိန္ဒြိယာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိပိ၊ ‘‘ကိလေသသမ္ပယုတ္တာ စေဝ နော စ ကိလေသာ’’တိပိ. ဒေါမနဿိန္ဒြိယံ န ဝတ္တဗ္ဗံ – ‘‘ကိလေသော စေဝ ကိလေသသမ္ပယုတ္တဉ္စာ’’တိ၊ ကိလေသသမ္ပယုတ္တဉ္စေဝ နော စ ကိလေသော. ဆ ဣန္ဒြိယာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိ၊ သိယာ ကိလေသသမ္ပယုတ္တာ စေဝ နော စ ကိလေသာ၊ သိယာ န ဝတ္တဗ္ဗာ – ‘‘ကိလေသသမ္ပယုတ္တာ စေဝ နော စ ကိလေသာ’’တိ. နဝိန္ဒြိယာ ကိလေသဝိပ္ပယုတ္တသံကိလေသိကာ. တီဏိန္ဒြိယာ ကိလေသဝိပ္ပယုတ္တအသံကိလေသိကာ. ဒေါမနဿိန္ဒြိယံ န ဝတ္တဗ္ဗံ – ‘‘ကိလေသဝိပ္ပယုတ္တသံကိလေသိက’’န္တိပိ၊ ‘‘ကိလေသဝိပ္ပယုတ္တအသံကိလေသိက’’န္တိပိ. တီဏိန္ဒြိယာ သိယာ ကိလေသဝိပ္ပယုတ္တသံကိလေသိကာ၊ သိယာ ကိလေသဝိပ္ပယုတ္တအသံကိလေသိကာ. ဆ ဣန္ဒြိယာ သိယာ ကိလေသဝိပ္ပယုတ္တသံကိလေသိကာ၊ သိယာ ကိလေသဝိပ္ပယုတ္တအသံကိလေသိကာ၊ သိယာ န ဝတ္တဗ္ဗာ – ‘‘ကိလေသဝိပ္ပယုတ္တသံကိလေသိကာ’’တိပိ၊ ‘‘ကိလေသဝိပ္ပယုတ္တအသံကိလေသိကာ’’တိပိ.

ပန္နရသိန္ဒြိယာ န ဒဿနေန ပဟာတဗ္ဗာ. သတ္တိန္ဒြိယာ သိယာ ဒဿနေန ပဟာတဗ္ဗာ၊ သိယာ န ဒဿနေန ပဟာတဗ္ဗာ. ပန္နရသိန္ဒြိယာ န ဘာဝနာယ ပဟာတဗ္ဗာ. သတ္တိန္ဒြိယာ သိယာ ဘာဝနာယ ပဟာတဗ္ဗာ၊ သိယာ န ဘာဝနာယ ပဟာတဗ္ဗာ. ပန္နရသိန္ဒြိယာ န ဒဿနေန ပဟာတဗ္ဗဟေတုကာ. သတ္တိန္ဒြိယာ သိယာ ဒဿနေန ပဟာတဗ္ဗဟေတုကာ၊ သိယာ န ဒဿနေန ပဟာတဗ္ဗဟေတုကာ. ပန္နရသိန္ဒြိယာ န ဘာဝနာယ ပဟာတဗ္ဗဟေတုကာ. သတ္တိန္ဒြိယာ သိယာ ဘာဝနာယ ပဟာတဗ္ဗဟေတုကာ၊ သိယာ န ဘာဝနာယ ပဟာတဗ္ဗဟေတုကာ.

နဝိန္ဒြိယာ အဝိတက္ကာ. ဒေါမနဿိန္ဒြိယံ သဝိတက္ကံ. ဒွါဒသိန္ဒြိယာ သိယာ သဝိတက္ကာ၊ သိယာ အဝိတက္ကာ. နဝိန္ဒြိယာ အဝိစာရာ. ဒေါမနဿိန္ဒြိယံ သဝိစာရံ. ဒွါဒသိန္ဒြိယာ သိယာ သဝိစာရာ၊ သိယာ အဝိစာရာ. ဧကာဒသိန္ဒြိယာ အပ္ပီတိကာ. ဧကာဒသိန္ဒြိယာ သိယာ သပ္ပီတိကာ၊ သိယာ အပ္ပီတိကာ. ဧကာဒသိန္ဒြိယာ န ပီတိသဟဂတာ. ဧကာဒသိန္ဒြိယာ သိယာ ပီတိသဟဂတာ၊ သိယာ န ပီတိသဟဂတာ. ဒွါဒသိန္ဒြိယာ န သုခသဟဂတာ. ဒသိန္ဒြိယာ သိယာ သုခသဟဂတာ၊ သိယာ န သုခသဟဂတာ. ဒွါဒသိန္ဒြိယာ န ဥပေက္ခာသဟဂတာ. ဒသိန္ဒြိယာ သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ.

ဒသိန္ဒြိယာ ကာမာဝစရာ. တီဏိန္ဒြိယာ န ကာမာဝစရာ. နဝိန္ဒြိယာ သိယာ ကာမာဝစရာ၊ သိယာ န ကာမာဝစရာ. တေရသိန္ဒြိယာ န ရူပါဝစရာ. နဝိန္ဒြိယာ သိယာ ရူပါဝစရာ၊ သိယာ န ရူပါဝစရာ. စုဒ္ဒသိန္ဒြိယာ န အရူပါဝစရာ. အဋ္ဌိန္ဒြိယာ သိယာ အရူပါဝစရာ၊ သိယာ န အရူပါဝစရာ. ဒသိန္ဒြိယာ ပရိယာပန္နာ. တီဏိန္ဒြိယာ အပရိယာပန္နာ. နဝိန္ဒြိယာ သိယာ ပရိယာပန္နာ၊ သိယာ အပရိယာပန္နာ. ဧကာဒသိန္ဒြိယာ အနိယျာနိကာ. အနညာတညဿာမီတိန္ဒြိယံ နိယျာနိကံ. ဒသိန္ဒြိယာ သိယာ နိယျာနိကာ၊ သိယာ အနိယျာနိကာ. ဒသိန္ဒြိယာ အနိယတာ. အနညာတညဿာမီတိန္ဒြိယံ နိယတံ. ဧကာဒသိန္ဒြိယာ သိယာ နိယတာ၊ သိယာ အနိယတာ. ဒသိန္ဒြိယာ သဥတ္တရာ. တီဏိန္ဒြိယာ အနုတ္တရာ. နဝိန္ဒြိယာ သိယာ သဥတ္တရာ၊ သိယာ အနုတ္တရာ. ပန္နရသိန္ဒြိယာ အရဏာ. ဒေါမနဿိန္ဒြိယံ သရဏံ. ဆ ဣန္ဒြိယာ သိယာ သရဏာ၊ သိယာ အရဏာတိ.

ပဉှာပုစ္ဆကံ.

ဣန္ဒြိယဝိဘင်္ဂေါ နိဋ္ဌိတော.