၁. ဥပ္ပါဒကကမ္မံ

၁၀၂၁. ဒေဝါတိ. တယော ဒေဝါ – သမ္မုတိဒေဝါ [သမ္မတိဒေဝါ (သျာ.)]၊ ဥပပတ္တိဒေဝါ၊ ဝိသုဒ္ဓိဒေဝါ.

သမ္မုတိဒေဝါ နာမ – ရာဇာနော၊ ဒေဝိယော၊ ကုမာရာ.

ဥပပတ္တိဒေဝါ နာမ – စာတုမဟာရာဇိကေ [စာတုမ္မဟာရာဇိကေ (သီ. သျာ.)] ဒေဝေ ဥပါဒါယ တဒုပရိ ဒေဝါ.

ဝိသုဒ္ဓိဒေဝါ နာမ – အရဟန္တော ဝုစ္စန္တိ.

ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ ကတ္ထ ဥပပဇ္ဇန္တိ? ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ အပ္ပေကစ္စေ ခတ္တိယမဟာသာလာနံ သဟဗျတံ ဥပပဇ္ဇန္တိ၊ အပ္ပေကစ္စေ ဗြာဟ္မဏမဟာသာလာနံ သဟဗျတံ ဥပပဇ္ဇန္တိ၊ အပ္ပေကစ္စေ ဂဟပတိမဟာသာလာနံ သဟဗျတံ ဥပပဇ္ဇန္တိ၊ အပ္ပေကစ္စေ စာတုမဟာရာဇိကာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ တာဝတိံသာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ ယာမာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ တုသိတာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ နိမ္မာနရတီနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ ပရနိမ္မိတဝသဝတ္တီနံ ဒေဝါနံ သဟဗျတံ ဥပပဇ္ဇန္တိ.