၅. ဝိညာဏက္ခန္ဓော

၁၂၁. တတ္ထ ကတမော ဝိညာဏက္ခန္ဓော? ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝိညာဏက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော.

စတုဗ္ဗိဓေန ဝိညာဏက္ခန္ဓော – အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော.

ပဉ္စဝိဓေန ဝိညာဏက္ခန္ဓော – အတ္ထိ သုခိန္ဒြိယသမ္ပယုတ္တော၊ အတ္ထိ ဒုက္ခိန္ဒြိယသမ္ပယုတ္တော၊ အတ္ထိ သောမနဿိန္ဒြိယသမ္ပယုတ္တော၊ အတ္ထိ ဒေါမနဿိန္ဒြိယသမ္ပယုတ္တော၊ အတ္ထိ ဥပေက္ခိန္ဒြိယသမ္ပယုတ္တော. ဧဝံ ပဉ္စဝိဓေန ဝိညာဏက္ခန္ဓော.

ဆဗ္ဗိဓေန ဝိညာဏက္ခန္ဓော – စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဝိညာဏံ. ဧဝံ ဆဗ္ဗိဓေန ဝိညာဏက္ခန္ဓော.

သတ္တဝိဓေန ဝိညာဏက္ခန္ဓော – စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဓာတု၊ မနောဝိညာဏဓာတု. ဧဝံ သတ္တဝိဓေန ဝိညာဏက္ခန္ဓော.

အဋ္ဌဝိဓေန ဝိညာဏက္ခန္ဓော – စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ အတ္ထိ သုခသဟဂတံ၊ အတ္ထိ ဒုက္ခသဟဂတံ၊ မနောဓာတု၊ မနောဝိညာဏဓာတု. ဧဝံ အဋ္ဌဝိဓေန ဝိညာဏက္ခန္ဓော.

နဝဝိဓေန ဝိညာဏက္ခန္ဓော – စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဓာတု၊ မနောဝိညာဏဓာတု အတ္ထိ ကုသလံ၊ အတ္ထိ အကုသလံ၊ အတ္ထိ အဗျာကတံ. ဧဝံ နဝဝိဓေန ဝိညာဏက္ခန္ဓော.

ဒသဝိဓေန ဝိညာဏက္ခန္ဓော – စက္ခုဝိညာဏံ။ပေ။ ကာယဝိညာဏံ အတ္ထိ သုခသဟဂတံ၊ အတ္ထိ ဒုက္ခသဟဂတံ၊ မနောဓာတု၊ မနောဝိညာဏဓာတု အတ္ထိ ကုသလံ၊ အတ္ထိ အကုသလံ၊ အတ္ထိ အဗျာကတံ. ဧဝံ ဒသဝိဓေန ဝိညာဏက္ခန္ဓော.

၁၂၂. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝိညာဏက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော. အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော. အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော. အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော. အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော. အတ္ထိ ပီတိသဟဂတော၊ အတ္ထိ သုခသဟဂတော၊ အတ္ထိ ဥပေက္ခာသဟဂတော. အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော. အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ. အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော. အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော. အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော. အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော. အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော. အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ. အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ. အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော. အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော. အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ. အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝိညာဏက္ခန္ဓော.

၁၂၃. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော. အတ္ထိ န ဟေတု သဟေတုကော၊ အတ္ထိ န ဟေတု အဟေတုကော. အတ္ထိ လောကိယော၊ အတ္ထိ လောကုတ္တရော. အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော. အတ္ထိ သာသဝေါ၊ အတ္ထိ အနာသဝေါ. အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော. အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ. အတ္ထိ သံယောဇနိယော၊ အတ္ထိ အသံယောဇနိယော. အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော. အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော.

အတ္ထိ ဂန္ထနိယော၊ အတ္ထိ အဂန္ထနိယော. အတ္ထိ ဂန္ထသမ္ပယုတ္တော၊ အတ္ထိ ဂန္ထဝိပ္ပယုတ္တော. အတ္ထိ ဂန္ထဝိပ္ပယုတ္တဂန္ထနိယော၊ အတ္ထိ ဂန္ထဝိပ္ပယုတ္တအဂန္ထနိယော. အတ္ထိ ဩဃနိယော၊ အတ္ထိ အနောဃနိယော. အတ္ထိ ဩဃသမ္ပယုတ္တော၊ အတ္ထိ ဩဃဝိပ္ပယုတ္တော. အတ္ထိ ဩဃဝိပ္ပယုတ္တဩဃနိယော၊ အတ္ထိ ဩဃဝိပ္ပယုတ္တအနောဃနိယော. အတ္ထိ ယောဂနိယော၊ အတ္ထိ အယောဂနိယော. အတ္ထိ ယောဂသမ္ပယုတ္တော၊ အတ္ထိ ယောဂဝိပ္ပယုတ္တော. အတ္ထိ ယောဂဝိပ္ပယုတ္တယောဂနိယော၊ အတ္ထိ ယောဂဝိပ္ပယုတ္တအယောဂနိယော. အတ္ထိ နီဝရဏိယော၊ အတ္ထိ အနီဝရဏိယော. အတ္ထိ နီဝရဏသမ္ပယုတ္တော၊ အတ္ထိ နီဝရဏဝိပ္ပယုတ္တော. အတ္ထိ နီဝရဏဝိပ္ပယုတ္တနီဝရဏိယော၊ အတ္ထိ နီဝရဏဝိပ္ပယုတ္တအနီဝရဏိယော.

အတ္ထိ ပရာမဋ္ဌော၊ အတ္ထိ အပရာမဋ္ဌော. အတ္ထိ ပရာမာသသမ္ပယုတ္တော၊ အတ္ထိ ပရာမာသဝိပ္ပယုတ္တော. အတ္ထိ ပရာမာသဝိပ္ပယုတ္တပရာမဋ္ဌော၊ အတ္ထိ ပရာမာသဝိပ္ပယုတ္တအပရာမဋ္ဌော. အတ္ထိ ဥပါဒိန္နော၊ အတ္ထိ အနုပါဒိန္နော. အတ္ထိ ဥပါဒါနိယော၊ အတ္ထိ အနုပါဒါနိယော. အတ္ထိ ဥပါဒါနသမ္ပယုတ္တော၊ အတ္ထိ ဥပါဒါနဝိပ္ပယုတ္တော. အတ္ထိ ဥပါဒါနဝိပ္ပယုတ္တဥပါဒါနိယော၊ အတ္ထိ ဥပါဒါနဝိပ္ပယုတ္တအနုပါဒါနိယော. အတ္ထိ သံကိလေသိကော၊ အတ္ထိ အသံကိလေသိကော. အတ္ထိ သံကိလိဋ္ဌော၊ အတ္ထိ အသံကိလိဋ္ဌော. အတ္ထိ ကိလေသသမ္ပယုတ္တော၊ အတ္ထိ ကိလေသဝိပ္ပယုတ္တော. အတ္ထိ ကိလေသဝိပ္ပယုတ္တသံကိလေသိကော၊ အတ္ထိ ကိလေသဝိပ္ပယုတ္တအသံကိလေသိကော. အတ္ထိ ဒဿနေန ပဟာတဗ္ဗော၊ အတ္ထိ န ဒဿနေန ပဟာတဗ္ဗော. အတ္ထိ ဘာဝနာယ ပဟာတဗ္ဗော၊ အတ္ထိ န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ န ဒဿနေန ပဟာတဗ္ဗဟေတုကော. အတ္ထိ ဘာဝနာယ ပဟာတဗ္ဗဟေတုကော၊ အတ္ထိ န ဘာဝနာယ ပဟာတဗ္ဗဟေတုကော.

အတ္ထိ သဝိတက္ကော၊ အတ္ထိ အဝိတက္ကော. အတ္ထိ သဝိစာရော၊ အတ္ထိ အဝိစာရော. အတ္ထိ သပ္ပီတိကော၊ အတ္ထိ အပ္ပီတိကော. အတ္ထိ ပီတိသဟဂတော၊ အတ္ထိ န ပီတိသဟဂတော. အတ္ထိ သုခသဟဂတော၊ အတ္ထိ န သုခသဟဂတော. အတ္ထိ ဥပေက္ခာသဟဂတော၊ အတ္ထိ န ဥပေက္ခာသဟဂတော. အတ္ထိ ကာမာဝစရော၊ အတ္ထိ န ကာမာဝစရော. အတ္ထိ ရူပါဝစရော၊ အတ္ထိ န ရူပါဝစရော. အတ္ထိ အရူပါဝစရော၊ အတ္ထိ န အရူပါဝစရော၊ အတ္ထိ ပရိယာပန္နော၊ အတ္ထိ အပရိယာပန္နော. အတ္ထိ နိယျာနိကော၊ အတ္ထိ အနိယျာနိကော. အတ္ထိ နိယတော၊ အတ္ထိ အနိယတော. အတ္ထိ သဥတ္တရော၊ အတ္ထိ အနုတ္တရော. အတ္ထိ သရဏော၊ အတ္ထိ အရဏော.

တိဝိဓေန ဝိညာဏက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝိညာဏက္ခန္ဓော.

၁၂၄. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သရဏော၊ အတ္ထိ အရဏော.

တိဝိဓေန ဝိညာဏက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော. အတ္ထိ ဝိပါကော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝိညာဏက္ခန္ဓော.

ဒုကမူလကံ.

၁၂၅. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သဟေတုကော၊ အတ္ထိ အဟေတုကော.

၁၂၆. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော။ပေ။ အတ္ထိ သရဏော၊ အတ္ထိ အရဏော.

၁၂၇. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သဟေတုကော၊ အတ္ထိ အဟေတုကော.

၁၂၈. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

တိဝိဓေန ဝိညာဏက္ခန္ဓော – အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝိညာဏက္ခန္ဓော.

တိကမူလကံ.

၁၂၉. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သဟေတုကော၊ အတ္ထိ အဟေတုကော.

၁၃၀. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၁. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ န ဟေတု သဟေတုကော၊ အတ္ထိ န ဟေတုအဟေတုကော.

တိဝိဓေန ဝိညာဏက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၂. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ လောကိယော၊ အတ္ထိ လောကုတ္တရော.

တိဝိဓေန ဝိညာဏက္ခန္ဓော – အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၃. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော.

တိဝိဓေန ဝိညာဏက္ခန္ဓော – အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၄. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သာသဝေါ၊ အတ္ထိ အနာသဝေါ.

တိဝိဓေန ဝိညာဏက္ခန္ဓော – အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၅. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ ပီတိသဟဂတော၊ အတ္ထိ သုခသဟဂတော၊ အတ္ထိ ဥပေက္ခာသဟဂတော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၆. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ.

တိဝိဓေန ဝိညာဏက္ခန္ဓော – အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၇. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သံယောဇနိယော၊ အတ္ထိ အသံယောဇနိယော.

တိဝိဓေန ဝိညာဏက္ခန္ဓော – အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၈. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ။ပေ။. ဧဝံ ဒသဝိဓေန ဝိညာဏက္ခန္ဓော.

၁၃၉. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော.

တိဝိဓေန ဝိညာဏက္ခန္ဓော – အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၀. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဂန္ထနိယော၊ အတ္ထိ အဂန္ထနိယော.

တိဝိဓေန ဝိညာဏက္ခန္ဓော – အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၁. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဂန္ထသမ္ပယုတ္တော၊ အတ္ထိ ဂန္ထဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၂. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဂန္ထဝိပ္ပယုတ္တဂန္ထနိယော၊ အတ္ထိ ဂန္ထဝိပ္ပယုတ္တအဂန္ထနိယော.

တိဝိဓေန ဝိညာဏက္ခန္ဓော – အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၃. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဩဃနိယော၊ အတ္ထိ အနောဃနိယော.

တိဝိဓေန ဝိညာဏက္ခန္ဓော – အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၄. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဩဃသမ္ပယုတ္တော၊ အတ္ထိ ဩဃဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၅. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ဩဃဝိပ္ပယုတ္တဩဃနိယော၊ အတ္ထိ ဩဃဝိပ္ပယုတ္တအနောဃနိယော.

တိဝိဓေန ဝိညာဏက္ခန္ဓော – အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၆. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ယောဂနိယော၊ အတ္ထိ အယောဂနိယော.

တိဝိဓေန ဝိညာဏက္ခန္ဓော – အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၇. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ယောဂသမ္ပယုတ္တော၊ အတ္ထိ ယောဂဝိပ္ပယုတ္တော.

တိဝိဓေန ဝိညာဏက္ခန္ဓော – အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၈. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ ယောဂဝိပ္ပယုတ္တယောဂနိယော၊ အတ္ထိ ယောဂဝိပ္ပယုတ္တအယောဂနိယော.

တိဝိဓေန ဝိညာဏက္ခန္ဓော – အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ။ပေ။. ဧဝံ ဒသဝိဓေန ဝိညာဏက္ခန္ဓော.

၁၄၉. ဧကဝိဓေန ဝိညာဏက္ခန္ဓော – ဖဿသမ္ပယုတ္တော.

ဒုဝိဓေန ဝိညာဏက္ခန္ဓော – အတ္ထိ နီဝရဏိယော၊ အတ္ထိ အနီဝရဏိယော.

ဥဘတောဝဍ္ဎကံ.

သတ္တဝိဓေန ဝိညာဏက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော. ဧဝံ သတ္တဝိဓေန ဝိညာဏက္ခန္ဓော.

အပရောပိ သတ္တဝိဓေန ဝိညာဏက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော. ဧဝံ သတ္တဝိဓေန ဝိညာဏက္ခန္ဓော.

စတုဝီသတိဝိဓေန ဝိညာဏက္ခန္ဓော – စက္ခုသမ္ဖဿပစ္စယာ ဝိညာဏက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ ဝိညာဏက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဝိညာဏံ. ဧဝံ စတုဝီသတိဝိဓေန ဝိညာဏက္ခန္ဓော.

အပရောပိ စတုဝီသတိဝိဓေန ဝိညာဏက္ခန္ဓော – စက္ခုသမ္ဖဿပစ္စယာ ဝိညာဏက္ခန္ဓော အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ စက္ခုဝိညာဏံ။ပေ။ ကာယဝိညာဏံ၊ မနောဝိညာဏံ၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ ဝိညာဏက္ခန္ဓော အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဝိညာဏံ. ဧဝံ စတုဝီသတိဝိဓေန ဝိညာဏက္ခန္ဓော.

တိံသတိဝိဓေန ဝိညာဏက္ခန္ဓော – စက္ခုသမ္ဖဿပစ္စယာ ဝိညာဏက္ခန္ဓော အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ သောတသမ္ဖဿပစ္စယာ ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ ဝိညာဏက္ခန္ဓော အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဝိညာဏံ. ဧဝံ တိံသတိဝိဓေန ဝိညာဏက္ခန္ဓော.

ဗဟုဝိဓေန ဝိညာဏက္ခန္ဓော – စက္ခုသမ္ဖဿပစ္စယာ ဝိညာဏက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုဝိညာဏံ။ပေ။ မနောဝိညာဏံ၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ ဝိညာဏက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုဝိညာဏံ။ပေ။ မနောဝိညာဏံ. ဧဝံ ဗဟုဝိဓေန ဝိညာဏက္ခန္ဓော.

အပရောပိ ဗဟုဝိဓေန ဝိညာဏက္ခန္ဓော – စက္ခုသမ္ဖဿပစ္စယာ ဝိညာဏက္ခန္ဓော အတ္ထိ သုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ ဝိညာဏက္ခန္ဓော အတ္ထိ သုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုဝိညာဏံ၊ သောတဝိညာဏံ၊ ဃာနဝိညာဏံ၊ ဇိဝှါဝိညာဏံ၊ ကာယဝိညာဏံ၊ မနောဝိညာဏံ. ဧဝံ ဗဟုဝိဓေန ဝိညာဏက္ခန္ဓော.

အယံ ဝုစ္စတိ ဝိညာဏက္ခန္ဓော.

အဘိဓမ္မဘာဇနီယံ.