(၃၄) ပါပိစ္ဆတာ

၈၅၁. တတ္ထ ကတမာ ပါပိစ္ဆတာ? ဣဓေကစ္စော အဿဒ္ဓေါ သမာနော ‘‘သဒ္ဓေါတိ မံ ဇနော ဇာနာတူ’’တိ ဣစ္ဆတိ၊ ဒုဿီလော သမာနော ‘‘သီလဝါတိ မံ ဇနော ဇာနာတူ’’တိ ဣစ္ဆတိ၊ အပ္ပဿုတော သမာနော ‘‘ဗဟုဿုတောတိ မံ ဇနော ဇာနာတူ’’တိ ဣစ္ဆတိ၊ သင်္ဂဏိကာရာမော သမာနော ‘‘ပဝိဝိတ္တောတိ မံ ဇနော ဇာနာတူ’’တိ ဣစ္ဆတိ၊ ကုသီတော သမာနော ‘‘အာရဒ္ဓဝီရိယောတိ မံ ဇနော ဇာနာတူ’’တိ ဣစ္ဆတိ၊ မုဋ္ဌဿတီ သမာနော ‘‘ဥပဋ္ဌိတဿတီတိ မံ ဇနော ဇာနာတူ’’တိ ဣစ္ဆတိ၊ အသမာဟိတော သမာနော ‘‘သမာဟိတောတိ မံ ဇနော ဇာနာတူ’’တိ ဣစ္ဆတိ၊ ဒုပ္ပညော သမာနော ‘‘ပညဝါတိ မံ ဇနော ဇာနာတူ’’တိ ဣစ္ဆတိ၊ အခီဏာသဝေါ သမာနော ‘‘ခီဏာသဝေါတိ မံ ဇနော ဇာနာတူ’’တိ ဣစ္ဆတိ – ယာ ဧဝရူပါ ဣစ္ဆာ ဣစ္ဆာဂတာ ပါပိစ္ဆတာ ရာဂေါ သာရာဂေါ စိတ္တဿ သာရာဂေါ – အယံ ဝုစ္စတိ ‘‘ပါပိစ္ဆတာ’’.