၃. ပဉှာပုစ္ဆကံ

၁၅၀. ပဉ္စက္ခန္ဓာ – ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော.

၁၅၁. ပဉ္စန္နံ ခန္ဓာနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၁၅၂. ရူပက္ခန္ဓော အဗျာကတော. စတ္တာရော ခန္ဓာ သိယာ ကုသလာ၊ သိယာ အကုသလာ၊ သိယာ အဗျာကတာ. ဒွေ ခန္ဓာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ၊ ‘‘ဒုက္ခာယ ဝေဒနာယ သမ္ပယုတ္တာ’’တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ. တယော ခန္ဓာ သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. ရူပက္ခန္ဓော နေဝဝိပါကနဝိပါကဓမ္မဓမ္မော. စတ္တာရော ခန္ဓာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. ရူပက္ခန္ဓော သိယာ ဥပါဒိန္နုပါဒါနိယော၊ သိယာ အနုပါဒိန္နုပါဒါနိယော. စတ္တာရော ခန္ဓာ သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ၊ သိယာ အနုပါဒိန္နအနုပါဒါနိယာ.

ရူပက္ခန္ဓော အသံကိလိဋ္ဌသံကိလေသိကော. စတ္တာရော ခန္ဓာ သိယာ သံကိလိဋ္ဌသံကိလေသိကာ၊ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. ရူပက္ခန္ဓော အဝိတက္ကအဝိစာရော. တယော ခန္ဓာ သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. သင်္ခါရက္ခန္ဓော သိယာ သဝိတက္ကသဝိစာရော၊ သိယာ အဝိတက္ကဝိစာရမတ္တော၊ သိယာ အဝိတက္ကအဝိစာရော၊ သိယာ န ဝတ္တဗ္ဗော – ‘‘သဝိတက္ကသဝိစာရော’’တိပိ၊ ‘‘အဝိတက္ကဝိစာရမတ္တော’’တိပိ၊ ‘‘အဝိတက္ကအဝိစာရော’’တိပိ. ရူပက္ခန္ဓော န ဝတ္တဗ္ဗော – ‘‘ပီတိသဟဂတော’’တိပိ၊ ‘‘သုခသဟဂတော’’တိပိ၊ ‘‘ဥပေက္ခာသဟဂတော’’တိပိ. ဝေဒနာက္ခန္ဓော သိယာ ပီတိသဟဂတော န သုခသဟဂတော န ဥပေက္ခာသဟဂတော၊ သိယာ န ဝတ္တဗ္ဗော – ‘‘ပီတိသဟဂတော’’တိ. တယော ခန္ဓာ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ၊ သိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ.

ရူပက္ခန္ဓော နေဝ ဒဿနေန န ဘာဝနာယ ပဟာတဗ္ဗော. စတ္တာရော ခန္ဓာ သိယာ ဒဿနေန ပဟာတဗ္ဗာ၊ သိယာ ဘာဝနာယ ပဟာတဗ္ဗာ၊ သိယာ နေဝ ဒဿနေန န ဘာဝနာယ ပဟာတဗ္ဗာ. ရူပက္ခန္ဓော နေဝ ဒဿနေန န ဘာဝနာယ ပဟာတဗ္ဗဟေတုကော. စတ္တာရော ခန္ဓာ သိယာ ဒဿနေန ပဟာတဗ္ဗဟေတုကာ၊ သိယာ ဘာဝနာယ ပဟာတဗ္ဗဟေတုကာ၊ သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ. ရူပက္ခန္ဓော နေဝါစယဂါမိနာပစယဂါမီ. စတ္တာရော ခန္ဓာ သိယာ အာစယဂါမိနော၊ သိယာ အပစယဂါမိနော၊ သိယာ နေဝါစယဂါမိနာပစယဂါမိနော. ရူပက္ခန္ဓော နေဝသေက္ခနာသေက္ခော. စတ္တာရော ခန္ဓာ သိယာ သေက္ခာ၊ သိယာ အသေက္ခာ၊ သိယာ နေဝသေက္ခနာသေက္ခာ. ရူပက္ခန္ဓော ပရိတ္တော. စတ္တာရော ခန္ဓာ သိယာ ပရိတ္တာ၊ သိယာ မဟဂ္ဂတာ၊ သိယာ အပ္ပမာဏာ. ရူပက္ခန္ဓော အနာရမ္မဏော. စတ္တာရော ခန္ဓာ သိယာ ပရိတ္တာရမ္မဏာ၊ သိယာ မဟဂ္ဂတာရမ္မဏာ၊ သိယာ အပ္ပမာဏာရမ္မဏာ၊ သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ၊ ‘‘မဟဂ္ဂတာရမ္မဏာ’’တိပိ၊ ‘‘အပ္ပမာဏာရမ္မဏာ’’တိပိ. ရူပက္ခန္ဓော မဇ္ဈိမော. စတ္တာရော ခန္ဓာ သိယာ ဟီနာ၊ သိယာ မဇ္ဈိမာ၊ သိယာ ပဏီတာ. ရူပက္ခန္ဓော အနိယတော. စတ္တာရော ခန္ဓာ သိယာ မိစ္ဆတ္တနိယတာ၊ သိယာ သမ္မတ္တနိယတာ၊ သိယာ အနိယတာ.

ရူပက္ခန္ဓော အနာရမ္မဏော. စတ္တာရော ခန္ဓာ သိယာ မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ၊ သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော၊ သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. ရူပက္ခန္ဓော အနာရမ္မဏော. စတ္တာရော ခန္ဓာ သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ သိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ၊ သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. ရူပက္ခန္ဓော အနာရမ္မဏော. စတ္တာရော ခန္ဓာ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ၊ ‘‘ဗဟိဒ္ဓါရမ္မဏာ’’တိပိ၊ ‘‘အဇ္ဈတ္တဗဟိဒ္ဓါရမ္မဏာ’’တိပိ. စတ္တာရော ခန္ဓာ အနိဒဿနအပ္ပဋိဃာ. ရူပက္ခန္ဓော သိယာ သနိဒဿနသပ္ပဋိဃော၊ သိယာ အနိဒဿနသပ္ပဋိဃော၊ သိယာ အနိဒဿနအပ္ပဋိဃော.

၂. ဒုကံ

၁၅၃. စတ္တာရော ခန္ဓာ န ဟေတူ. သင်္ခါရက္ခန္ဓော သိယာ ဟေတု၊ သိယာ န ဟေတု. ရူပက္ခန္ဓော အဟေတုကော. စတ္တာရော ခန္ဓာ သိယာ သဟေတုကာ၊ သိယာ အဟေတုကာ. ရူပက္ခန္ဓော ဟေတုဝိပ္ပယုတ္တော. စတ္တာရော ခန္ဓာ သိယာ ဟေတုသမ္ပယုတ္တာ၊ သိယာ ဟေတုဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘ဟေတု စေဝ သဟေတုကော စာ’’တိပိ၊ ‘‘သဟေတုကော စေဝ န စ ဟေတူ’’တိပိ. တယော ခန္ဓာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိ၊ သိယာ သဟေတုကာ စေဝ န စ ဟေတူ၊ သိယာ န ဝတ္တဗ္ဗာ – ‘‘သဟေတုကာ စေဝ န စ ဟေတူ’’တိ. သင်္ခါရက္ခန္ဓော သိယာ ဟေတု စေဝ သဟေတုကော စ၊ သိယာ သဟေတုကော စေဝ န စ ဟေတု၊ သိယာ န ဝတ္တဗ္ဗော – ‘‘ဟေတု စေဝ သဟေတုကော စာ’’တိပိ၊ ‘‘သဟေတုကော စေဝ န စ ဟေတူ’’တိပိ. ရူပက္ခန္ဓော န ဝတ္တဗ္ဗော – ‘‘ဟေတု စေဝ ဟေတုသမ္ပယုတ္တော စာ’’တိပိ၊ ‘‘ဟေတုသမ္ပယုတ္တော စေဝ န စ ဟေတူ’’တိပိ. တယော ခန္ဓာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိ၊ သိယာ ဟေတုသမ္ပယုတ္တာ စေဝ န စ ဟေတူ၊ သိယာ န ဝတ္တဗ္ဗာ – ‘‘ဟေတုသမ္ပယုတ္တာ စေဝ န စ ဟေတူ’’တိ. သင်္ခါရက္ခန္ဓော သိယာ ဟေတု စေဝ ဟေတုသမ္ပယုတ္တော စ၊ သိယာ ဟေတုသမ္ပယုတ္တော စေဝ န စ ဟေတု၊ သိယာ န ဝတ္တဗ္ဗော – ‘‘ဟေတု စေဝ ဟေတုသမ္ပယုတ္တော စာ’’တိပိ၊ ‘‘ဟေတုသမ္ပယုတ္တော စေဝ န စ ဟေတူ’’တိပိ. ရူပက္ခန္ဓော န ဟေတု အဟေတုကော. တယော ခန္ဓာ သိယာ န ဟေတူ သဟေတုကာ၊ သိယာ န ဟေတူ အဟေတုကာ. သင်္ခါရက္ခန္ဓော သိယာ န ဟေတု သဟေတုကော၊ သိယာ န ဟေတု အဟေတုကော၊ သိယာ န ဝတ္တဗ္ဗော – ‘‘န ဟေတု သဟေတုကော’’တိပိ၊ ‘‘န ဟေတု အဟေတုကော’’တိပိ.

သပ္ပစ္စယာ၊ သင်္ခတာ.

စတ္တာရော ခန္ဓာ အနိဒဿနာ. ရူပက္ခန္ဓော သိယာ သနိဒဿနော၊ သိယာ အနိဒဿနော. စတ္တာရော ခန္ဓာ အပ္ပဋိဃာ. ရူပက္ခန္ဓော သိယာ သပ္ပဋိဃော၊ သိယာ အပ္ပဋိဃော. ရူပက္ခန္ဓော ရူပံ. စတ္တာရော ခန္ဓာ အရူပါ. ရူပက္ခန္ဓော လောကိယော. စတ္တာရော ခန္ဓာ သိယာ လောကိယာ၊ သိယာ လောကုတ္တရာ၊ ကေနစိ ဝိညေယျာ၊ ကေနစိ န ဝိညေယျာ.

စတ္တာရော ခန္ဓာ နော အာသဝါ. သင်္ခါရက္ခန္ဓော သိယာ အာသဝေါ၊ သိယာ နော အာသဝေါ. ရူပက္ခန္ဓော သာသဝေါ. စတ္တာရော ခန္ဓာ သိယာ သာသဝါ၊ သိယာ အနာသဝါ. ရူပက္ခန္ဓော အာသဝဝိပ္ပယုတ္တော. စတ္တာရော ခန္ဓာ သိယာ အာသဝသမ္ပယုတ္တာ၊ သိယာ အာသဝဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘အာသဝေါ စေဝ သာသဝေါ စာ’’တိ၊ သာသဝေါ စေဝ နော စ အာသဝေါ. တယော ခန္ဓာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ၊ သိယာ သာသဝါ စေဝ နော စ အာသဝါ၊ သိယာ န ဝတ္တဗ္ဗာ – ‘‘သာသဝါ စေဝ နော စ အာသဝါ’’တိ. သင်္ခါရက္ခန္ဓော သိယာ အာသဝေါ စေဝ သာသဝေါ စ၊ သိယာ သာသဝေါ စေဝ နော စ အာသဝေါ၊ သိယာ န ဝတ္တဗ္ဗော – ‘‘အာသဝေါ စေဝ သာသဝေါ စာ’’တိပိ၊ ‘‘သာသဝေါ စေဝ နော စ အာသဝေါ’’တိပိ. ရူပက္ခန္ဓော န ဝတ္တဗ္ဗော – ‘‘အာသဝေါ စေဝ အာသဝသမ္ပယုတ္တော စာ’’တိပိ၊ ‘‘အာသဝသမ္ပယုတ္တော စေဝ နော စ အာသဝေါ’’တိပိ. တယော ခန္ဓာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိ၊ သိယာ အာသဝသမ္ပယုတ္တာ စေဝ နော စ အာသဝါ၊ သိယာ န ဝတ္တဗ္ဗာ – ‘‘အာသဝသမ္ပယုတ္တာ စေဝ နော စ အာသဝါ’’တိ. သင်္ခါရက္ခန္ဓော သိယာ အာသဝေါ စေဝ အာသဝသမ္ပယုတ္တော စ၊ သိယာ အာသဝသမ္ပယုတ္တော စေဝ နော စ အာသဝေါ၊ သိယာ န ဝတ္တဗ္ဗော – ‘‘အာသဝေါ စေဝ အာသဝသမ္ပယုတ္တော စာ’’တိပိ၊ ‘‘အာသဝသမ္ပယုတ္တော စေဝ နော စ အာသဝေါ’’တိပိ. ရူပက္ခန္ဓော အာသဝဝိပ္ပယုတ္တသာသဝေါ. စတ္တာရော ခန္ဓာ သိယာ အာသဝဝိပ္ပယုတ္တသာသဝါ၊ သိယာ အာသဝဝိပ္ပယုတ္တအနာသဝါ၊ သိယာ န ဝတ္တဗ္ဗာ – ‘‘အာသဝဝိပ္ပယုတ္တသာသဝါ’’တိပိ၊ ‘‘အာသဝဝိပ္ပယုတ္တအနာသဝါ’’တိပိ.

စတ္တာရော ခန္ဓာ နော သံယောဇနာ. သင်္ခါရက္ခန္ဓော သိယာ သံယောဇနံ၊ သိယာ နော သံယောဇနံ. ရူပက္ခန္ဓော သံယောဇနိယော. စတ္တာရော ခန္ဓာ သိယာ သံယောဇနိယာ၊ သိယာ အသံယောဇနိယာ. ရူပက္ခန္ဓော သံယောဇနဝိပ္ပယုတ္တော. စတ္တာရော ခန္ဓာ သိယာ သံယောဇနသမ္ပယုတ္တာ၊ သိယာ သံယောဇနဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘သံယောဇနဉ္စေဝ သံယောဇနိယော စာ’’တိ၊ ‘‘သံယောဇနိယော စေဝ နော စ သံယောဇနံ’’. တယော ခန္ဓာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ၊ သိယာ သံယောဇနိယာ စေဝ နော စ သံယောဇနာ၊ သိယာ န ဝတ္တဗ္ဗာ – ‘‘သံယောဇနိယာ စေဝ နော စ သံယောဇနာ’’တိ. သင်္ခါရက္ခန္ဓော သိယာ သံယောဇနဉ္စေဝ သံယောဇနိယော စ၊ သိယာ သံယောဇနိယော စေဝ နော စ သံယောဇနံ၊ သိယာ န ဝတ္တဗ္ဗော – ‘‘သံယောဇနဉ္စေဝ သံယောဇနိယော စာ’’တိပိ၊ ‘‘သံယောဇနိယော စေဝ နော စ သံယောဇန’’န္တိပိ. ရူပက္ခန္ဓော န ဝတ္တဗ္ဗော – ‘‘သံယောဇနဉ္စေဝ သံယောဇနသမ္ပယုတ္တော စာ’’တိပိ၊ ‘‘သံယောဇနသမ္ပယုတ္တော စေဝ နော စ သံယောဇန’’န္တိပိ. တယော ခန္ဓာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိ၊ သိယာ သံယောဇနသမ္ပယုတ္တာ စေဝ နော စ သံယောဇနာ၊ သိယာ န ဝတ္တဗ္ဗာ – ‘‘သံယောဇနသမ္ပယုတ္တာ စေဝ နော စ သံယောဇနာ’’တိ. သင်္ခါရက္ခန္ဓော သိယာ သံယောဇနဉ္စေဝ သံယောဇနသမ္ပယုတ္တော စ၊ သိယာ သံယောဇနသမ္ပယုတ္တော စေဝ နော စ သံယောဇနံ၊ သိယာ န ဝတ္တဗ္ဗော – ‘‘သံယောဇနဉ္စေဝ သံယောဇနသမ္ပယုတ္တော စာ’’တိပိ၊ ‘‘သံယောဇနသမ္ပယုတ္တော စေဝ နော စ သံယောဇန’’န္တိပိ. ရူပက္ခန္ဓော သံယောဇနဝိပ္ပယုတ္တသံယောဇနိယော. စတ္တာရော ခန္ဓာ သိယာ သံယောဇနဝိပ္ပယုတ္တသံယောဇနိယာ၊ သိယာ သံယောဇနဝိပ္ပယုတ္တအသံယောဇနိယာ၊ သိယာ န ဝတ္တဗ္ဗာ – ‘‘သံယောဇနဝိပ္ပယုတ္တသံယောဇနိယာ’’တိပိ၊ ‘‘သံယောဇနဝိပ္ပယုတ္တအသံယောဇနိယာ’’တိပိ.

စတ္တာရော ခန္ဓာ နော ဂန္ထာ. သင်္ခါရက္ခန္ဓော သိယာ ဂန္ထော၊ သိယာ နော ဂန္ထော. ရူပက္ခန္ဓော ဂန္ထနိယော. စတ္တာရော ခန္ဓာ သိယာ ဂန္ထနိယာ၊ သိယာ အဂန္ထနိယာ. ရူပက္ခန္ဓော ဂန္ထဝိပ္ပယုတ္တော. စတ္တာရော ခန္ဓာ သိယာ ဂန္ထသမ္ပယုတ္တာ၊ သိယာ ဂန္ထဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘ဂန္ထော စေဝ ဂန္ထနိယော စာ’’တိ၊ ‘‘ဂန္ထနိယော စေဝ နော စ ဂန္ထော’’. တယော ခန္ဓာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ၊ သိယာ ဂန္ထနိယာ စေဝ နော စ ဂန္ထာ၊ သိယာ န ဝတ္တဗ္ဗာ – ‘‘ဂန္ထနိယာ စေဝ နော စ ဂန္ထာ’’တိ. သင်္ခါရက္ခန္ဓော သိယာ ဂန္ထော စေဝ ဂန္ထနိယော စ၊ သိယာ ဂန္ထနိယော စေဝ နော စ ဂန္ထော၊ သိယာ န ဝတ္တဗ္ဗော – ‘‘ဂန္ထော စေဝ ဂန္ထနိယော စာ’’တိပိ၊ ‘‘ဂန္ထနိယော စေဝ နော စ ဂန္ထော’’တိပိ. ရူပက္ခန္ဓော န ဝတ္တဗ္ဗော – ‘‘ဂန္ထော စေဝ ဂန္ထသမ္ပယုတ္တော စာ’’တိပိ၊ ‘‘ဂန္ထသမ္ပယုတ္တော စေဝ နော စ ဂန္ထော’’တိပိ. တယော ခန္ဓာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိ၊ သိယာ ဂန္ထသမ္ပယုတ္တာ စေဝ နော စ ဂန္ထာ၊ သိယာ န ဝတ္တဗ္ဗာ – ‘‘ဂန္ထသမ္ပယုတ္တာ စေဝ နော စ ဂန္ထာ’’တိ. သင်္ခါရက္ခန္ဓော သိယာ ဂန္ထော စေဝ ဂန္ထသမ္ပယုတ္တော စ၊ သိယာ ဂန္ထသမ္ပယုတ္တော စေဝ နော စ ဂန္ထော၊ သိယာ န ဝတ္တဗ္ဗော – ‘‘ဂန္ထော စေဝ ဂန္ထသမ္ပယုတ္တော စာ’’တိပိ၊ ‘‘ဂန္ထသမ္ပယုတ္တော စေဝ နော စ ဂန္ထော’’တိ ပိ. ရူပက္ခန္ဓော ဂန္ထဝိပ္ပယုတ္တဂန္ထနိယော. စတ္တာရော ခန္ဓာ သိယာ ဂန္ထဝိပ္ပယုတ္တဂန္ထနိယာ၊ သိယာ ဂန္ထဝိပ္ပယုတ္တအဂန္ထနိယာ၊ သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ၊ ‘‘ဂန္ထဝိပ္ပယုတ္တအဂန္ထနိယာ’’တိပိ.

စတ္တာရော ခန္ဓာ နော ဩဃာ။ပေ။ နော ယောဂါ။ပေ။ နော နီဝရဏာ. သင်္ခါရက္ခန္ဓော သိယာ နီဝရဏံ၊ သိယာ နော နီဝရဏံ. ရူပက္ခန္ဓော နီဝရဏိယော. စတ္တာရော ခန္ဓာ သိယာ နီဝရဏိယာ၊ သိယာ အနီဝရဏိယာ. ရူပက္ခန္ဓော နီဝရဏဝိပ္ပယုတ္တော. စတ္တာရော ခန္ဓာ သိယာ နီဝရဏသမ္ပယုတ္တာ၊ သိယာ နီဝရဏဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘နီဝရဏဉ္စေဝ နီဝရဏိယော စာ’’တိ၊ ‘‘နီဝရဏိယော စေဝ နော စ နီဝရဏံ’’. တယော ခန္ဓာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ၊ သိယာ နီဝရဏိယာ စေဝ နော စ နီဝရဏာ၊ သိယာ န ဝတ္တဗ္ဗာ – ‘‘နီဝရဏိယာ စေဝ နော စ နီဝရဏာ’’တိ. သင်္ခါရက္ခန္ဓော သိယာ နီဝရဏဉ္စေဝ နီဝရဏိယော စ၊ သိယာ နီဝရဏိယော စေဝ နော စ နီဝရဏံ၊ သိယာ န ဝတ္တဗ္ဗော – ‘‘နီဝရဏဉ္စေဝ နီဝရဏိယော စာ’’တိပိ၊ ‘‘နီဝရဏိယော စေဝ နော စ နီဝရဏ’’န္တိပိ. ရူပက္ခန္ဓော န ဝတ္တဗ္ဗော – ‘‘နီဝရဏဉ္စေဝ နီဝရဏသမ္ပယုတ္တော စာ’’တိပိ၊ ‘‘နီဝရဏသမ္ပယုတ္တော စေဝ နော စ နီဝရဏ’’န္တိပိ. တယော ခန္ဓာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိ၊ သိယာ နီဝရဏသမ္ပယုတ္တာ စေဝ နော စ နီဝရဏာ၊ သိယာ န ဝတ္တဗ္ဗာ – ‘‘နီဝရဏသမ္ပယုတ္တာ စေဝ နော စ နီဝရဏာ’’တိ. သင်္ခါရက္ခန္ဓော သိယာ နီဝရဏဉ္စေဝ နီဝရဏသမ္ပယုတ္တော စ၊ သိယာ နီဝရဏသမ္ပယုတ္တော စေဝ နော စ နီဝရဏံ၊ သိယာ န ဝတ္တဗ္ဗော – ‘‘နီဝရဏဉ္စေဝ နီဝရဏသမ္ပယုတ္တော စာ’’တိပိ၊ ‘‘နီဝရဏသမ္ပယုတ္တော စေဝ နော စ နီဝရဏ’’န္တိပိ. ရူပက္ခန္ဓော နီဝရဏဝိပ္ပယုတ္တနီဝရဏိယော. စတ္တာရော ခန္ဓာ သိယာ နီဝရဏဝိပ္ပယုတ္တနီဝရဏိယာ၊ သိယာ နီဝရဏဝိပ္ပယုတ္တအနီဝရဏိယာ၊ သိယာ န ဝတ္တဗ္ဗာ – ‘‘နီဝရဏဝိပ္ပယုတ္တနီဝရဏိယာ’’တိပိ၊ ‘‘နီဝရဏဝိပ္ပယုတ္တအနီဝရဏိယာ’’တိပိ.

စတ္တာရော ခန္ဓာ နော ပရာမာသာ. သင်္ခါရက္ခန္ဓော သိယာ ပရာမာသော၊ သိယာ နော ပရာမာသော. ရူပက္ခန္ဓော ပရာမဋ္ဌော. စတ္တာရော ခန္ဓာ သိယာ ပရာမဋ္ဌာ၊ သိယာ အပရာမဋ္ဌာ. ရူပက္ခန္ဓော ပရာမာသဝိပ္ပယုတ္တော. တယော ခန္ဓာ သိယာ ပရာမာသသမ္ပယုတ္တာ၊ သိယာ ပရာမာသဝိပ္ပယုတ္တာ. သင်္ခါရက္ခန္ဓော သိယာ ပရာမာသသမ္ပယုတ္တော၊ သိယာ ပရာမာသဝိပ္ပယုတ္တော၊ သိယာ န ဝတ္တဗ္ဗော – ‘‘ပရာမာသသမ္ပယုတ္တော’’တိပိ၊ ‘‘ပရာမာသဝိပ္ပယုတ္တော’’တိပိ. ရူပက္ခန္ဓော န ဝတ္တဗ္ဗော – ‘‘ပရာမာသော စေဝ ပရာမဋ္ဌော စာ’’တိ၊ ‘‘ပရာမဋ္ဌော စေဝ နော စ ပရာမာသော’’. တယော ခန္ဓာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ၊ သိယာ ပရာမဋ္ဌာ စေဝ နော စ ပရာမာသာ၊ သိယာ န ဝတ္တဗ္ဗာ – ‘‘ပရာမဋ္ဌာ စေဝ နော စ ပရာမာသာ’’တိ. သင်္ခါရက္ခန္ဓော သိယာ ပရာမာသော စေဝ ပရာမဋ္ဌော စ၊ သိယာ ပရာမဋ္ဌော စေဝ နော စ ပရာမာသော၊ သိယာ န ဝတ္တဗ္ဗော – ‘‘ပရာမာသော စေဝ ပရာမဋ္ဌော စာ’’တိပိ၊ ‘‘ပရာမဋ္ဌော စေဝ နော စ ပရာမာသော’’တိပိ. ရူပက္ခန္ဓော ပရာမာသဝိပ္ပယုတ္တပရာမဋ္ဌော. စတ္တာရော ခန္ဓာ သိယာ ပရာမာသဝိပ္ပယုတ္တပရာမဋ္ဌာ၊ သိယာ ပရာမာသဝိပ္ပယုတ္တအပရာမဋ္ဌာ၊ သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ၊ ‘‘ပရာမာသဝိပ္ပယုတ္တအပရာမဋ္ဌာ’’တိပိ.

ရူပက္ခန္ဓော အနာရမ္မဏော. စတ္တာရော ခန္ဓာ သာရမ္မဏာ. ဝိညာဏက္ခန္ဓော စိတ္တံ. စတ္တာရော ခန္ဓာ နော စိတ္တာ. တယော ခန္ဓာ စေတသိကာ. ဒွေ ခန္ဓာ အစေတသိကာ. တယော ခန္ဓာ စိတ္တသမ္ပယုတ္တာ. ရူပက္ခန္ဓော စိတ္တဝိပ္ပယုတ္တော. ဝိညာဏက္ခန္ဓော န ဝတ္တဗ္ဗော – ‘‘စိတ္တေန သမ္ပယုတ္တော’’တိပိ၊ ‘‘စိတ္တေန ဝိပ္ပယုတ္တော’’တိပိ. တယော ခန္ဓာ စိတ္တသံသဋ္ဌာ. ရူပက္ခန္ဓော စိတ္တဝိသံသဋ္ဌော. ဝိညာဏက္ခန္ဓော န ဝတ္တဗ္ဗော – ‘‘စိတ္တေန သံသဋ္ဌော’’တိပိ၊ ‘‘စိတ္တေန ဝိသံသဋ္ဌော’’တိပိ. တယော ခန္ဓာ စိတ္တသမုဋ္ဌာနာ. ဝိညာဏက္ခန္ဓော နော စိတ္တသမုဋ္ဌာနော. ရူပက္ခန္ဓော သိယာ စိတ္တသမုဋ္ဌာနော၊ သိယာ နော စိတ္တသမုဋ္ဌာနော. တယော ခန္ဓာ စိတ္တသဟဘုနော. ဝိညာဏက္ခန္ဓော နော စိတ္တသဟဘူ. ရူပက္ခန္ဓော သိယာ စိတ္တသဟဘူ၊ သိယာ နော စိတ္တသဟဘူ. တယော ခန္ဓာ စိတ္တာနုပရိဝတ္တိနော. ဝိညာဏက္ခန္ဓော နော စိတ္တာနုပရိဝတ္တိ. ရူပက္ခန္ဓော သိယာ စိတ္တာနုပရိဝတ္တိ၊ သိယာ နော စိတ္တာနုပရိဝတ္တိ. တယော ခန္ဓာ စိတ္တသံသဋ္ဌသမုဋ္ဌာနာ. ဒွေ ခန္ဓာ နော စိတ္တသံသဋ္ဌသမုဋ္ဌာနာ. တယော ခန္ဓာ စိတ္တသံသဋ္ဌသမုဋ္ဌာနသဟဘုနော. ဒွေ ခန္ဓာ နော စိတ္တသံသဋ္ဌသမုဋ္ဌာနသဟဘုနော. တယော ခန္ဓာ စိတ္တသံသဋ္ဌသမုဋ္ဌာနာနုပရိဝတ္တိနော. ဒွေ ခန္ဓာ နော စိတ္တသံသဋ္ဌသမုဋ္ဌာနာနုပရိဝတ္တိနော.

ဝိညာဏက္ခန္ဓော အဇ္ဈတ္တိကော. တယော ခန္ဓာ ဗာဟိရာ. ရူပက္ခန္ဓော သိယာ အဇ္ဈတ္တိကော၊ သိယာ ဗာဟိရော. စတ္တာရော ခန္ဓာ နော ဥပါဒါ. ရူပက္ခန္ဓော သိယာ ဥပါဒါ၊ သိယာ နော ဥပါဒါ၊ သိယာ ဥပါဒိန္နာ၊ သိယာ အနုပါဒိန္နာ. စတ္တာရော ခန္ဓာ နော ဥပါဒါနာ. သင်္ခါရက္ခန္ဓော သိယာ ဥပါဒါနံ၊ သိယာ နော ဥပါဒါနံ. ရူပက္ခန္ဓော ဥပါဒါနိယော. စတ္တာရော ခန္ဓာ သိယာ ဥပါဒါနိယာ၊ သိယာ အနုပါဒါနိယာ. ရူပက္ခန္ဓော ဥပါဒါနဝိပ္ပယုတ္တော. စတ္တာရော ခန္ဓာ သိယာ ဥပါဒါနသမ္ပယုတ္တာ၊ သိယာ ဥပါဒါနဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘ဥပါဒါနဉ္စေဝ ဥပါဒါနိယော စာ’’တိ၊ ‘‘ဥပါဒါနိယော စေဝ နော စ ဥပါဒါနံ’’. တယော ခန္ဓာ န ဝတ္တဗ္ဗာ – ‘‘ဥပါဒါနဉ္စေဝ ဥပါဒါနိယာ စာ’’တိ၊ သိယာ ဥပါဒါနိယာ စေဝ နော စ ဥပါဒါနာ၊ သိယာ န ဝတ္တဗ္ဗာ – ‘‘ဥပါဒါနိယာ စေဝ နော စ ဥပါဒါနာ’’တိ. သင်္ခါရက္ခန္ဓော သိယာ ဥပါဒါနဉ္စေဝ ဥပါဒါနိယော စ၊ သိယာ ဥပါဒါနိယော စေဝ နော စ ဥပါဒါနံ၊ သိယာ န ဝတ္တဗ္ဗော – ‘‘ဥပါဒါနဉ္စေဝ ဥပါဒါနိယော စာ’’တိပိ၊ ‘‘ဥပါဒါနိယော စေဝ နော စ ဥပါဒါန’’န္တိပိ. ရူပက္ခန္ဓော န ဝတ္တဗ္ဗော – ‘‘ဥပါဒါနဉ္စေဝ ဥပါဒါနသမ္ပယုတ္တော စာ’’တိပိ၊ ‘‘ဥပါဒါနသမ္ပယုတ္တော စေဝ နော စ ဥပါဒါန’’န္တိပိ. တယော ခန္ဓာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိ၊ သိယာ ဥပါဒါနသမ္ပယုတ္တာ စေဝ နော စ ဥပါဒါနာ၊ သိယာ န ဝတ္တဗ္ဗာ – ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိ. သင်္ခါရက္ခန္ဓော သိယာ ဥပါဒါနဉ္စေဝ ဥပါဒါနသမ္ပယုတ္တော စ၊ သိယာ ဥပါဒါနသမ္ပယုတ္တော စေဝ နော စ ဥပါဒါနံ၊ သိယာ န ဝတ္တဗ္ဗော – ‘‘ဥပါဒါနဉ္စေဝ ဥပါဒါနသမ္ပယုတ္တော စာ’’တိပိ၊ ‘‘ဥပါဒါနသမ္ပယုတ္တော စေဝ နော စ ဥပါဒါန’’န္တိပိ. ရူပက္ခန္ဓော ဥပါဒါနဝိပ္ပယုတ္တဥပါဒါနိယော. စတ္တာရော ခန္ဓာ သိယာ ဥပါဒါနဝိပ္ပယုတ္တဥပါဒါနိယာ၊ သိယာ ဥပါဒါနဝိပ္ပယုတ္တအနုပါဒါနိယာ၊ သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ၊ ‘‘ဥပါဒါနဝိပ္ပယုတ္တအနုပါဒါနိယာ’’တိပိ.

စတ္တာရော ခန္ဓာ နော ကိလေသာ. သင်္ခါရက္ခန္ဓော သိယာ ကိလေသော၊ သိယာ နော ကိလေသော. ရူပက္ခန္ဓော သံကိလေသိကော. စတ္တာရော ခန္ဓာ သိယာ သံကိလေသိကာ၊ သိယာ အသံကိလေသိကာ. ရူပက္ခန္ဓော အသံကိလိဋ္ဌော. စတ္တာရော ခန္ဓာ သိယာ သံကိလိဋ္ဌာ၊ သိယာ အသံကိလိဋ္ဌာ. ရူပက္ခန္ဓော ကိလေသဝိပ္ပယုတ္တော. စတ္တာရော ခန္ဓာ သိယာ ကိလေသသမ္ပယုတ္တာ၊ သိယာ ကိလေသဝိပ္ပယုတ္တာ. ရူပက္ခန္ဓော န ဝတ္တဗ္ဗော – ‘‘ကိလေသော စေဝ သံကိလေသိကော စာ’’တိ၊ ‘‘သံကိလေသိကော စေဝ နော စ ကိလေသော’’. တယော ခန္ဓာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ၊ သိယာ သံကိလေသိကာ စေဝ နော စ ကိလေသာ၊ သိယာ န ဝတ္တဗ္ဗာ – ‘‘သံကိလေသိကာ စေဝ နော စ ကိလေသာ’’တိ. သင်္ခါရက္ခန္ဓော သိယာ ကိလေသော စေဝ သံကိလေသိကော စ၊ သိယာ သံကိလေသိကော စေဝ နော စ ကိလေသော၊ သိယာ န ဝတ္တဗ္ဗော – ‘‘ကိလေသော စေဝ သံကိလေသိကော စာ’’တိပိ၊ ‘‘သံကိလေသိကော စေဝ နော စ ကိလေသော’’တိပိ. ရူပက္ခန္ဓော န ဝတ္တဗ္ဗော – ‘‘ကိလေသော စေဝ သံကိလိဋ္ဌော စာ’’တိပိ၊ ‘‘သံကိလိဋ္ဌော စေဝ နော စ ကိလေသော’’တိပိ. တယော ခန္ဓာ န ဝတ္တဗ္ဗာ – ‘‘ကိလေသော စေဝ သံကိလိဋ္ဌာ စာ’’တိ၊ သိယာ သံကိလိဋ္ဌာ စေဝ နော စ ကိလေသာ၊ သိယာ န ဝတ္တဗ္ဗာ – ‘‘သံကိလိဋ္ဌာ စေဝ နော စ ကိလေသာ’’တိ. သင်္ခါရက္ခန္ဓော သိယာ ကိလေသော စေဝ သံကိလိဋ္ဌော စ၊ သိယာ သံကိလိဋ္ဌော စေဝ နော စ ကိလေသော၊ သိယာ န ဝတ္တဗ္ဗော – ‘‘ကိလေသော စေဝ သံကိလိဋ္ဌော စာ’’တိပိ၊ ‘‘သံကိလိဋ္ဌော စေဝ နော စ ကိလေသော’’တိပိ.

ရူပက္ခန္ဓော န ဝတ္တဗ္ဗော – ‘‘ကိလေသော စေဝ ကိလေသသမ္ပယုတ္တော စာ’’တိပိ၊ ‘‘ကိလေသသမ္ပယုတ္တော စေဝ နော စ ကိလေသော’’တိပိ. တယော ခန္ဓာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိ၊ သိယာ ကိလေသသမ္ပယုတ္တာ စေဝ နော စ ကိလေသာ၊ သိယာ န ဝတ္တဗ္ဗာ – ကိလေသသမ္ပယုတ္တာ စေဝ နော စ ကိလေသာ’’တိ. သင်္ခါရက္ခန္ဓော သိယာ ကိလေသော စေဝ ကိလေသသမ္ပယုတ္တော စ၊ သိယာ ကိလေသသမ္ပယုတ္တော စေဝ နော စ ကိလေသော၊ သိယာ န ဝတ္တဗ္ဗော – ‘‘ကိလေသော စေဝ ကိလေသသမ္ပယုတ္တော စာ’’တိပိ၊ ‘‘ကိလေသသမ္ပယုတ္တော စေဝ နော စ ကိလေသော’’တိပိ. ရူပက္ခန္ဓော ကိလေသဝိပ္ပယုတ္တသံကိလေသိကော. စတ္တာရော ခန္ဓာ သိယာ ကိလေသဝိပ္ပယုတ္တသံကိလေသိကာ၊ သိယာ ကိလေသဝိပ္ပယုတ္တအသံကိလေသိကာ၊ သိယာ န ဝတ္တဗ္ဗာ – ‘‘ကိလေသဝိပ္ပယုတ္တသံကိလေသိကာ’’တိပိ၊ ‘‘ကိလေသဝိပ္ပယုတ္တအသံကိလေသိကာ’’တိပိ.

ရူပက္ခန္ဓော န ဒဿနေန ပဟာတဗ္ဗော. စတ္တာရော ခန္ဓာ သိယာ ဒဿနေန ပဟာတဗ္ဗာ၊ သိယာ န ဒဿနေန ပဟာတဗ္ဗာ. ရူပက္ခန္ဓော န ဘာဝနာယ ပဟာတဗ္ဗော. စတ္တာရော ခန္ဓာ သိယာ ဘာဝနာယ ပဟာတဗ္ဗာ၊ သိယာ န ဘာဝနာယ ပဟာတဗ္ဗာ. ရူပက္ခန္ဓော န ဒဿနေန ပဟာတဗ္ဗဟေတုကော. စတ္တာရော ခန္ဓာ သိယာ ဒဿနေန ပဟာတဗ္ဗဟေတုကာ၊ သိယာ န ဒဿနေန ပဟာတဗ္ဗဟေတုကာ. ရူပက္ခန္ဓော န ဘာဝနာယ ပဟာတဗ္ဗဟေတုကော. စတ္တာရော ခန္ဓာ သိယာ ဘာဝနာယ ပဟာတဗ္ဗဟေတုကာ၊ သိယာ န ဘာဝနာယ ပဟာတဗ္ဗဟေတုကာ. ရူပက္ခန္ဓော အဝိတက္ကော. စတ္တာရော ခန္ဓာ သိယာ သဝိတက္ကာ၊ သိယာ အဝိတက္ကာ. ရူပက္ခန္ဓော အဝိစာရော. စတ္တာရော ခန္ဓာ သိယာ သဝိစာရာ၊ သိယာ အဝိစာရာ. ရူပက္ခန္ဓော အပ္ပီတိကော၊ စတ္တာရော ခန္ဓာ သိယာ သပ္ပီတိကာ၊ သိယာ အပ္ပီတိကာ. ရူပက္ခန္ဓော န ပီတိသဟဂတော. စတ္တာရော ခန္ဓာ သိယာ ပီတိသဟဂတာ၊ သိယာ န ပီတိသဟဂတာ. ဒွေ ခန္ဓာ န သုခသဟဂတာ. တယော ခန္ဓာ သိယာ သုခသဟဂတာ၊ သိယာ န သုခသဟဂတာ. ဒွေ ခန္ဓာ န ဥပေက္ခာသဟဂတာ. တယော ခန္ဓာ သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ.

ရူပက္ခန္ဓော ကာမာဝစရော. စတ္တာရော ခန္ဓာ သိယာ ကာမာဝစရာ၊ သိယာ န ကာမာဝစရာ. ရူပက္ခန္ဓော န ရူပါဝစရော. စတ္တာရော ခန္ဓာ သိယာ ရူပါဝစရာ၊ သိယာ န ရူပါဝစရာ. ရူပက္ခန္ဓော န အရူပါဝစရော. စတ္တာရော ခန္ဓာ သိယာ အရူပါဝစရာ၊ သိယာ န အရူပါဝစရာ. ရူပက္ခန္ဓော ပရိယာပန္နော. စတ္တာရော ခန္ဓာ သိယာ ပရိယာပန္နာ၊ သိယာ အပရိယာပန္နာ. ရူပက္ခန္ဓော အနိယျာနိကော. စတ္တာရော ခန္ဓာ သိယာ နိယျာနိကာ၊ သိယာ အနိယျာနိကာ. ရူပက္ခန္ဓော အနိယတော. စတ္တာရော ခန္ဓာ သိယာ နိယတာ၊ သိယာ အနိယတာ. ရူပက္ခန္ဓော သဥတ္တရော. စတ္တာရော ခန္ဓာ သိယာ သဥတ္တရာ၊ သိယာ အနုတ္တရာ. ရူပက္ခန္ဓော အရဏော. စတ္တာရော ခန္ဓာ သိယာ သရဏာ၊ သိယာ အရဏာတိ.

ပဉှာပုစ္ဆကံ.

ခန္ဓဝိဘင်္ဂေါ နိဋ္ဌိတော.