၄. ပရိယာပန္နာပရိယာပန္နံ

၁၀၀၅. ပဉ္စန္နံ ခန္ဓာနံ ကတိ ပရိယာပန္နာ၊ ကတိ အပရိယာပန္နာ။ပေ။ သတ္တန္နံ စိတ္တာနံ ကတိ ပရိယာပန္နာ၊ ကတိ အပရိယာပန္နာ?

၁၀၀၆. ရူပက္ခန္ဓော ပရိယာပန္နော၊ စတ္တာရော ခန္ဓာ သိယာ ပရိယာပန္နာ၊ သိယာ အပရိယာပန္နာ.

ဒသာယတနာ ပရိယာပန္နာ၊ ဒွေ အာယတနာ သိယာ ပရိယာပန္နာ၊ သိယာ အပရိယာပန္နာ.

သောဠသ ဓာတုယော ပရိယာပန္နာ၊ ဒွေ ဓာတုယော သိယာ ပရိယာပန္နာ၊ သိယာ အပရိယာပန္နာ.

ဒွေ သစ္စာ ပရိယာပန္နာ၊ ဒွေ သစ္စာ အပရိယာပန္နာ.

ဒသိန္ဒြိယာ ပရိယာပန္နာ၊ တီဏိန္ဒြိယာ အပရိယာပန္နာ၊ နဝိန္ဒြိယာ သိယာ ပရိယာပန္နာ၊ သိယာ အပရိယာပန္နာ.

တယော အကုသလဟေတူ ပရိယာပန္နာ၊ ဆ ဟေတူ သိယာ ပရိယာပန္နာ၊ သိယာ အပရိယာပန္နာ.

ကဗဠီကာရော အာဟာရော ပရိယာပန္နော၊ တယော အာဟာရာ သိယာ ပရိယာပန္နာ၊ သိယာ အပရိယာပန္နာ.

ဆ ဖဿာ ပရိယာပန္နာ၊ မနောဝိညာဏဓာတုသမ္ဖဿော သိယာ ပရိယာပန္နော၊ သိယာ အပရိယာပန္နော.

ဆ ဝေဒနာ။ပေ။ ဆ သညာ။ ဆ စေတနာ။ ဆ စိတ္တာ ပရိယာပန္နာ၊ မနောဝိညာဏဓာတု သိယာ ပရိယာပန္နာ၊ သိယာ အပရိယာပန္နာ.