၂. အာယုပ္ပမာဏံ

၁၀၂၂. မနုဿာနံ ကိတ္တကံ အာယုပ္ပမာဏံ? ဝဿသတံ၊ အပ္ပံ ဝါ ဘိယျော [အပ္ပံ ဝါ ဘိယျော ဝါ (သျာ. က.) ဒီ. နိ. ၂.၇].

၁၀၂၃. စာတုမဟာရာဇိကာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ ပညာသ ဝဿာနိ၊ စာတုမ္မဟာရာဇိကာနံ ဒေဝါနံ ဧသော ဧကော ရတ္တိန္ဒိဝေါ [ရတ္တိဒိဝေါ (က.) အ. နိ. ၃.၇၁]. တာယ ရတ္တိယာ တိံသ ရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗာနိ ပဉ္စ ဝဿသတာနိ စာတုမ္မဟာရာဇိကာနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? နဝုတိ ဝဿသတသဟဿာနိ.

တာဝတိံသာနံ ဒေဝါနံ ကိတ္တကံ အာယုပ္ပမာဏံ? ယံ မာနုသကံ ဝဿသတံ၊ တာဝတိံသာနံ ဒေဝါနံ ဧသော ဧကော ရတ္တိန္ဒိဝေါ. တာယ ရတ္တိယာ တိံသ ရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗံ ဝဿသဟဿံ တာဝတိံသာနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? တိဿော စ ဝဿကောဋိယော သဋ္ဌိ စ ဝဿသတသဟဿာနိ.

ယာမာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ ဒွေ ဝဿသတာနိ၊ ယာမာနံ ဒေဝါနံ ဧသော ဧကော ရတ္တိန္ဒိဝေါ. တာယ ရတ္တိယာ တိံသရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗာနိ ဒွေ ဝဿသဟဿာနိ ယာမာနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? စုဒ္ဒသဉ္စ ဝဿကောဋိယော စတ္တာရီသဉ္စ ဝဿသတသဟဿာနိ.

တုသိတာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ စတ္တာရိ ဝဿသတာနိ၊ တုသိတာနံ ဒေဝါနံ ဧသော ဧကော ရတ္တိန္ဒိဝေါ. တာယ ရတ္တိယာ တိံသရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗာနိ စတ္တာရိ ဝဿသဟဿာနိ တုသိတာနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? သတ္တပညာသ ဝဿကောဋိယော သဋ္ဌိ စ ဝဿသတသဟဿာနိ.

နိမ္မာနရတီနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ အဋ္ဌ ဝဿသတာနိ၊ နိမ္မာနရတီနံ ဒေဝါနံ ဧသော ဧကော ရတ္တိန္ဒိဝေါ. တာယ ရတ္တိယာ တိံသရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗာနိ အဋ္ဌ ဝဿသဟဿာနိ နိမ္မာနရတီနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? ဒွေ ဝဿကောဋိသတာနိ တိံသဉ္စ ဝဿကောဋိယော စတ္တာရီသဉ္စ ဝဿသတသဟဿာနိ.

ပရနိမ္မိတဝသဝတ္တီနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ သောဠသ ဝဿသတာနိ၊ ပရနိမ္မိတဝသဝတ္တီနံ ဒေဝါနံ ဧသော ဧကော ရတ္တိန္ဒိဝေါ. တာယ ရတ္တိယာ တိံသရတ္တိယော မာသော. တေန မာသေန ဒွါဒသမာသိယော သံဝစ္ဆရော. တေန သံဝစ္ဆရေန ဒိဗ္ဗာနိ သောဠသ ဝဿသဟဿာနိ ပရနိမ္မိတဝသဝတ္တီနံ ဒေဝါနံ အာယုပ္ပမာဏံ. မနုဿာနံ ဂဏနာယ ကိတ္တကံ ဟောတိ? နဝ စ ဝဿကောဋိသတာနိ ဧကဝီသဉ္စ ဝဿကောဋိယော သဋ္ဌိ စ ဝဿသတသဟဿာနီတိ.

ဆ ဧတေ [ဆပိ တေ (သျာ.)] ကာမာဝစရာ၊ သဗ္ဗကာမသမိဒ္ဓိနော၊

သဗ္ဗေသံ ဧကသင်္ခါတော၊ အာယု ဘဝတိ ကိတ္တကော.

ဒွါဒသ ကောဋိသတံ တေသံ၊ အဋ္ဌဝီသဉ္စ ကောဋိယော၊

ပညာသ သတသဟဿာနိ၊ ဝဿဂ္ဂေန ပကာသိတာတိ.

၁၀၂၄. ပဌမံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ ပရိတ္တံ ဘာဝေတွာ ဗြဟ္မပါရိသဇ္ဇာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? ကပ္ပဿ တတိယော ဘာဂေါ.

ပဌမံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ မဇ္ဈိမံ ဘာဝေတွာ ဗြဟ္မပုရောဟိတာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? ဥပဍ္ဎကပ္ပေါ.

ပဌမံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ ပဏီတံ ဘာဝေတွာ မဟာဗြဟ္မာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? ကပ္ပေါ [ဧကော ကပ္ပေါ (သျာ.)].

၁၀၂၅. ဒုတိယံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ ပရိတ္တံ ဘာဝေတွာ ပရိတ္တာဘာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? ဒွေ ကပ္ပါ.

ဒုတိယံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ မဇ္ဈိမံ ဘာဝေတွာ အပ္ပမာဏာဘာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? စတ္တာရော ကပ္ပါ.

ဒုတိယံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ ပဏီတံ ဘာဝေတွာ အာဘဿရာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? အဋ္ဌ ကပ္ပါ.

၁၀၂၆. တတိယံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ ပရိတ္တံ ဘာဝေတွာ ပရိတ္တသုဘာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? သောဠသ ကပ္ပါ.

တတိယံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ မဇ္ဈိမံ ဘာဝေတွာ အပ္ပမာဏသုဘာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? ဗာတ္တိံသ ကပ္ပါ.

တတိယံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ ပဏီတံ ဘာဝေတွာ သုဘကိဏှာနံ ဒေဝါနံ သဟဗျတံ ဥပပဇ္ဇန္တိ. တေသံ ကိတ္တကံ အာယုပ္ပမာဏံ? စတုသဋ္ဌိ ကပ္ပါ.

၁၀၂၇. စတုတ္ထံ ဈာနံ ဘာဝေတွာ အာရမ္မဏနာနတ္တတာ မနသိကာရနာနတ္တတာ ဆန္ဒနာနတ္တတာ ပဏိဓိနာနတ္တတာ အဓိမောက္ခနာနတ္တတာ အဘိနီဟာရနာနတ္တတာ ပညာနာနတ္တတာ အပ္ပေကစ္စေ အသညသတ္တာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ ဝေဟပ္ဖလာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ အဝိဟာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ အတပ္ပါနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ သုဒဿာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ သုဒဿီနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ အကနိဋ္ဌာနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ အာကာသာနဉ္စာယတနူပဂါနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ ဝိညာဏဉ္စာယတနူပဂါနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ အာကိဉ္စညာယတနူပဂါနံ ဒေဝါနံ သဟဗျတံ ဥပပဇ္ဇန္တိ၊ အပ္ပေကစ္စေ နေဝသညာနာသညာယတနူပဂါနံ ဒေဝါနံ သဟဗျတံ ဥပပဇ္ဇန္တိ.

အသညသတ္တာနဉ္စ ဝေဟပ္ဖလာနဉ္စ ဒေဝါနံ ကိတ္တကံ အာယုပ္ပမာဏံ? ပဉ္စကပ္ပသတာနိ.

အဝိဟာနံ ဒေဝါနံ ကိတ္တကံ အာယုပ္ပမာဏံ? ကပ္ပသဟဿံ.

အတပ္ပါနံ ဒေဝါနံ ကိတ္တကံ အာယုပ္ပမာဏံ? ဒွေ ကပ္ပသဟဿာနိ.

သုဒဿာနံ ဒေဝါနံ ကိတ္တကံ အာယုပ္ပမာဏံ? စတ္တာရိ ကပ္ပသဟဿာနိ.

သုဒဿီနံ ဒေဝါနံ ကိတ္တကံ အာယုပ္ပမာဏံ? အဋ္ဌ ကပ္ပသဟဿာနိ.

အကနိဋ္ဌာနံ ဒေဝါနံ ကိတ္တကံ အာယုပ္ပမာဏံ? သောဠသ ကပ္ပသဟဿာနိ.

၁၀၂၈. အာကာသာနဉ္စာယတနူပဂါနံ ဒေဝါနံ ကိတ္တကံ အာယုပ္ပမာဏံ? ဝီသတိ ကပ္ပသဟဿာနိ.

ဝိညာဏဉ္စာယတနူပဂါနံ ဒေဝါနံ ကိတ္တကံ အာယုပ္ပမာဏံ? စတ္တာရီသ ကပ္ပသဟဿာနိ.

အာကိဉ္စညာယတနူပဂါနံ ဒေဝါနံ ကိတ္တကံ အာယုပ္ပမာဏံ? သဋ္ဌိ ကပ္ပသဟဿာနိ.

နေဝသညာနာသညာယတနူပဂါနံ ဒေဝါနံ ကိတ္တကံ အာယုပ္ပမာဏံ? စတုရာသီတိ ကပ္ပသဟဿာနီတိ.

၁၀၂၉. ဥက္ခိတ္တာ ပုညတေဇေန၊ ကာမရူပဂတိံ ဂတာ.

ဘဝဂ္ဂတမ္ပိ [ဘဝဂ္ဂံ ဝါပိ (သျာ.)] သမ္ပတ္တာ၊ ပုနာဂစ္ဆန္တိ [ပုန ဂစ္ဆန္တိ (သျာ.)] ဒုဂ္ဂတိံ.

တာဝ ဒီဃာယုကာ သတ္တာ၊ စဝန္တိ အာယုသင်္ခယာ၊

နတ္ထိ ကောစိ ဘဝေါ နိစ္စော၊ ဣတိ ဝုတ္တံ မဟေသိနာ.

တသ္မာ ဟိ ဓီရာ နိပကာ၊ နိပုဏာ အတ္ထစိန္တကာ၊

ဇရာမရဏမောက္ခာယ၊ ဘာဝေန္တိ မဂ္ဂမုတ္တမံ.

ဘာဝယိတွာ သုစိံ မဂ္ဂံ၊ နိဗ္ဗာနောဂဓဂါမိနံ၊

သဗ္ဗာသဝေ ပရိညာယ၊ ပရိနိဗ္ဗန္တိ အနာသဝါတိ.