၃. အရူပဓာတု

၉၉၅. အရူပဓာတုယာ ကတိ ခန္ဓာ။ပေ။ ကတိ စိတ္တာနိ?

အရူပဓာတုယာ စတ္တာရော ခန္ဓာ၊ ဒွေ အာယတနာနိ၊ ဒွေ ဓာတုယော၊ တီဏိ သစ္စာနိ၊ ဧကာဒသိန္ဒြိယာနိ၊ အဋ္ဌ ဟေတူ၊ တယော အာဟာရာ၊ ဧကော ဖဿော၊ ဧကာ ဝေဒနာ၊ ဧကာ သညာ၊ ဧကာ စေတနာ၊ ဧကံ စိတ္တံ.

၉၉၆. တတ္ထ ကတမေ အရူပဓာတုယာ စတ္တာရော ခန္ဓာ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဝုစ္စန္တိ ‘‘အရူပဓာတုယာ စတ္တာရော ခန္ဓာ’’.

တတ္ထ ကတမာနိ အရူပဓာတုယာ ဒွေ အာယတနာနိ? မနာယတနံ၊ ဓမ္မာယတနံ – ဣမာနိ ဝုစ္စန္တိ ‘‘အရူပဓာတုယာ ဒွေ အာယတနာနိ’’.

တတ္ထ ကတမာ အရူပဓာတုယာ ဒွေ ဓာတုယော? မနောဝိညာဏဓာတု၊ ဓမ္မဓာတု – ဣမာ ဝုစ္စန္တိ ‘‘အရူပဓာတုယာ ဒွေ ဓာတုယော’’.

တတ္ထ ကတမာနိ အရူပဓာတုယာ တီဏိ သစ္စာနိ? ဒုက္ခသစ္စံ၊ သမုဒယသစ္စံ၊ မဂ္ဂသစ္စံ – ဣမာနိ ဝုစ္စန္တိ ‘‘အရူပဓာတုယာ တီဏိ သစ္စာနိ’’.

တတ္ထ ကတမာနိ အရူပဓာတုယာ ဧကာဒသိန္ဒြိယာနိ? မနိန္ဒြိယံ၊ ဇီဝိတိန္ဒြိယံ၊ သောမနဿိန္ဒြိယံ၊ ဥပေက္ခိန္ဒြိယံ၊ သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ အညိန္ဒြိယံ၊ အညာတာဝိန္ဒြိယံ – ဣမာနိ ဝုစ္စန္တိ ‘‘အရူပဓာတုယာ ဧကာဒသိန္ဒြိယာနိ’’.

တတ္ထ ကတမေ အရူပဓာတုယာ အဋ္ဌ ဟေတူ? တယော ကုသလဟေတူ၊ ဒွေ အကုသလဟေတူ၊ တယော အဗျာကတဟေတူ။ပေ။ ဣမေ ဝုစ္စန္တိ ‘‘အရူပဓာတုယာ အဋ္ဌ ဟေတူ’’.

တတ္ထ ကတမေ အရူပဓာတုယာ တယော အာဟာရာ? ဖဿာဟာရော၊ မနောသဉ္စေတနာဟာရော၊ ဝိညာဏာဟာရော – ဣမေ ဝုစ္စန္တိ ‘‘အရူပဓာတုယာ တယော အာဟာရာ’’.

တတ္ထ ကတမော အရူပဓာတုယာ ဧကော ဖဿော? မနောဝိညာဏဓာတုသမ္ဖဿော – အယံ ဝုစ္စတိ ‘‘အရူပဓာတုယာ ဧကော ဖဿော’’.

တတ္ထ ကတမာ အရူပဓာတုယာ ဧကာ ဝေဒနာ။ပေ။ ဧကာ သညာ။ပေ။ ဧကာ စေတနာ။ပေ။ ဧကံ စိတ္တံ? မနောဝိညာဏဓာတု – ဣဒံ ဝုစ္စတိ ‘‘အရူပဓာတုယာ ဧကံ စိတ္တံ’’.