၃. ပဉှာပုစ္ဆကံ

၄၈၂. သတ္တ ဗောဇ္ဈင်္ဂါ – သတိသမ္ဗောဇ္ဈင်္ဂေါ၊ ဓမ္မဝိစယသမ္ဗောဇ္ဈင်္ဂေါ၊ ဝီရိယသမ္ဗောဇ္ဈင်္ဂေါ၊ ပီတိသမ္ဗောဇ္ဈင်္ဂေါ၊ ပဿဒ္ဓိသမ္ဗောဇ္ဈင်္ဂေါ၊ သမာဓိသမ္ဗောဇ္ဈင်္ဂေါ၊ ဥပေက္ခာသမ္ဗောဇ္ဈင်္ဂေါ.

၄၈၃. သတ္တန္နံ ဗောဇ္ဈင်္ဂါနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၄၈၄. သိယာ ကုသလာ၊ သိယာ အဗျာကတာ. ပီတိသမ္ဗောဇ္ဈင်္ဂေါ သုခါယ ဝေဒနာယ သမ္ပယုတ္တော၊ ဆ ဗောဇ္ဈင်္ဂါ သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. သိယာ ဝိပါကာ၊ သိယာ ဝိပါကဓမ္မဓမ္မာ. အနုပါဒိန္နအနုပါဒါနိယာ. အသံကိလိဋ္ဌအသံကိလေသိကာ. သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. ပီတိသမ္ဗောဇ္ဈင်္ဂေါ န ပီတိသဟဂတော၊ သုခသဟဂတော၊ န ဥပေက္ခာသဟဂတော၊ ဆ ဗောဇ္ဈင်္ဂါ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. နေဝ ဒဿနေန န ဘာဝနာယ ပဟာတဗ္ဗာ. နေဝ ဒဿနေန န ဘာဝနာယ ပဟာတဗ္ဗဟေတုကာ. သိယာ အပစယဂါမိနော၊ သိယာ နေဝါစယဂါမိနာပစယဂါမိနော. သိယာ သေက္ခာ၊ သိယာ အသေက္ခာ. အပ္ပမာဏာ. အပ္ပမာဏာရမ္မဏာ. ပဏီတာ. သိယာ သမ္မတ္တနိယတာ၊ သိယာ အနိယတာ. န မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ မဂ္ဂဟေတုကာတိပိ၊ မဂ္ဂါဓိပတိနောတိပိ. သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော. သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. န ဝတ္တဗ္ဗာ အတီတာရမ္မဏာတိပိ၊ အနာဂတာရမ္မဏာတိပိ၊ ပစ္စုပ္ပန္နာရမ္မဏာတိပိ. သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. ဗဟိဒ္ဓါရမ္မဏာ. အနိဒဿနအပ္ပဋိဃာ.

၂. ဒုကံ

၄၈၅. ဓမ္မဝိစယသမ္ဗောဇ္ဈင်္ဂေါ ဟေတု၊ ဆ ဗောဇ္ဈင်္ဂါ ဟေတုသမ္ပယုတ္တာ. ဓမ္မဝိစယသမ္ဗောဇ္ဈင်္ဂေါ ဟေတု စေဝ သဟေတုကော စ၊ ဆ ဗောဇ္ဈင်္ဂါ န ဝတ္တဗ္ဗာ ဟေတူ စေဝ သဟေတုကာ စာတိ၊ သဟေတုကာ စေဝ န စ ဟေတူ. ဓမ္မဝိစယသမ္ဗောဇ္ဈင်္ဂေါ ဟေတု စေဝ ဟေတုသမ္ပယုတ္တော စ၊ ဆ ဗောဇ္ဈင်္ဂါ န ဝတ္တဗ္ဗာ ဟေတူ စေဝ ဟေတုသမ္ပယုတ္တာ စာတိ၊ ဟေတုသမ္ပယုတ္တာ စေဝ န စ ဟေတူ. ဆ ဗောဇ္ဈင်္ဂါ န ဟေတူ သဟေတုကာ၊ ဓမ္မဝိစယသမ္ဗောဇ္ဈင်္ဂေါ န ဝတ္တဗ္ဗော န ဟေတုသဟေတုကောတိပိ၊ န ဟေတုအဟေတုကောတိပိ. သပ္ပစ္စယာ. သင်္ခတာ. အနိဒဿနာ. အပ္ပဋိဃာ. အရူပါ. လောကုတ္တရာ. ကေနစိ ဝိညေယျာ၊ ကေနစိ န ဝိညေယျာ. နော အာသဝါ. အနာသဝါ အာသဝဝိပ္ပယုတ္တာ. န ဝတ္တဗ္ဗာ အာသဝါ စေဝ သာသဝါ စာတိပိ၊ သာသဝါ စေဝ နော စ အာသဝါတိပိ. အာသဝါ စေဝ အာသဝသမ္ပယုတ္တာ စာတိပိ၊ အာသဝသမ္ပယုတ္တာ စေဝ နော စ အာသဝါတိပိ. အာသဝဝိပ္ပယုတ္တာ. အနာသဝါ. နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ။ပေ။ သာရမ္မဏာ. နော စိတ္တာ. စေတသိကာ. စိတ္တသမ္ပယုတ္တာ. စိတ္တသံသဋ္ဌာ. စိတ္တသမုဋ္ဌာနာ. စိတ္တသဟဘုနော. စိတ္တာနုပရိဝတ္တိနော. စိတ္တသံသဋ္ဌသမုဋ္ဌာနာ. စိတ္တသံသဋ္ဌသမုဋ္ဌာနသဟဘုနော. စိတ္တသံသဋ္ဌသမုဋ္ဌာနာနုပရိဝတ္တိနော. ဗာဟိရာ. နော ဥပါဒါ. အနုပါဒိန္နာ. နော ဥပါဒါနာ။ပေ။ နော ကိလေသာ။ပေ။ န ဒဿနေန ပဟာတဗ္ဗာ. န ဘာဝနာယ ပဟာတဗ္ဗာ. န ဒဿနေန ပဟာတဗ္ဗဟေတုကာ. န ဘာဝနာယ ပဟာတဗ္ဗဟေတုကာ. သိယာ သဝိတက္ကာ၊ သိယာ အဝိတက္ကာ. သိယာ သဝိစာရာ၊ သိယာ အဝိစာရာ.

ပီတိသမ္ဗောဇ္ဈင်္ဂေါ အပ္ပီတိကော၊ ဆ ဗောဇ္ဈင်္ဂါ သိယာ သပ္ပီတိကာ၊ သိယာ အပ္ပီတိကာ. ပီတိသမ္ဗောဇ္ဈင်္ဂေါ န ပီတိသဟဂတော၊ ဆ ဗောဇ္ဈင်္ဂါ သိယာ ပီတိသဟဂတာ၊ သိယာ န ပီတိသဟဂတာ. ပီတိသမ္ဗောဇ္ဈင်္ဂေါ သုခသဟဂတော၊ ဆ ဗောဇ္ဈင်္ဂါ သိယာ သုခသဟဂတာ၊ သိယာ န သုခသဟဂတာ. ပီတိသမ္ဗောဇ္ဈင်္ဂေါ န ဥပေက္ခာသဟဂတော၊ ဆ ဗောဇ္ဈင်္ဂါ သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ. န ကာမာဝစရာ. န ရူပါဝစရာ. န အရူပါဝစရာ. အပရိယာပန္နာ. သိယာ နိယျာနိကာ၊ သိယာ အနိယျာနိကာ. သိယာ နိယတာ၊ သိယာ အနိယတာ. အနုတ္တရာ. အရဏာတိ.

ပဉှာပုစ္ဆကံ.

ဗောဇ္ဈင်္ဂဝိဘင်္ဂေါ နိဋ္ဌိတော.