၂. ရူပဓာတု

၉၉၃. ရူပဓာတုယာ ကတိ ခန္ဓာ၊ ကတိ အာယတနာ၊ ကတိ ဓာတုယော၊ ကတိ သစ္စာနိ၊ ကတိ ဣန္ဒြိယာနိ။ပေ။ ကတိ စိတ္တာနိ?

ရူပဓာတုယာ ပဉ္စက္ခန္ဓာ၊ ဆ အာယတနာနိ၊ နဝ ဓာတုယော၊ တီဏိ သစ္စာနိ၊ စုဒ္ဒသိန္ဒြိယာနိ၊ အဋ္ဌ ဟေတူ၊ တယော အာဟာရာ၊ စတ္တာရော ဖဿာ၊ စတဿော ဝေဒနာ၊ စတဿော သညာ၊ စတဿော စေတနာ၊ စတ္တာရိ စိတ္တာနိ.

၉၉၄. တတ္ထ ကတမေ ရူပဓာတုယာ ပဉ္စက္ခန္ဓာ? ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဝုစ္စန္တိ ‘‘ရူပဓာတုယာ ပဉ္စက္ခန္ဓာ’’.

တတ္ထ ကတမာနိ ရူပဓာတုယာ ဆ အာယတနာနိ? စက္ခာယတနံ၊ ရူပါယတနံ၊ သောတာယတနံ၊ သဒ္ဒါယတနံ၊ မနာယတနံ၊ ဓမ္မာယတနံ – ဣမာနိ ဝုစ္စန္တိ ‘‘ရူပဓာတုယာ ဆ အာယတနာနိ’’.

တတ္ထ ကတမာ ရူပဓာတုယာ နဝ ဓာတုယော? စက္ခုဓာတု၊ ရူပဓာတု၊ စက္ခုဝိညာဏဓာတု၊ သောတဓာတု၊ သဒ္ဒဓာတု၊ သောတဝိညာဏဓာတု၊ မနောဓာတု၊ ဓမ္မဓာတု၊ မနောဝိညာဏဓာတု – ဣမာ ဝုစ္စန္တိ ‘‘ရူပဓာတုယာ နဝ ဓာတုယော’’.

တတ္ထ ကတမာနိ ရူပဓာတုယာ တီဏိ သစ္စာနိ? ဒုက္ခသစ္စံ၊ သမုဒယသစ္စံ၊ မဂ္ဂသစ္စံ – ဣမာနိ ဝုစ္စန္တိ ‘‘ရူပဓာတုယာ တီဏိ သစ္စာနိ’’.

တတ္ထ ကတမာနိ ရူပဓာတုယာ စုဒ္ဒသိန္ဒြိယာနိ? စက္ခုန္ဒြိယံ၊ သောတိန္ဒြိယံ၊ မနိန္ဒြိယံ၊ ဇီဝိတိန္ဒြိယံ၊ သောမနဿိန္ဒြိယံ၊ ဥပေက္ခိန္ဒြိယံ၊ သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ အနညာတညဿာမီတိန္ဒြိယံ၊ အညိန္ဒြိယံ၊ အညာတာဝိန္ဒြိယံ – ဣမာနိ ဝုစ္စန္တိ ‘‘ရူပဓာတုယာ စုဒ္ဒသိန္ဒြိယာနိ’’.

တတ္ထ ကတမေ ရူပဓာတုယာ အဋ္ဌ ဟေတူ? တယော ကုသလဟေတူ၊ ဒွေ အကုသလဟေတူ၊ တယော အဗျာကတဟေတူ.

တတ္ထ ကတမေ တယော ကုသလဟေတူ? အလောဘော ကုသလဟေတု၊ အဒေါသော ကုသလဟေတု၊ အမောဟော ကုသလဟေတု – ဣမေ တယော ကုသလဟေတူ.

တတ္ထ ကတမေ ဒွေ အကုသလဟေတူ? လောဘော အကုသလဟေတု၊ မောဟော အကုသလဟေတု – ဣမေ ဒွေ အကုသလဟေတူ.

တတ္ထ ကတမေ တယော အဗျာကတဟေတူ? ကုသလာနံ ဝါ ဓမ္မာနံ ဝိပါကတော ကိရိယာဗျာကတေသု ဝါ ဓမ္မေသု အလောဘော၊ အဒေါသော၊ အမောဟော – ဣမေ တယော အဗျာကတဟေတူ. ဣမေ ဝုစ္စန္တိ ရူပဓာတုယာ အဋ္ဌ ဟေတူ.

တတ္ထ ကတမေ ရူပဓာတုယာ တယော အာဟာရာ? ဖဿာဟာရော၊ မနောသဉ္စေတနာဟာရော၊ ဝိညာဏာဟာရော – ဣမေ ဝုစ္စန္တိ ‘‘ရူပဓာတုယာ တယော အာဟာရာ’’.

တတ္ထ ကတမေ ရူပဓာတုယာ စတ္တာရော ဖဿာ? စက္ခုသမ္ဖဿော၊ သောတသမ္ဖဿော၊ မနောဓာတုသမ္ဖဿော၊ မနောဝိညာဏဓာတုသမ္ဖဿော – ဣမေ ဝုစ္စန္တိ ‘‘ရူပဓာတုယာ စတ္တာရော ဖဿာ’’.

တတ္ထ ကတမာ ရူပဓာတုယာ စတဿော ဝေဒနာ။ပေ။ စတဿော သညာ။ပေ။ စတဿော စေတနာ။ပေ။ စတ္တာရိ စိတ္တာနိ? စက္ခုဝိညာဏံ၊ သောတဝိညာဏံ၊ မနောဓာတု၊ မနောဝိညာဏဓာတု – ဣမာနိ ဝုစ္စန္တိ ‘‘ရူပဓာတုယာ စတ္တာရိ စိတ္တာနိ’’.