၃. အရူပဓာတု

၁၀၀၃. ပဉ္စန္နံ ခန္ဓာနံ ကတိ အရူပဓာတုပရိယာပန္နာ၊ ကတိ န အရူပဓာတုပရိယာပန္နာ။ပေ။ သတ္တန္နံ စိတ္တာနံ ကတိ အရူပဓာတုပရိယာပန္နာ၊ ကတိ န အရူပဓာတုပရိယာပန္နာ?

၁၀၀၄. ရူပက္ခန္ဓော န အရူပဓာတုပရိယာပန္နော၊ စတ္တာရော ခန္ဓာ သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

ဒသာယတနာ န အရူပဓာတုပရိယာပန္နာ၊ ဒွေ အာယတနာ သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

သောဠသ ဓာတုယော န အရူပဓာတုပရိယာပန္နာ၊ ဒွေ ဓာတုယော သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

တီဏိ သစ္စာနိ န အရူပဓာတုပရိယာပန္နာနိ.

ဒုက္ခသစ္စံ သိယာ အရူပဓာတုပရိယာပန္နံ၊ သိယာ န အရူပဓာတုပရိယာပန္နံ.

စုဒ္ဒသိန္ဒြိယာ န အရူပဓာတုပရိယာပန္နာ၊ အဋ္ဌိန္ဒြိယာ သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

တယော အကုသလဟေတူ န အရူပဓာတုပရိယာပန္နာ၊ ဆ ဟေတူ သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

ကဗဠီကာရော အာဟာရော န အရူပဓာတုပရိယာပန္နော၊ တယော အာဟာရာ သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.

ဆ ဖဿာ န အရူပဓာတုပရိယာပန္နာ၊ မနောဝိညာဏဓာတုသမ္ဖဿော သိယာ အရူပဓာတုပရိယာပန္နော၊ သိယာ န အရူပဓာတုပရိယာပန္နော.

ဆ ဝေဒနာ။ပေ။ ဆ သညာ ။ ဆ စေတနာ။ ဆ စိတ္တာ န အရူပဓာတုပရိယာပန္နာ၊ မနောဝိညာဏဓာတု သိယာ အရူပဓာတုပရိယာပန္နာ၊ သိယာ န အရူပဓာတုပရိယာပန္နာ.