၃. အသညသတ္တာ
၁၀၁၇. အသညသတ္တာနံ ဒေဝါနံ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ။ ကတိ စိတ္တာနိ ပါတုဘဝန္တိ?
အသညသတ္တာနံ ဒေဝါနံ ဥပပတ္တိက္ခဏေ ဧကော ခန္ဓော ပါတုဘဝတိ – ရူပက္ခန္ဓော၊ ဒွေ အာယတနာနိ ပါတုဘဝန္တိ – ရူပါယတနံ၊ ဓမ္မာယတနံ၊ ဒွေ ဓာတုယော ပါတုဘဝန္တိ – ရူပဓာတု၊ ဓမ္မဓာတု၊ ဧကံ သစ္စံ ပါတုဘဝတိ – ဒုက္ခသစ္စံ၊ ဧကိန္ဒြိယံ ပါတုဘဝတိ – ရူပဇီဝိတိန္ဒြိယံ. အသညသတ္တာ ဒေဝါ အဟေတုကာ အနာဟာရာ အဖဿကာ အဝေဒနကာ အသညကာ အစေတနကာ အစိတ္တကာ ပါတုဘဝန္တိ.