၂. အဘိဓမ္မဘာဇနီယံ

၄၇၂. သတ္တ ဗောဇ္ဈင်္ဂါ – သတိသမ္ဗောဇ္ဈင်္ဂေါ၊ ဓမ္မဝိစယသမ္ဗောဇ္ဈင်္ဂေါ၊ ဝီရိယသမ္ဗောဇ္ဈင်္ဂေါ၊ ပီတိသမ္ဗောဇ္ဈင်္ဂေါ၊ ပဿဒ္ဓိသမ္ဗောဇ္ဈင်္ဂေါ၊ သမာဓိသမ္ဗောဇ္ဈင်္ဂေါ၊ ဥပေက္ခာသမ္ဗောဇ္ဈင်္ဂေါ.

၄၇၃. တတ္ထ ကတမေ သတ္တ ဗောဇ္ဈင်္ဂါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ တသ္မိံ သမယေ သတ္တ ဗောဇ္ဈင်္ဂါ ဟောန္တိ – သတိသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ.

၄၇၄. တတ္ထ ကတမော သတိသမ္ဗောဇ္ဈင်္ဂေါ? ယာ သတိ အနုဿတိ။ပေ။ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သတိသမ္ဗောဇ္ဈင်္ဂေါ’’.

တတ္ထ ကတမော ဓမ္မဝိစယသမ္ဗောဇ္ဈင်္ဂေါ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘ဓမ္မဝိစယသမ္ဗောဇ္ဈင်္ဂေါ’’.

တတ္ထ ကတမော ဝီရိယသမ္ဗောဇ္ဈင်္ဂေါ? ယော စေတသိကော ဝီရိယာရမ္ဘော။ပေ။ သမ္မာဝါယာမော ဝီရိယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘ဝီရိယသမ္ဗောဇ္ဈင်္ဂေါ’’.

တတ္ထ ကတမော ပီတိသမ္ဗောဇ္ဈင်္ဂေါ? ယာ ပီတိ ပါမောဇ္ဇံ အာမောဒနာ ပမောဒနာ ဟာသော ပဟာသော ဝိတ္တိ ဩဒဂျံ [ဩဒဂ္ဂံ (သီ.) ဓ. သ. ၉] အတ္တမနတာ စိတ္တဿ ပီတိသမ္ဗောဇ္ဈင်္ဂေါ – အယံ ဝုစ္စတိ ‘‘ပီတိသမ္ဗောဇ္ဈင်္ဂေါ’’.

တတ္ထ ကတမော ပဿဒ္ဓိသမ္ဗောဇ္ဈင်္ဂေါ? ယာ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ ဝိညာဏက္ခန္ဓဿ ပဿဒ္ဓိ ပဋိပ္ပဿဒ္ဓိ ပဿမ္ဘနာ ပဋိပ္ပဿမ္ဘနာ ပဋိပ္ပဿမ္ဘိတတ္တံ ပဿဒ္ဓိသမ္ဗောဇ္ဈင်္ဂေါ – အယံ ဝုစ္စတိ ‘‘ပဿဒ္ဓိသမ္ဗောဇ္ဈင်္ဂေါ’’.

တတ္ထ ကတမော သမာဓိသမ္ဗောဇ္ဈင်္ဂေါ? ယာ စိတ္တဿ ဌိတိ။ပေ။ သမ္မာသမာဓိ သမာဓိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမာဓိသမ္ဗောဇ္ဈင်္ဂေါ’’.

တတ္ထ ကတမော ဥပေက္ခာသမ္ဗောဇ္ဈင်္ဂေါ? ယာ ဥပေက္ခာ ဥပေက္ခနာ အဇ္ဈုပေက္ခနာ မဇ္ဈတ္တတာ စိတ္တဿ ဥပေက္ခာသမ္ဗောဇ္ဈင်္ဂေါ – အယံ ဝုစ္စတိ ‘‘ဥပေက္ခာသမ္ဗောဇ္ဈင်္ဂေါ’’. ဣမေ ဝုစ္စန္တိ သတ္တ ဗောဇ္ဈင်္ဂါ. အဝသေသာ ဓမ္မာ သတ္တဟိ ဗောဇ္ဈင်္ဂေဟိ သမ္ပယုတ္တာ.

၄၇၅. သတ္တ ဗောဇ္ဈင်္ဂါ – သတိသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ.

၄၇၆. တတ္ထ ကတမော သတိသမ္ဗောဇ္ဈင်္ဂေါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ ယာ တသ္မိံ သမယေ သတိ အနုဿတိ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သတိသမ္ဗောဇ္ဈင်္ဂေါ’’. အဝသေသာ ဓမ္မာ သတိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ဓမ္မဝိစယသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ဝီရိယသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ပီတိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ပဿဒ္ဓိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ သမာဓိသမ္ဗောဇ္ဈင်္ဂသမ္ပယုတ္တာ.

တတ္ထ ကတမော ဥပေက္ခာသမ္ဗောဇ္ဈင်္ဂေါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ ယာ တသ္မိံ သမယေ ဥပေက္ခာ ဥပေက္ခနာ အဇ္ဈုပေက္ခနာ မဇ္ဈတ္တတာ စိတ္တဿ ဥပေက္ခာသမ္ဗောဇ္ဈင်္ဂေါ – အယံ ဝုစ္စတိ ‘‘ဥပေက္ခာသမ္ဗောဇ္ဈင်္ဂေါ’’. အဝသေသာ ဓမ္မာ ဥပေက္ခာသမ္ဗောဇ္ဈင်္ဂသမ္ပယုတ္တာ.

၄၇၇. သတ္တ ဗောဇ္ဈင်္ဂါ – သတိသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ.

၄၇၈. တတ္ထ ကတမေ သတ္တ ဗောဇ္ဈင်္ဂါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ ယော တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ – ဣမေ ဓမ္မာ ကုသလာ. တဿေဝ လောကုတ္တရဿ ကုသလဿ ဈာနဿ ကတတ္တာ ဘာဝိတတ္တာ ဝိပါကံ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ သုညတံ၊ တသ္မိံ သမယေ သတ္တ ဗောဇ္ဈင်္ဂါ ဟောန္တိ – သတိသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ.

၄၇၉. တတ္ထ ကတမော သတိသမ္ဗောဇ္ဈင်္ဂေါ? ယာ သတိ အနုဿတိ။ပေ။ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သတိသမ္ဗောဇ္ဈင်္ဂေါ’’။ပေ။.

တတ္ထ ကတမော ဥပေက္ခာသမ္ဗောဇ္ဈင်္ဂေါ? ယာ ဥပေက္ခာ ဥပေက္ခနာ အဇ္ဈုပေက္ခနာ မဇ္ဈတ္တတာ စိတ္တဿ ဥပေက္ခာသမ္ဗောဇ္ဈင်္ဂေါ – အယံ ဝုစ္စတိ ‘‘ဥပေက္ခာသမ္ဗောဇ္ဈင်္ဂေါ’’. ဣမေ ဝုစ္စန္တိ ‘‘သတ္တ ဗောဇ္ဈင်္ဂါ’’. အဝသေသာ ဓမ္မာ သတ္တဟိ ဗောဇ္ဈင်္ဂေဟိ သမ္ပယုတ္တာ.

၄၈၀. သတ္တ ဗောဇ္ဈင်္ဂါ – သတိသမ္ဗောဇ္ဈင်္ဂေါ။ပေ။ ဥပေက္ခာသမ္ဗောဇ္ဈင်္ဂေါ.

၄၈၁. တတ္ထ ကတမော သတိသမ္ဗောဇ္ဈင်္ဂေါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ. ဣမေ ဓမ္မာ ကုသလာ. တဿေဝ လောကုတ္တရဿ ကုသလဿ ဈာနဿ ကတတ္တာ ဘာဝိတတ္တာ ဝိပါကံ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ ယာ တသ္မိံ သမယေ သတိ အနုဿတိ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သတိသမ္ဗောဇ္ဈင်္ဂေါ’’. အဝသေသာ ဓမ္မာ သတိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ဓမ္မဝိစယသမ္ဗောဇ္ဈင်္ဂသမ္ပယုတ္တာ ။ပေ။ အဝသေသာ ဓမ္မာ ဝီရိယသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ပီတိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ ပဿဒ္ဓိသမ္ဗောဇ္ဈင်္ဂသမ္ပယုတ္တာ။ပေ။ အဝသေသာ ဓမ္မာ သမာဓိသမ္ဗောဇ္ဈင်္ဂသမ္ပယုတ္တာ.

တတ္ထ ကတမော ဥပေက္ခာသမ္ဗောဇ္ဈင်္ဂေါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ. ဣမေ ဓမ္မာ ကုသလာ. တဿေဝ လောကုတ္တရဿ ကုသလဿ ဈာနဿ ကတတ္တာ ဘာဝိတတ္တာ ဝိပါကံ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ သုညတံ၊ ယာ တသ္မိံ သမယေ ဥပေက္ခာ ဥပေက္ခနာ အဇ္ဈုပေက္ခနာ မဇ္ဈတ္တတာ စိတ္တဿ ဥပေက္ခာသမ္ဗောဇ္ဈင်္ဂေါ – အယံ ဝုစ္စတိ ‘‘ဥပေက္ခာသမ္ဗောဇ္ဈင်္ဂေါ’’. အဝသေသာ ဓမ္မာ ဥပေက္ခာသမ္ဗောဇ္ဈင်္ဂသမ္ပယုတ္တာ.

အဘိဓမ္မဘာဇနီယံ.