(၂) ဗာဟိရဿ ဥပါဒါယ

၉၇၅. တတ္ထ ကတမာနိ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ? ဣမိနာ အသ္မီတိ ဟောတိ၊ ဣမိနာ ဣတ္ထသ္မီတိ ဟောတိ၊ ဣမိနာ ဧဝသ္မီတိ ဟောတိ၊ ဣမိနာ အညထာသ္မီတိ ဟောတိ၊ ဣမိနာ ဘဝိဿန္တိ ဟောတိ၊ ဣမိနာ ဣတ္ထံ ဘဝိဿန္တိ ဟောတိ၊ ဣမိနာ ဧဝံ ဘဝိဿန္တိ ဟောတိ၊ ဣမိနာ အညထာ ဘဝိဿန္တိ ဟောတိ၊ ဣမိနာ အသသ္မီတိ ဟောတိ၊ ဣမိနာ သာတသ္မီတိ ဟောတိ၊ ဣမိနာ သိယန္တိ ဟောတိ၊ ဣမိနာ ဣတ္ထံ သိယန္တိ ဟောတိ၊ ဣမိနာ ဧဝံ သိယန္တိ ဟောတိ၊ ဣမိနာ အညထာ သိယန္တိ ဟောတိ၊ ဣမိနာ အပါဟံ သိယန္တိ ဟောတိ၊ ဣမိနာ အပါဟံ ဣတ္ထံ သိယန္တိ ဟောတိ၊ ဣမိနာ အပါဟံ ဧဝံ သိယန္တိ ဟောတိ၊ ဣမိနာ အပါဟံ အညထာ သိယန္တိ ဟောတိ.

၉၇၆. (၁) ကထဉ္စ ဣမိနာ အသ္မီတိ ဟောတိ? ကဉ္စိ ဓမ္မံ အဝကာရိံ ကရိတွာ ရူပံ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ အသ္မီတိ ဆန္ဒံ ပဋိလဘတိ၊ ဣမိနာ အသ္မီတိ မာနံ ပဋိလဘတိ၊ ဣမိနာ အသ္မီတိ ဒိဋ္ဌိံ ပဋိလဘတိ. တသ္မိံ သတိ ဣမာနိ ပပဉ္စိတာနိ ဟောန္တိ – ဣမိနာ ဣတ္ထသ္မီတိ ဝါ၊ ဣမိနာ ဧဝသ္မီတိ ဝါ၊ ဣမိနာ အညထာသ္မီတိ ဝါ.

(၂) ကထဉ္စ ဣမိနာ ဣတ္ထသ္မီတိ ဟောတိ? ဣမိနာ ခတ္တိယောသ္မီတိ ဝါ၊ ဣမိနာ ဗြာဟ္မဏောသ္မီတိ ဝါ၊ ဣမိနာ ဝေဿောသ္မီတိ ဝါ၊ ဣမိနာ သုဒ္ဒေါသ္မီတိ ဝါ၊ ဣမိနာ ဂဟဋ္ဌောသ္မီတိ ဝါ၊ ဣမိနာ ပဗ္ဗဇိတောသ္မီတိ ဝါ၊ ဣမိနာ ဒေဝေါသ္မီတိ ဝါ၊ ဣမိနာ မနုဿောသ္မီတိ ဝါ၊ ဣမိနာ ရူပီသ္မီတိ ဝါ၊ ဣမိနာ အရူပီသ္မီတိ ဝါ၊ ဣမိနာ သညီသ္မီတိ ဝါ၊ ဣမိနာ အသညီသ္မီတိ ဝါ၊ ဣမိနာ နေဝသညီနာသညီသ္မီတိ ဝါ – ဧဝံ ဣမိနာ ဣတ္ထသ္မီတိ ဟောတိ.

(၃) ကထဉ္စ ဣမိနာ ဧဝသ္မီတိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ တထာဟံ ခတ္တိယောသ္မီတိ ဝါ၊ ယထာ သော ဗြာဟ္မဏော ဣမိနာ တထာဟံ ဗြာဟ္မဏောသ္မီတိ ဝါ။ပေ။ ယထာ သော နေဝသညီနာသညီ ဣမိနာ တထာဟံ နေဝသညီနာသညီသ္မီတိ ဝါ – ဧဝံ ဣမိနာ ဧဝသ္မီတိ ဟောတိ.

(၄) ကထဉ္စ ဣမိနာ အညထာသ္မီတိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ နာဟံ တထာ ခတ္တိယောသ္မီတိ ဝါ၊ ယထာ သော ဗြာဟ္မဏော ဣမိနာ နာဟံ တထာ ဗြာဟ္မဏောသ္မီတိ ဝါ။ပေ။ ယထာ သော နေဝသညီနာသညီ ဣမိနာ နာဟံ တထာ နေဝသညီနာသညီသ္မီတိ ဝါ – ဧဝံ ဣမိနာ အညထာသ္မီတိ ဟောတိ.

(၅) ကထဉ္စ ဣမိနာ ဘဝိဿန္တိ ဟောတိ? ကဉ္စိ ဓမ္မံ အဝကာရိံ ကရိတွာ ရူပံ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ ဘဝိဿန္တိ ဆန္ဒံ ပဋိလဘတိ၊ ဣမိနာ ဘဝိဿန္တိ မာနံ ပဋိလဘတိ၊ ဣမိနာ ဘဝိဿန္တိ ဒိဋ္ဌိံ ပဋိလဘတိ. တသ္မိံ သတိ ဣမာနိ ပပဉ္စိတာနိ ဟောန္တိ – ဣမိနာ ဣတ္ထံ ဘဝိဿန္တိ ဝါ၊ ဣမိနာ ဧဝံ ဘဝိဿန္တိ ဝါ၊ ဣမိနာ အညထာ ဘဝိဿန္တိ ဝါ.

(၆) ကထဉ္စ ဣမိနာ ဣတ္ထံ ဘဝိဿန္တိ ဟောတိ? ဣမိနာ ခတ္တိယော ဘဝိဿန္တိ ဝါ။ပေ။ ဣမိနာ အရူပီ ဘဝိဿန္တိ ဝါ၊ ဣမိနာ သညီ ဘဝိဿန္တိ ဝါ၊ ဣမိနာ အသညီ ဘဝိဿန္တိ ဝါ၊ ဣမိနာ နေဝသညီနာသညီ ဘဝိဿန္တိ ဝါ – ဧဝံ ဣမိနာ ဣတ္ထံ ဘဝိဿန္တိ ဟောတိ.

(၇) ကထဉ္စ ဣမိနာ ဧဝံ ဘဝိဿန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ တထာဟံ ခတ္တိယော ဘဝိဿန္တိ ဝါ၊ ယထာ သော ဗြာဟ္မဏော ဣမိနာ တထာဟံ ဗြာဟ္မဏော ဘဝိဿန္တိ ဝါ။ပေ။ ယထာ သော နေဝသညီနာသညီ ဣမိနာ တထာဟံ နေဝသညီနာသညီ ဘဝိဿန္တိ ဝါ – ဧဝံ ဣမိနာ ဧဝံ ဘဝိဿန္တိ ဟောတိ.

(၈) ကထဉ္စ ဣမိနာ အညထာ ဘဝိဿန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ နာဟံ တထာ ခတ္တိယော ဘဝိဿန္တိ ဝါ၊ ယထာ သော ဗြာဟ္မဏော ဣမိနာ နာဟံ တထာ ဗြာဟ္မဏော ဘဝိဿန္တိ ဝါ။ပေ။ ယထာ သော နေဝသညီနာသညီ ဣမိနာ နာဟံ တထာ နေဝသညီနာသညီ ဘဝိဿန္တိ ဝါ – ဧဝံ ဣမိနာ အညထာ ဘဝိဿန္တိ ဟောတိ.

(၉) ကထဉ္စ ဣမိနာ အသသ္မီတိ ဟောတိ? ကဉ္စိ ဓမ္မံ အဝကာရိံ [အဝကာရီ (သီ.)] ကရိတွာ ရူပံ။ပေ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ နိစ္စောသ္မိ ဓုဝေါသ္မိ သဿတောသ္မိ အဝိပရိဏာမဓမ္မောသ္မီတိ – ဧဝံ ဣမိနာ အသသ္မီတိ ဟောတိ.

(၁၀) ကထဉ္စ ဣမိနာ သာတသ္မီတိ ဟောတိ? ကဉ္စိ ဓမ္မံ အဝကာရိံ ကရိတွာ ရူပံ။ပေ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ ဥစ္ဆိဇ္ဇိဿာမိ ဝိနဿိဿာမိ န ဘဝိဿာမီတိ – ဧဝံ ဣမိနာ သာတသ္မီတိ ဟောတိ.

(၁၁) ကထဉ္စ ဣမိနာ သိယန္တိ ဟောတိ? ကဉ္စိ ဓမ္မံ အဝကာရိံ ကရိတွာ ရူပံ။ပေ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ သိယန္တိ ဆန္ဒံ ပဋိလဘတိ၊ ဣမိနာ သိယန္တိ မာနံ ပဋိလဘတိ၊ ဣမိနာ သိယန္တိ ဒိဋ္ဌိံ ပဋိလဘတိ. တသ္မိံ သတိ ဣမာနိ ပပဉ္စိတာနိ ဟောန္တိ – ဣမိနာ ဣတ္ထံ သိယန္တိ ဝါ၊ ဣမိနာ ဧဝံ သိယန္တိ ဝါ၊ ဣမိနာ အညထာ သိယန္တိ ဝါ.

(၁၂) ကထဉ္စ ဣမိနာ ဣတ္ထံ သိယန္တိ ဟောတိ? ဣမိနာ ခတ္တိယော သိယန္တိ ဝါ၊ ဣမိနာ ဗြာဟ္မဏော သိယန္တိ ဝါ၊ ဣမိနာ ဝေဿော သိယန္တိ ဝါ၊ ဣမိနာ သုဒ္ဒေါ သိယန္တိ ဝါ၊ ဣမိနာ ဂဟဋ္ဌော သိယန္တိ ဝါ၊ ဣမိနာ ပဗ္ဗဇိတော သိယန္တိ ဝါ၊ ဣမိနာ ဒေဝေါ သိယန္တိ ဝါ၊ ဣမိနာ မနုဿော သိယန္တိ ဝါ၊ ဣမိနာ ရူပီ သိယန္တိ ဝါ၊ ဣမိနာ အရူပီ သိယန္တိ ဝါ၊ ဣမိနာ သညီ သိယန္တိ ဝါ၊ ဣမိနာ အသညီ သိယန္တိ ဝါ၊ ဣမိနာ နေဝသညီနာသညီ သိယန္တိ ဝါ – ဧဝံ ဣမိနာ ဣတ္ထံ သိယန္တိ ဟောတိ.

(၁၃) ကထဉ္စ ဣမိနာ ဧဝံ သိယန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ တထာဟံ ခတ္တိယော သိယန္တိ ဝါ၊ ယထာ သော ဗြာဟ္မဏော ဣမိနာ တထာဟံ ဗြာဟ္မဏော သိယန္တိ ဝါ။ပေ။ ယထာ သော နေဝသညီနာသညီ ဣမိနာ တထာဟံ နေဝသညီနာသညီ သိယန္တိ ဝါ – ဧဝံ ဣမိနာ ဧဝံ သိယန္တိ ဟောတိ.

(၁၄) ကထဉ္စ ဣမိနာ အညထာ သိယန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ နာဟံ တထာ ခတ္တိယော သိယန္တိ ဝါ၊ ယထာ သော ဗြာဟ္မဏော ဣမိနာ နာဟံ တထာ ဗြာဟ္မဏော သိယန္တိ ဝါ။ပေ။ ယထာ သော နေဝသညီနာသညီ ဣမိနာ နာဟံ တထာ နေဝသညီနာသညီ သိယန္တိ ဝါ – ဧဝံ ဣမိနာ အညထာ သိယန္တိ ဟောတိ.

(၁၅) ကထဉ္စ ဣမိနာ အပါဟံ သိယန္တိ ဟောတိ? ကဉ္စိ ဓမ္မံ အဝကာရိံ ကရိတွာ ရူပံ။ပေ။ ဝေဒနံ။ သညံ။ သင်္ခါရေ။ ဝိညာဏံ ဣမိနာ အပါဟံ သိယန္တိ ဆန္ဒံ ပဋိလဘတိ၊ ဣမိနာ အပါဟံ သိယန္တိ မာနံ ပဋိလဘတိ၊ ဣမိနာ အပါဟံ သိယန္တိ ဒိဋ္ဌိံ ပဋိလဘတိ. တသ္မိံ သတိ ဣမာနိ ပပဉ္စိတာနိ ဟောန္တိ – ဣမိနာ အပါဟံ ဣတ္ထံ သိယန္တိ ဝါ၊ ဣမိနာ အပါဟံ ဧဝံ သိယန္တိ ဝါ၊ ဣမိနာ အပါဟံ အညထာ သိယန္တိ ဝါ.

(၁၆) ကထဉ္စ ဣမိနာ အပါဟံ ဣတ္ထံ သိယန္တိ ဟောတိ? ဣမိနာ အပါဟံ ခတ္တိယော သိယန္တိ ဝါ၊ ဣမိနာ အပါဟံ ဗြာဟ္မဏော သိယန္တိ ဝါ၊ ဣမိနာ အပါဟံ ဝေဿော သိယန္တိ ဝါ၊ ဣမိနာ အပါဟံ သုဒ္ဒေါ သိယန္တိ ဝါ၊ ဣမိနာ အပါဟံ ဂဟဋ္ဌော သိယန္တိ ဝါ၊ ဣမိနာ အပါဟံ ပဗ္ဗဇိတော သိယန္တိ ဝါ၊ ဣမိနာ အပါဟံ ဒေဝေါ သိယန္တိ ဝါ၊ ဣမိနာ အပါဟံ မနုဿော သိယန္တိ ဝါ၊ ဣမိနာ အပါဟံ ရူပီ သိယန္တိ ဝါ၊ ဣမိနာ အပါဟံ အရူပီ သိယန္တိ ဝါ၊ ဣမိနာ အပါဟံ သညီ သိယန္တိ ဝါ၊ ဣမိနာ အပါဟံ အသညီ သိယန္တိ ဝါ၊ ဣမိနာ အပါဟံ နေဝသညီနာသညီ သိယန္တိ ဝါ – ဧဝံ ဣမိနာ အပါဟံ ဣတ္ထံ သိယန္တိ ဟောတိ.

(၁၇) ကထဉ္စ ဣမိနာ အပါဟံ ဧဝံ သိယန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ အပါဟံ တထာ ခတ္တိယော သိယန္တိ ဝါ၊ ယထာ သော ဗြာဟ္မဏော ဣမိနာ အပါဟံ တထာ ဗြာဟ္မဏော သိယန္တိ ဝါ။ပေ။ ယထာ သော နေဝသညီနာသညီ ဣမိနာ အပါဟံ တထာ နေဝသညီနာသညီ သိယန္တိ ဝါ – ဧဝံ ဣမိနာ အပါဟံ ဧဝံ သိယန္တိ ဟောတိ.

(၁၈) ကထဉ္စ ဣမိနာ အပါဟံ အညထာ သိယန္တိ ဟောတိ? ပရပုဂ္ဂလံ ဥပနိဓာယ ယထာ သော ခတ္တိယော ဣမိနာ အပါဟံ န တထာ ခတ္တိယော သိယန္တိ ဝါ၊ ယထာ သော ဗြာဟ္မဏော ဣမိနာ အပါဟံ န တထာ ဗြာဟ္မဏော သိယန္တိ ဝါ။ပေ။ ယထာ သော နေဝသညီနာသညီ ဣမိနာ အပါဟံ န တထာ နေဝသညီနာသညီ သိယန္တိ ဝါ – ဧဝံ ဣမိနာ အပါဟံ အညထာ သိယန္တိ ဟောတိ.

ဣမာနိ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ.

ဣတိ ဣမာနိ အဋ္ဌာရသ တဏှာဝိစရိတာနိ အဇ္ဈတ္တိကဿ ဥပါဒါယ၊ ဣမာနိ အဋ္ဌာရသ တဏှာဝိစရိတာနိ ဗာဟိရဿ ဥပါဒါယ၊ တဒေကဇ္ဈံ အဘိသညူဟိတွာ အဘိသင်္ခိပိတွာ ဆတ္တိံသ တဏှာဝိစရိတာနိ ဟောန္တိ. ဣတိ ဧဝရူပါနိ အတီတာနိ ဆတ္တိံသ တဏှာဝိစရိတာနိ၊ အနာဂတာနိ ဆတ္တိံသ တဏှာဝိစရိတာနိ၊ ပစ္စုပ္ပန္နာနိ ဆတ္တိံသ တဏှာဝိစရိတာနိ၊ တဒေကဇ္ဈံ အဘိသညူဟိတွာ အဘိသင်္ခိပိတွာ အဋ္ဌတဏှာဝိစရိတသတံ ဟောတိ.

၉၇၇. တတ္ထ ကတမာနိ ဒွါသဋ္ဌိ ဒိဋ္ဌိဂတာနိ ဗြဟ္မဇာလေ ဝေယျာကရဏေ ဝုတ္တာနိ ဘဂဝတာ? စတ္တာရော သဿတဝါဒါ၊ စတ္တာရော ဧကစ္စသဿတိကာ၊ စတ္တာရော အန္တာနန္တိကာ၊ စတ္တာရော အမရာဝိက္ခေပိကာ၊ ဒွေ အဓိစ္စသမုပ္ပန္နိကာ၊ သောဠသ သညီဝါဒါ၊ အဋ္ဌ အသညီဝါဒါ၊ အဋ္ဌ နေဝသညီနာသညီဝါဒါ၊ သတ္တ ဥစ္ဆေဒဝါဒါ၊ ပဉ္စ ဒိဋ္ဌဓမ္မနိဗ္ဗာနဝါဒါ – ဣမာနိ ဒွါသဋ္ဌိ ဒိဋ္ဌိဂတာနိ ဗြဟ္မဇာလေ ဝေယျာကရဏေ ဝုတ္တာနိ ဘဂဝတာတိ.

ခုဒ္ဒကဝတ္ထုဝိဘင်္ဂေါ နိဋ္ဌိတော.