၁. အဘိဓမ္မဘာဇနီယံ

၂၁၉. ဗာဝီသတိန္ဒြိယာနိ – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ မနိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ သုခိန္ဒြိယံ၊ ဒုက္ခိန္ဒြိယံ၊ သောမနဿိန္ဒြိယံ၊ ဒေါမနဿိန္ဒြိယံ၊ ဥပေက္ခိန္ဒြိယံ၊ သဒ္ဓိန္ဒြိယံ၊ ဝီရိယိန္ဒြိယံ [ဝိရိယိန္ဒြိယံ (သီ. သျာ.)]၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ အနညာတညဿာမီတိန္ဒြိယံ၊ အညိန္ဒြိယံ၊ အညာတာဝိန္ဒြိယံ.

၂၂၀. တတ္ထ ကတမံ စက္ခုန္ဒြိယံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – ဣဒံ ဝုစ္စတိ ‘‘စက္ခုန္ဒြိယံ’’.

တတ္ထ ကတမံ သောတိန္ဒြိယံ။ပေ။ ဃာနိန္ဒြိယံ။ပေ။ ဇိဝှိန္ဒြိယံ။ပေ။ ကာယိန္ဒြိယံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – ဣဒံ ဝုစ္စတိ ‘‘ကာယိန္ဒြိယံ’’.

တတ္ထ ကတမံ မနိန္ဒြိယံ? ဧကဝိဓေန မနိန္ဒြိယံ – ဖဿသမ္ပယုတ္တံ. ဒုဝိဓေန မနိန္ဒြိယံ – အတ္ထိ သဟေတုကံ၊ အတ္ထိ အဟေတုကံ. တိဝိဓေန မနိန္ဒြိယံ – အတ္ထိ ကုသလံ၊ အတ္ထိ အကုသလံ၊ အတ္ထိ အဗျာကတံ. စတုဗ္ဗိဓေန မနိန္ဒြိယံ – အတ္ထိ ကာမာဝစရံ၊ အတ္ထိ ရူပါဝစရံ၊ အတ္ထိ အရူပါဝစရံ၊ အတ္ထိ အပရိယာပန္နံ. ပဉ္စဝိဓေန မနိန္ဒြိယံ – အတ္ထိ သုခိန္ဒြိယသမ္ပယုတ္တံ၊ အတ္ထိ ဒုက္ခိန္ဒြိယသမ္ပယုတ္တံ၊ အတ္ထိ သောမနဿိန္ဒြိယသမ္ပယုတ္တံ၊ အတ္ထိ ဒေါမနဿိန္ဒြိယသမ္ပယုတ္တံ၊ အတ္ထိ ဥပေက္ခိန္ဒြိယသမ္ပယုတ္တံ. ဆဗ္ဗိဓေန မနိန္ဒြိယံ – စက္ခုဝိညာဏံ။ပေ။ မနောဝိညာဏံ. ဧဝံ ဆဗ္ဗိဓေန မနိန္ဒြိယံ.

သတ္တဝိဓေန မနိန္ဒြိယံ – စက္ခုဝိညာဏံ။ပေ။ ကာယဝိညာဏံ၊ မနောဓာတု၊ မနောဝိညာဏဓာတု. ဧဝံ သတ္တဝိဓေန မနိန္ဒြိယံ.

အဋ္ဌဝိဓေန မနိန္ဒြိယံ – စက္ခုဝိညာဏံ။ပေ။ ကာယဝိညာဏံ အတ္ထိ သုခသဟဂတံ၊ အတ္ထိ ဒုက္ခသဟဂတံ၊ မနောဓာတု၊ မနောဝိညာဏဓာတု. ဧဝံ အဋ္ဌဝိဓေန မနိန္ဒြိယံ.

နဝဝိဓေန မနိန္ဒြိယံ – စက္ခုဝိညာဏံ။ပေ။ ကာယဝိညာဏံ၊ မနောဓာတု၊ မနောဝိညာဏဓာတု အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ နဝဝိဓေန မနိန္ဒြိယံ.

ဒသဝိဓေန မနိန္ဒြိယံ – စက္ခုဝိညာဏံ။ပေ။ ကာယဝိညာဏံ အတ္ထိ သုခသဟဂတံ၊ အတ္ထိ ဒုက္ခသဟဂတံ၊ မနောဓာတု၊ မနောဝိညာဏဓာတု အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ ဒသဝိဓေန မနိန္ဒြိယံ။ပေ။ ဧဝံ ဗဟုဝိဓေန မနိန္ဒြိယံ. ဣဒံ ဝုစ္စတိ ‘‘မနိန္ဒြိယံ’’.

တတ္ထ ကတမံ ဣတ္ထိန္ဒြိယံ? ယံ ဣတ္ထိယာ ဣတ္ထိလိင်္ဂံ ဣတ္ထိနိမိတ္တံ ဣတ္ထိကုတ္တံ ဣတ္ထာကပ္ပေါ ဣတ္ထတ္တံ ဣတ္ထိဘာဝေါ – ဣဒံ ဝုစ္စတိ ‘‘ဣတ္ထိန္ဒြိယံ’’.

တတ္ထ ကတမံ ပုရိသိန္ဒြိယံ? ယံ ပုရိသဿ ပုရိသလိင်္ဂံ ပုရိသနိမိတ္တံ ပုရိသကုတ္တံ ပုရိသာကပ္ပေါ ပုရိသတ္တံ ပုရိသဘာဝေါ – ဣဒံ ဝုစ္စတိ ‘‘ပုရိသိန္ဒြိယံ’’.

တတ္ထ ကတမံ ဇီဝိတိန္ဒြိယံ? ဇီဝိတိန္ဒြိယံ ဒုဝိဓေန – အတ္ထိ ရူပဇီဝိတိန္ဒြိယံ၊ အတ္ထိ အရူပဇီဝိတိန္ဒြိယံ.

တတ္ထ ကတမံ ရူပဇီဝိတိန္ဒြိယံ? ယော တေသံ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ ဝုစ္စတိ ‘‘ရူပဇီဝိတိန္ဒြိယံ’’.

တတ္ထ ကတမံ အရူပဇီဝိတိန္ဒြိယံ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ ဝုစ္စတိ ‘‘အရူပဇီဝတိန္ဒြိယံ’’. ဣဒံ ဝုစ္စတိ ‘‘ဇီဝိတိန္ဒြိယံ’’.

တတ္ထ ကတမံ သုခိန္ဒြိယံ? ယံ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – ဣဒံ ဝုစ္စတိ ‘‘သုခိန္ဒြိယံ’’.

တတ္ထ ကတမံ ဒုက္ခိန္ဒြိယံ? ယံ ကာယိကံ အသာတံ ကာယိကံ ဒုက္ခံ ကာယသမ္ဖဿဇံ အသာတံ ဒုက္ခံ ဝေဒယိတံ ကာယသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒုက္ခိန္ဒြိယံ’’.

တတ္ထ ကတမံ သောမနဿိန္ဒြိယံ? ယံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ ဝုစ္စတိ ‘‘သောမနဿိန္ဒြိယံ’’.

တတ္ထ ကတမံ ဒေါမနဿိန္ဒြိယံ? ယံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒေါမနဿိန္ဒြိယံ’’.

တတ္ထ ကတမံ ဥပေက္ခိန္ဒြိယံ? ယံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ ဝုစ္စတိ ‘‘ဥပေက္ခိန္ဒြိယံ’’.

တတ္ထ ကတမံ သဒ္ဓိန္ဒြိယံ? ယာ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒြိယံ သဒ္ဓါဗလံ – ဣဒံ ဝုစ္စတိ ‘‘သဒ္ဓိန္ဒြိယံ’’.

တတ္ထ ကတမံ ဝီရိယိန္ဒြိယံ? ယော စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဌိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ – ဣဒံ ဝုစ္စတိ ‘‘ဝီရိယိန္ဒြိယံ’’.

တတ္ထ ကတမံ သတိန္ဒြိယံ? ယာ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – ဣဒံ ဝုစ္စတိ ‘‘သတိန္ဒြိယံ’’.

တတ္ထ ကတမံ သမာဓိန္ဒြိယံ? ယာ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – ဣဒံ ဝုစ္စတိ ‘‘သမာဓိန္ဒြိယံ’’.

တတ္ထ ကတမံ ပညိန္ဒြိယံ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ပညိန္ဒြိယံ’’.

တတ္ထ ကတမံ အနညာတညဿာမီတိန္ဒြိယံ? ယာ တေသံ ဓမ္မာနံ အနညာတာနံ အဒိဋ္ဌာနံ အပ္ပတ္တာနံ အဝိဒိတာနံ အသစ္ဆိကတာနံ သစ္ဆိကိရိယာယ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ ‘‘အနညာတညဿာမီတိန္ဒြိယံ’’.

တတ္ထ ကတမံ အညိန္ဒြိယံ? ယာ တေသံ ဓမ္မာနံ ဉာတာနံ ဒိဋ္ဌာနံ ပတ္တာနံ ဝိဒိတာနံ သစ္ဆိကတာနံ သစ္ဆိကိရိယာယ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ အညိန္ဒြိယံ.

တတ္ထ ကတမံ အညာတာဝိန္ဒြိယံ? ယာ တေသံ ဓမ္မာနံ အညာတာဝီနံ ဒိဋ္ဌာနံ ပတ္တာနံ ဝိဒိတာနံ သစ္ဆိကတာနံ သစ္ဆိကိရိယာယ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ ‘‘အညာတာဝိန္ဒြိယံ’’.

အဘိဓမ္မဘာဇနီယံ.