၂. ရူပဓာတု

၁၀၁၅. ရူပဓာတုယာ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ။ ကတိ စိတ္တာနိ ပါတုဘဝန္တိ?

ရူပဓာတုယာ ဥပပတ္တိက္ခဏေ၊ ဌပေတွာ အသညသတ္တာနံ ဒေဝါနံ၊ ပဉ္စက္ခန္ဓာ ပါတုဘဝန္တိ၊ ပဉ္စာယတနာနိ ပါတုဘဝန္တိ၊ ပဉ္စ ဓာတုယော ပါတုဘဝန္တိ၊ ဧကံ သစ္စံ ပါတုဘဝတိ၊ ဒသိန္ဒြိယာနိ ပါတုဘဝန္တိ၊ တယော ဟေတူ ပါတုဘဝန္တိ၊ တယော အာဟာရာ ပါတုဘဝန္တိ၊ ဧကော ဖဿော ပါတုဘဝတိ၊ ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ.

၁၀၁၆. ရူပဓာတုယာ ဥပပတ္တိက္ခဏေ ကတမေ ပဉ္စက္ခန္ဓာ ပါတုဘဝန္တိ? ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ရူပဓာတုယာ ဥပပတ္တိက္ခဏေ ဣမေ ပဉ္စက္ခန္ဓာ ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမာနိ ပဉ္စာယတနာနိ ပါတုဘဝန္တိ? စက္ခာယတနံ၊ ရူပါယတနံ၊ သောတာယတနံ၊ မနာယတနံ၊ ဓမ္မာယတနံ – ရူပဓာတုယာ ဥပပတ္တိက္ခဏေ ဣမာနိ ပဉ္စာယတနာနိ ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမာ ပဉ္စ ဓာတုယော ပါတုဘဝန္တိ? စက္ခုဓာတု၊ ရူပဓာတု၊ သောတဓာတု၊ မနောဝိညာဏဓာတု၊ ဓမ္မဓာတု – ရူပဓာတုယာ ဥပပတ္တိက္ခဏေ ဣမာ ပဉ္စ ဓာတုယော ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမံ ဧကံ သစ္စံ ပါတုဘဝတိ? ဒုက္ခသစ္စံ – ရူပဓာတုယာ ဥပပတ္တိက္ခဏေ ဣဒံ ဧကံ သစ္စံ ပါတုဘဝတိ.

ရူပဓာတုယာ ဥပပတ္တိက္ခဏေ ကတမာနိ ဒသိန္ဒြိယာနိ ပါတုဘဝန္တိ? စက္ခုန္ဒြိယံ၊ သောတိန္ဒြိယံ၊ မနိန္ဒြိယံ၊ ဇီဝိတိန္ဒြိယံ၊ သောမနဿိန္ဒြိယံ ဝါ ဥပေက္ခိန္ဒြိယံ ဝါ၊ သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ – ရူပဓာတုယာ ဥပပတ္တိက္ခဏေ ဣမာနိ ဒသိန္ဒြိယာနိ ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမေ တယော ဟေတူ ပါတုဘဝန္တိ? အလောဘော ဝိပါကဟေတု၊ အဒေါသော ဝိပါကဟေတု၊ အမောဟော ဝိပါကဟေတု – ရူပဓာတုယာ ဥပပတ္တိက္ခဏေ ဣမေ တယော ဟေတူ ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမေ တယော အာဟာရာ ပါတုဘဝန္တိ? ဖဿာဟာရော၊ မနောသဉ္စေတနာဟာရော၊ ဝိညာဏာဟာရော – ရူပဓာတုယာ ဥပပတ္တိက္ခဏေ ဣမေ တယော အာဟာရာ ပါတုဘဝန္တိ.

ရူပဓာတုယာ ဥပပတ္တိက္ခဏေ ကတမော ဧကော ဖဿော ပါတုဘဝတိ? မနောဝိညာဏဓာတုသမ္ဖဿော – ရူပဓာတုယာ ဥပပတ္တိက္ခဏေ အယံ ဧကော ဖဿော ပါတုဘဝတိ.

ရူပဓာတုယာ ဥပပတ္တိက္ခဏေ ကတမာ ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ? မနောဝိညာဏဓာတု – ရူပဓာတုယာ ဥပပတ္တိက္ခဏေ ဣဒံ ဧကံ စိတ္တံ ပါတုဘဝတိ.