၉. နဝကနိဒ္ဒေသော

(၁) နဝ အာဃာတဝတ္ထူနိ

၉၆၀. တတ္ထ ကတမာနိ နဝ အာဃာတဝတ္ထူနိ? ‘‘အနတ္ထံ မေ အစရီ’’တိ အာဃာတော ဇာယတိ၊ ‘‘အနတ္ထံ မေ စရတီ’’တိ အာဃာတော ဇာယတိ၊ ‘‘အနတ္ထံ မေ စရိဿတီ’’တိ အာဃာတော ဇာယတိ၊ ‘‘ပိယဿ မေ မနာပဿ အနတ္ထံ အစရိ’’။ပေ။ အနတ္ထံ စရတိ။ပေ။ အနတ္ထံ စရိဿတီတိ အာဃာတော ဇာယတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ အတ္ထံ စရိဿတီတိ အာဃာတော ဇာယတိ. ဣမာနိ နဝ အာဃာတဝတ္ထူနိ.

(၂) နဝ ပုရိသမလာနိ

၉၆၁. တတ္ထ ကတမာနိ နဝ ပုရိသမလာနိ? ကောဓော၊ မက္ခော၊ ဣဿာ၊ မစ္ဆရိယံ၊ မာယာ၊ သာဌေယျံ၊ မုသာဝါဒေါ၊ ပါပိစ္ဆတာ၊ မိစ္ဆာဒိဋ္ဌိ – ဣမာနိ နဝ ပုရိသမလာနိ.

(၃) နဝဝိဓာ မာနာ

၉၆၂. တတ္ထ ကတမေ နဝဝိဓာ မာနာ? ‘‘သေယျဿ သေယျောဟမသ္မီ’’တိ မာနော၊ ‘‘သေယျဿ သဒိသောဟမသ္မီ’’တိ မာနော၊ ‘‘သေယျဿ ဟီနောဟမသ္မီ’’တိ မာနော၊ ‘‘သဒိသဿ သေယျောဟမသ္မီ’’တိ မာနော၊ ‘‘သဒိသဿ သဒိသောဟမသ္မီ’’တိ မာနော၊ ‘‘သဒိသဿ ဟီနောဟမသ္မီ’’တိ မာနော၊ ‘‘ဟီနဿ သေယျောဟမသ္မီ’’တိ မာနော၊ ‘‘ဟီနဿ သဒိသောဟမသ္မီ’’တိ မာနော၊ ‘‘ဟီနဿ ဟီနောဟမသ္မီ’’တိ မာနော – ဣမေ နဝဝိဓာ မာနာ.

(၄) နဝ တဏှာမူလကာ ဓမ္မာ

၉၆၃. တတ္ထ ကတမေ နဝ တဏှာမူလကာ ဓမ္မာ? တဏှံ ပဋိစ္စ ပရိယေသနာ၊ ပရိယေသနံ ပဋိစ္စ လာဘော၊ လာဘံ ပဋိစ္စ ဝိနိစ္ဆယော၊ ဝိနိစ္ဆယံ ပဋိစ္စ ဆန္ဒရာဂေါ၊ ဆန္ဒရာဂံ ပဋိစ္စ အဇ္ဈောသာနံ၊ အဇ္ဈောသာနံ ပဋိစ္စ ပရိဂ္ဂဟော၊ ပရိဂ္ဂဟံ ပဋိစ္စ မစ္ဆရိယံ၊ မစ္ဆရိယံ ပဋိစ္စ အာရက္ခော၊ အာရက္ခာဓိကရဏံ ဒဏ္ဍာဒါန-သတ္ထာဒါန-ကလဟ-ဝိဂ္ဂဟဝိဝါဒ-တုဝံတုဝံ-ပေသုည-မုသာဝါဒါ အနေကေ ပါပကာ အကုသလာ ဓမ္မာ သမ္ဘဝန္တိ – ဣမေ နဝ တဏှာမူလကာ ဓမ္မာ.

(၅) နဝ ဣဉ္ဇိတာနိ

၉၆၄. တတ္ထ ကတမာနိ နဝ ဣဉ္ဇိတာနိ? ‘‘အသ္မီ’’တိ ဣဉ္ဇိတမေတံ၊ ‘‘အဟမသ္မီ’’တိ ဣဉ္ဇိတမေတံ၊ ‘‘အယမဟမသ္မီ’’တိ ဣဉ္ဇိတမေတံ ‘‘ဘဝိဿ’’န္တိ ဣဉ္ဇိတမေတံ၊ ‘‘ရူပီ ဘဝိဿ’’န္တိ ဣဉ္ဇိတမေတံ၊ ‘‘အရူပီ ဘဝိဿ’’န္တိ ဣဉ္ဇိတမေတံ၊ ‘‘သညီ ဘဝိဿ’’န္တိ ဣဉ္ဇိတမေတံ၊ ‘‘အသညီ ဘဝိဿ’’န္တိ ဣဉ္ဇိတမေတံ၊ ‘‘နေဝသညီနာသညီ ဘဝိဿ’’န္တိ ဣဉ္ဇိတမေတံ – ဣမာနိ နဝ ဣဉ္ဇိတာနိ.

(၆-၉) နဝ မညိတာဒီနိ

၉၆၅. တတ္ထ ကတမာနိ နဝ မညိတာနိ။ နဝ ဖန္ဒိတာနိ။ နဝ ပပဉ္စိတာနိ။ နဝ သင်္ခတာနိ? ‘‘အသ္မီ’’တိ သင်္ခတမေတံ၊ ‘‘အဟမသ္မီ’’တိ သင်္ခတမေတံ၊ ‘‘အယမဟမသ္မီ’’တိ သင်္ခတမေတံ၊ ‘‘ဘဝိဿ’’န္တိ သင်္ခတမေတံ၊ ‘‘ရူပီ ဘဝိဿ’’န္တိ သင်္ခတမေတံ၊ ‘‘အရူပီ ဘဝိဿ’’န္တိ သင်္ခတမေတံ၊ ‘‘သညီ ဘဝိဿ’’န္တိ သင်္ခတမေတံ၊ ‘‘အသညီ ဘဝိဿ’’န္တိ သင်္ခတမေတံ၊ ‘‘နေဝသညီနာသညီ ဘဝိဿ’’န္တိ သင်္ခတမေတံ – ဣမာနိ နဝ သင်္ခတာနိ.

နဝကံ.