၁. ကာမဓာတု

၉၉၁. ကာမဓာတုယာ ကတိ ခန္ဓာ၊ ကတိ အာယတနာနိ၊ ကတိ ဓာတုယော၊ ကတိ သစ္စာနိ၊ ကတိ ဣန္ဒြိယာနိ၊ ကတိ ဟေတူ၊ ကတိ အာဟာရာ၊ ကတိ ဖဿာ၊ ကတိ ဝေဒနာ၊ ကတိ သညာ၊ ကတိ စေတနာ၊ ကတိ စိတ္တာနိ?

ကာမဓာတုယာ ပဉ္စက္ခန္ဓာ၊ ဒွါဒသာယတနာနိ၊ အဋ္ဌာရသ ဓာတုယော၊ တီဏိ သစ္စာနိ၊ ဗာဝီသတိန္ဒြိယာနိ၊ နဝ ဟေတူ၊ စတ္တာရော အာဟာရာ၊ သတ္တ ဖဿာ၊ သတ္တ ဝေဒနာ၊ သတ္တ သညာ၊ သတ္တ စေတနာ၊ သတ္တ စိတ္တာနိ.

၉၉၂. တတ္ထ ကတမေ ကာမဓာတုယာ ပဉ္စက္ခန္ဓာ? ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဝုစ္စန္တိ ‘‘ကာမဓာတုယာ ပဉ္စက္ခန္ဓာ’’.

တတ္ထ ကတမာနိ ကာမဓာတုယာ ဒွါဒသာယတနာနိ? စက္ခာယတနံ၊ ရူပါယတနံ၊ သောတာယတနံ၊ သဒ္ဒါယတနံ၊ ဃာနာယတနံ၊ ဂန္ဓာယတနံ၊ ဇိဝှါယတနံ၊ ရသာယတနံ၊ ကာယာယတနံ၊ ဖောဋ္ဌဗ္ဗာယတနံ၊ မနာယတနံ၊ ဓမ္မာယတနံ – ဣမာနိ ဝုစ္စန္တိ ‘‘ကာမဓာတုယာ ဒွါဒသာယတနာနိ’’.

တတ္ထ ကတမာ ကာမဓာတုယာ အဋ္ဌာရသ ဓာတုယော? စက္ခုဓာတု၊ ရူပဓာတု၊ စက္ခုဝိညာဏဓာတု၊ သောတဓာတု၊ သဒ္ဒဓာတု၊ သောတဝိညာဏဓာတု၊ ဃာနဓာတု၊ ဂန္ဓဓာတု၊ ဃာနဝိညာဏဓာတု၊ ဇိဝှါဓာတု၊ ရသဓာတု၊ ဇိဝှါဝိညာဏဓာတု၊ ကာယဓာတု၊ ဖောဋ္ဌဗ္ဗဓာတု၊ ကာယဝိညာဏဓာတု၊ မနောဓာတု၊ ဓမ္မဓာတု၊ မနောဝိညာဏဓာတု – ဣမာ ဝုစ္စန္တိ ‘‘ကာမဓာတုယာ အဋ္ဌာရသ ဓာတုယော’’.

တတ္ထ ကတမာနိ ကာမဓာတုယာ တီဏိ သစ္စာနိ? ဒုက္ခသစ္စံ၊ သမုဒယသစ္စံ၊ မဂ္ဂသစ္စံ – ဣမာနိ ဝုစ္စန္တိ ‘‘ကာမဓာတုယာ တီဏိ သစ္စာနိ’’.

တတ္ထ ကတမာနိ ကာမဓာတုယာ ဗာဝီသတိန္ဒြိယာနိ? စက္ခုန္ဒြိယံ၊ သောတိန္ဒြိယံ။ပေ။ အညာတာဝိန္ဒြိယံ – ဣမာနိ ဝုစ္စန္တိ ‘‘ကာမဓာတုယာ ဗာဝီသတိန္ဒြိယာနိ’’.

တတ္ထ ကတမေ ကာမဓာတုယာ နဝ ဟေတူ? တယော ကုသလဟေတူ၊ တယော အကုသလဟေတူ၊ တယော အဗျာကတဟေတူ။ပေ။ ဣမေ ဝုစ္စန္တိ ‘‘ကာမဓာတုယာ နဝ ဟေတူ’’.

တတ္ထ ကတမေ ကာမဓာတုယာ စတ္တာရော အာဟာရာ? ကဗဠီကာရာဟာရော၊ ဖဿာဟာရော၊ မနောသဉ္စေတနာဟာရော၊ ဝိညာဏာဟာရော – ဣမေ ဝုစ္စန္တိ ‘‘ကာမဓာတုယာ စတ္တာရော အာဟာရာ’’.

တတ္ထ ကတမေ ကာမဓာတုယာ သတ္တ ဖဿာ? စက္ခုသမ္ဖဿော သောတသမ္ဖဿော၊ ဃာနသမ္ဖဿော၊ ဇိဝှါသမ္ဖဿော၊ ကာယသမ္ဖဿော၊ မနောဓာတုသမ္ဖဿော၊ မနောဝိညာဏဓာတုသမ္ဖဿော – ဣမေ ဝုစ္စန္တိ ‘‘ကာမဓာတုယာ သတ္တ ဖဿာ’’.

တတ္ထ ကတမာ ကာမဓာတုယာ သတ္တ ဝေဒနာ? စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ၊ မနောဓာတုသမ္ဖဿဇာ ဝေဒနာ၊ မနောဝိညာဏဓာတုသမ္ဖဿဇာ ဝေဒနာ – ဣမာ ဝုစ္စတ္တိ ‘‘ကာမဓာတုယာ သတ္တ ဝေဒနာ’’.

တတ္ထ ကတမာ ကာမဓာတုယာ သတ္တ သညာ? စက္ခုသမ္ဖဿဇာ သညာ၊ သောတသမ္ဖဿဇာ သညာ၊ ဃာနသမ္ဖဿဇာ သညာ၊ ဇိဝှါသမ္ဖဿဇာ သညာ၊ ကာယသမ္ဖဿဇာ သညာ၊ မနောဓာတုသမ္ဖဿဇာ သညာ၊ မနောဝိညာဏဓာတုသမ္ဖဿဇာ သညာ – ဣမာ ဝုစ္စန္တိ ‘‘ကာမဓာတုယာ သတ္တ သညာ’’.

တတ္ထ ကတမာ ကာမဓာတုယာ သတ္တ စေတနာ? စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောဓာတုသမ္ဖဿဇာ စေတနာ၊ မနောဝိညာဏဓာတုသမ္ဖဿဇာ စေတနာ – ဣမာ ဝုစ္စန္တိ ‘‘ကာမဓာတုယာ သတ္တ စေတနာ’’.

တတ္ထ ကတမာနိ ကာမဓာတုယာ သတ္တ စိတ္တာနိ? စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဓာတု၊ မနောဝိညာဏဓာတု – ဣမာနိ ဝုစ္စန္တိ ‘‘ကာမဓာတုယာ သတ္တ စိတ္တာနိ’’.