၄. သင်္ခါရက္ခန္ဓော

၉၂. တတ္ထ ကတမော သင်္ခါရက္ခန္ဓော? ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ န ဟေတု.

တိဝိဓေန သင်္ခါရက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော.

စတုဗ္ဗိဓေန သင်္ခါရက္ခန္ဓော – အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော.

ပဉ္စဝိဓေန သင်္ခါရက္ခန္ဓော – အတ္ထိ သုခိန္ဒြိယသမ္ပယုတ္တော၊ အတ္ထိ ဒုက္ခိန္ဒြိယသမ္ပယုတ္တော၊ အတ္ထိ သောမနဿိန္ဒြိယသမ္ပယုတ္တော၊ အတ္ထိ ဒေါမနဿိန္ဒြိယသမ္ပယုတ္တော၊ အတ္ထိ ဥပေက္ခိန္ဒြိယသမ္ပယုတ္တော. ဧဝံ ပဉ္စဝိဓေန သင်္ခါရက္ခန္ဓော.

ဆဗ္ဗိဓေန သင်္ခါရက္ခန္ဓော – စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောသမ္ဖဿဇာ စေတနာ. ဧဝံ ဆဗ္ဗိဓေန သင်္ခါရက္ခန္ဓော.

သတ္တဝိဓေန သင်္ခါရက္ခန္ဓော – စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောဓာတုသမ္ဖဿဇာ စေတနာ၊ မနောဝိညာဏဓာတုသမ္ဖဿဇာ စေတနာ. ဧဝံ သတ္တဝိဓေန သင်္ခါရက္ခန္ဓော.

အဋ္ဌဝိဓေန သင်္ခါရက္ခန္ဓော – စက္ခုသမ္ဖဿဇာ စေတနာ။ပေ။ ကာယသမ္ဖဿဇာ စေတနာ အတ္ထိ သုခသဟဂတာ၊ အတ္ထိ ဒုက္ခသဟဂတာ၊ မနောဓာတုသမ္ဖဿဇာ စေတနာ၊ မနောဝိညာဏဓာတုသမ္ဖဿဇာ စေတနာ. ဧဝံ အဋ္ဌဝိဓေန သင်္ခါရက္ခန္ဓော.

နဝဝိဓေန သင်္ခါရက္ခန္ဓော – စက္ခုသမ္ဖဿဇာ စေတနာ။ပေ။ မနောဓာတုသမ္ဖဿဇာ စေတနာ၊ မနောဝိညာဏဓာတုသမ္ဖဿဇာ စေတနာ အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ နဝဝိဓေန သင်္ခါရက္ခန္ဓော.

ဒသဝိဓေန သင်္ခါရက္ခန္ဓော – စက္ခုသမ္ဖဿဇာ စေတနာ။ပေ။ ကာယသမ္ဖဿဇာ စေတနာ အတ္ထိ သုခသဟဂတာ၊ အတ္ထိ ဒုက္ခသဟဂတာ၊ မနောဓာတုသမ္ဖဿဇာ စေတနာ၊ မနောဝိညာဏဓာတုသမ္ဖဿဇာ စေတနာ အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ ဒသဝိဓေန သင်္ခါရက္ခန္ဓော.

၉၃. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ န ဟေတု.

တိဝိဓေန သင်္ခါရက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော. အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော. အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော. အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော. အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော. အတ္ထိ ပီတိသဟဂတော၊ အတ္ထိ သုခသဟဂတော၊ အတ္ထိ ဥပေက္ခာသဟဂတော. အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော. အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ. အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော. အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော. အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော. အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော. အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော. အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ. အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ. အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော. အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော. အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ. အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန သင်္ခါရက္ခန္ဓော.

၉၄. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သဟေတုကော၊ အတ္ထိ အဟေတုကော. အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော. အတ္ထိ ဟေတု စေဝ သဟေတုကော စ၊ အတ္ထိ သဟေတုကော စေဝ န စ ဟေတု. အတ္ထိ ဟေတု စေဝ ဟေတုသမ္ပယုတ္တော စ၊ အတ္ထိ ဟေတုသမ္ပယုတ္တော စေဝ န စ ဟေတု. အတ္ထိ န ဟေတု သဟေတုကော၊ အတ္ထိ န ဟေတု အဟေတုကော. အတ္ထိ လောကိယော၊ အတ္ထိ လောကုတ္တရော. အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော. အတ္ထိ အာသဝေါ၊ အတ္ထိ နော အာသဝေါ. အတ္ထိ သာသဝေါ၊ အတ္ထိ အနာသဝေါ. အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော. အတ္ထိ အာသဝေါ စေဝ သာသဝေါ စ၊ အတ္ထိ သာသဝေါ စေဝ နော စ အာသဝေါ. အတ္ထိ အာသဝေါ စေဝ အာသဝသမ္ပယုတ္တော စ၊ အတ္ထိ အာသဝသမ္ပယုတ္တော စေဝ နော စ အာသဝေါ. အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ. အတ္ထိ သံယောဇနံ၊ အတ္ထိ နော သံယောဇနံ. အတ္ထိ သံယောဇနိယော၊ အတ္ထိ အသံယောဇနိယော. အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော. အတ္ထိ သံယောဇနဉ္စေဝ သံယောဇနိယော စ၊ အတ္ထိ သံယောဇနိယော စေဝ နော စ သံယောဇနံ. အတ္ထိ သံယောဇနဉ္စေဝ သံယောဇနသမ္ပယုတ္တော စ၊ အတ္ထိ သံယောဇနသမ္ပယုတ္တော စေဝ နော စ သံယောဇနံ. အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော.

အတ္ထိ ဂန္ထော၊ အတ္ထိ နော ဂန္ထော. အတ္ထိ ဂန္ထနိယော၊ အတ္ထိ အဂန္ထနိယော. အတ္ထိ ဂန္ထသမ္ပယုတ္တော၊ အတ္ထိ ဂန္ထဝိပ္ပယုတ္တော. အတ္ထိ ဂန္ထော စေဝ ဂန္ထနိယော စ၊ အတ္ထိ ဂန္ထနိယော စေဝ နော စ ဂန္ထော. အတ္ထိ ဂန္ထော စေဝ ဂန္ထသမ္ပယုတ္တော စ၊ အတ္ထိ ဂန္ထသမ္ပယုတ္တော စေဝ နော စ ဂန္ထော. အတ္ထိ ဂန္ထဝိပ္ပယုတ္တဂန္ထနိယော၊ အတ္ထိ ဂန္ထဝိပ္ပယုတ္တအဂန္ထနိယော. အတ္ထိ ဩဃော၊ အတ္ထိ နော ဩဃော. အတ္ထိ ဩဃနိယော၊ အတ္ထိ အနောဃနိယော. အတ္ထိ ဩဃသမ္ပယုတ္တော၊ အတ္ထိ ဩဃဝိပ္ပယုတ္တော. အတ္ထိ ဩဃော စေဝ ဩဃနိယော စ၊ အတ္ထိ ဩဃနိယော စေဝ နော စ ဩဃော. အတ္ထိ ဩဃော စေဝ ဩဃသမ္ပယုတ္တော စ၊ အတ္ထိ ဩဃသမ္ပယုတ္တော စေဝ နော စ ဩဃော. အတ္ထိ ဩဃဝိပ္ပယုတ္တဩဃနိယော၊ အတ္ထိ ဩဃဝိပ္ပယုတ္တအနောဃနိယော. အတ္ထိ ယောဂေါ၊ အတ္ထိ နော ယောဂေါ. အတ္ထိ ယောဂနိယော၊ အတ္ထိ အယောဂနိယော. အတ္ထိ ယောဂသမ္ပယုတ္တော၊ အတ္ထိ ယောဂဝိပ္ပယုတ္တော. အတ္ထိ ယောဂေါ စေဝ ယောဂနိယော စ၊ အတ္ထိ ယောဂနိယော စေဝ နော စ ယောဂေါ. အတ္ထိ ယောဂေါ စေဝ ယောဂသမ္ပယုတ္တော စ၊ အတ္ထိ ယောဂသမ္ပယုတ္တော စေဝ နော စ ယောဂေါ. အတ္ထိ ယောဂဝိပ္ပယုတ္တယောဂနိယော၊ အတ္ထိ ယောဂဝိပ္ပယုတ္တအယောဂနိယော. အတ္ထိ နီဝရဏံ၊ အတ္ထိ နော နီဝရဏံ. အတ္ထိ နီဝရဏိယော၊ အတ္ထိ အနီဝရဏိယော. အတ္ထိ နီဝရဏသမ္ပယုတ္တော၊ အတ္ထိ နီဝရဏဝိပ္ပယုတ္တော. အတ္ထိ နီဝရဏဉ္စေဝ နီဝရဏိယော စ၊ အတ္ထိ နီဝရဏိယော စေဝ နော စ နီဝရဏံ. အတ္ထိ နီဝရဏဉ္စေဝ နီဝရဏသမ္ပယုတ္တော စ၊ အတ္ထိ နီဝရဏသမ္ပယုတ္တော စေဝ နော စ နီဝရဏံ. အတ္ထိ နီဝရဏဝိပ္ပယုတ္တနီဝရဏိယော၊ အတ္ထိ နီဝရဏဝိပ္ပယုတ္တအနီဝရဏိယော.

အတ္ထိ ပရာမာသော၊ အတ္ထိ နော ပရာမာသော. အတ္ထိ ပရာမဋ္ဌော၊ အတ္ထိ အပရာမဋ္ဌော. အတ္ထိ ပရာမာသသမ္ပယုတ္တော၊ အတ္ထိ ပရာမာသဝိပ္ပယုတ္တော. အတ္ထိ ပရာမာသော စေဝ ပရာမဋ္ဌော စ၊ အတ္ထိ ပရာမဋ္ဌော စေဝ နော စ ပရာမာသော. အတ္ထိ ပရာမာသဝိပ္ပယုတ္တပရာမဋ္ဌော၊ အတ္ထိ ပရာမာသဝိပ္ပယုတ္တအပရာမဋ္ဌော. အတ္ထိ ဥပါဒိန္နော၊ အတ္ထိ အနုပါဒိန္နော. အတ္ထိ ဥပါဒါနံ၊ အတ္ထိ နော ဥပါဒါနံ. အတ္ထိ ဥပါဒါနိယော၊ အတ္ထိ အနုပါဒါနိယော. အတ္ထိ ဥပါဒါနသမ္ပယုတ္တော၊ အတ္ထိ ဥပါဒါနဝိပ္ပယုတ္တော. အတ္ထိ ဥပါဒါနဉ္စေဝ ဥပါဒါနိယော စ၊ အတ္ထိ ဥပါဒါနိယော စေဝ နော စ ဥပါဒါနံ. အတ္ထိ ဥပါဒါနဉ္စေဝ ဥပါဒါနသမ္ပယုတ္တော စ၊ အတ္ထိ ဥပါဒါနသမ္ပယုတ္တော စေဝ နော စ ဥပါဒါနံ. အတ္ထိ ဥပါဒါနဝိပ္ပယုတ္တဥပါဒါနိယော၊ အတ္ထိ ဥပါဒါနဝိပ္ပယုတ္တအနုပါဒါနိယော.

အတ္ထိ ကိလေသော၊ အတ္ထိ နော ကိလေသော. အတ္ထိ သံကိလေသိကော၊ အတ္ထိ အသံကိလေသိကော. အတ္ထိ သံကိလိဋ္ဌော၊ အတ္ထိ အသံကိလိဋ္ဌော. အတ္ထိ ကိလေသသမ္ပယုတ္တော၊ အတ္ထိ ကိလေသဝိပ္ပယုတ္တော. အတ္ထိ ကိလေသော စေဝ သံကိလေသိကော စ၊ အတ္ထိ သံကိလေသိကော စေဝ နော စ ကိလေသော. အတ္ထိ ကိလေသော စေဝ သံကိလိဋ္ဌော စ၊ အတ္ထိ သံကိလိဋ္ဌော စေဝ နော စ ကိလေသော. အတ္ထိ ကိလေသော စေဝ ကိလေသသမ္ပယုတ္တော စ၊ အတ္ထိ ကိလေသသမ္ပယုတ္တော စေဝ နော စ ကိလေသော. အတ္ထိ ကိလေသဝိပ္ပယုတ္တသံကိလေသိကော၊ အတ္ထိ ကိလေသဝိပ္ပယုတ္တအသံကိလေသိကော. အတ္ထိ ဒဿနေန ပဟာတဗ္ဗော၊ အတ္ထိ န ဒဿနေန ပဟာတဗ္ဗော. အတ္ထိ ဘာဝနာယ ပဟာတဗ္ဗော၊ အတ္ထိ န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ န ဒဿနေန ပဟာတဗ္ဗဟေတုကော. အတ္ထိ ဘာဝနာယ ပဟာတဗ္ဗဟေတုကော၊ အတ္ထိ န ဘာဝနာယ ပဟာတဗ္ဗဟေတုကော.

အတ္ထိ သဝိတက္ကော၊ အတ္ထိ အဝိတက္ကော. အတ္ထိ သဝိစာရော၊ အတ္ထိ အဝိစာရော. အတ္ထိ သပ္ပီတိကော၊ အတ္ထိ အပ္ပီတိကော. အတ္ထိ ပီတိသဟဂတော၊ အတ္ထိ န ပီတိသဟဂတော. အတ္ထိ သုခသဟဂတော၊ အတ္ထိ န သုခသဟဂတော. အတ္ထိ ဥပေက္ခာသဟဂတော၊ အတ္ထိ န ဥပေက္ခာသဟဂတော. အတ္ထိ ကာမာဝစရော၊ အတ္ထိ န ကာမာဝစရော. အတ္ထိ ရူပါဝစရော၊ အတ္ထိ န ရူပါဝစရော. အတ္ထိ အရူပါဝစရော၊ အတ္ထိ န အရူပါဝစရော. အတ္ထိ ပရိယာပန္နော၊ အတ္ထိ အပရိယာပန္နော. အတ္ထိ နိယျာနိကော၊ အတ္ထိ အနိယျာနိကော. အတ္ထိ နိယတော၊ အတ္ထိ အနိယတော. အတ္ထိ သဥတ္တရော၊ အတ္ထိ အနုတ္တရော. အတ္ထိ သရဏော၊ အတ္ထိ အရဏော.

တိဝိဓေန သင်္ခါရက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန သင်္ခါရက္ခန္ဓော.

၉၅. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သရဏော၊ အတ္ထိ အရဏော.

တိဝိဓေန သင်္ခါရက္ခန္ဓော – အတ္ထိ သုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန သင်္ခါရက္ခန္ဓော.

ဒုကမူလကံ.

၉၆. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ န ဟေတု.

၉၇. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သရဏော၊ အတ္ထိ အရဏော.

၉၈. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ န ဟေတု.

တိဝိဓေန သင်္ခါရက္ခန္ဓော – အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန သင်္ခါရက္ခန္ဓော.

၉၉. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သရဏော၊ အတ္ထိ အရဏော.

တိကမူလကံ.

၁၀၀. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ န ဟေတု.

၁၀၁. ဧကဝိဓေန သင်္ခါရက္ခန္ဓော စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော အတ္ထိ သဟေတုကော၊ အတ္ထိ အဟေတုကော.

တိဝိဓေန သင်္ခါရက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၂. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော.

တိဝိဓေန သင်္ခါရက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၃. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု စေဝ သဟေတုကော စ၊ အတ္ထိ သဟေတုကော စေဝ န စ ဟေတု.

တိဝိဓေန သင်္ခါရက္ခန္ဓော – အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၄. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဟေတု စေဝ ဟေတုသမ္ပယုတ္တော စ၊ အတ္ထိ ဟေတုသမ္ပယုတ္တော စေဝ န စ ဟေတု.

တိဝိဓေန သင်္ခါရက္ခန္ဓော – အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၅. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ န ဟေတု သဟေတုကော၊ အတ္ထိ န ဟေတု အဟေတုကော.

တိဝိဓေန သင်္ခါရက္ခန္ဓော – အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၆. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ လောကိယော၊ အတ္ထိ လောကုတ္တရော.

တိဝိဓေန သင်္ခါရက္ခန္ဓော – အတ္ထိ ပီတိသဟဂတော၊ အတ္ထိ သုခသဟဂတော၊ အတ္ထိ ဥပေက္ခာသဟဂတော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၇. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော.

တိဝိဓေန သင်္ခါရက္ခန္ဓော – အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၈. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ အာသဝေါ၊ အတ္ထိ နော အာသဝေါ.

တိဝိဓေန သင်္ခါရက္ခန္ဓော – အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော။ပေ။. ဧဝံ ဒသဝိဓေန သင်္ခါရက္ခန္ဓော.

၁၀၉. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သာသဝေါ၊ အတ္ထိ အနာသဝေါ.

တိဝိဓေန သင်္ခါရက္ခန္ဓော – အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၀. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော.

တိဝိဓေန သင်္ခါရက္ခန္ဓော – အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၁. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ အာသဝေါ စေဝ သာသဝေါ စ၊ အတ္ထိ သာသဝေါ စေဝ နော စ အာသဝေါ.

တိဝိဓေန သင်္ခါရက္ခန္ဓော – အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၂. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ အာသဝေါ စေဝ အာသဝသမ္ပယုတ္တော စ၊ အတ္ထိ အာသဝသမ္ပယုတ္တော စေဝ နော စ အာသဝေါ.

တိဝိဓေန သင်္ခါရက္ခန္ဓော – အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၃. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝိပ္ပယုတ္တအနာသဝေါ.

တိဝိဓေန သင်္ခါရက္ခန္ဓော – အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၄. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနံ၊ အတ္ထိ နော သံယောဇနံ.

တိဝိဓေန သင်္ခါရက္ခန္ဓော – အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၅. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနိယော၊ အတ္ထိ အသံယောဇနိယော.

တိဝိဓေန သင်္ခါရက္ခန္ဓော – အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၆. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော.

တိဝိဓေန သင်္ခါရက္ခန္ဓော – အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၇. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနဉ္စေဝ သံယောဇနိယော စ၊ အတ္ထိ သံယောဇနိယော စေဝ နော စ သံယောဇနံ.

တိဝိဓေန သင်္ခါရက္ခန္ဓော – အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၈. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနဉ္စေဝ သံယောဇနသမ္ပယုတ္တော စ၊ အတ္ထိ သံယောဇနသမ္ပယုတ္တော စေဝ နော စ သံယောဇနံ.

တိဝိဓေန သင်္ခါရက္ခန္ဓော – အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော။ပေ။. ဧဝံ ဒသဝိဓေန သင်္ခါရက္ခန္ဓော.

၁၁၉. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော.

တိဝိဓေန သင်္ခါရက္ခန္ဓော – အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ။ပေ။. ဧဝံ ဒသဝိဓေန သင်္ခါရက္ခန္ဓော.

၁၂၀. ဧကဝိဓေန သင်္ခါရက္ခန္ဓော – စိတ္တသမ္ပယုတ္တော.

ဒုဝိဓေန သင်္ခါရက္ခန္ဓော – အတ္ထိ ဂန္ထော၊ အတ္ထိ နော ဂန္ထော.

ဥဘတောဝဍ္ဎကံ.

သတ္တဝိဓေန သင်္ခါရက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော. ဧဝံ သတ္တဝိဓေန သင်္ခါရက္ခန္ဓော.

အပရောပိ သတ္တဝိဓေန သင်္ခါရက္ခန္ဓော – အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော. ဧဝံ သတ္တဝိဓေန သင်္ခါရက္ခန္ဓော.

စတုဝီသတိဝိဓေန သင်္ခါရက္ခန္ဓော – စက္ခုသမ္ဖဿပစ္စယာ သင်္ခါရက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ သင်္ခါရက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ စက္ခုသမ္ဖဿဇာ စေတနာ။ပေ။ မနောသမ္ဖဿဇာ စေတနာ. ဧဝံ စတုဝီသတိဝိဓေန သင်္ခါရက္ခန္ဓော.

အပရောပိ စတုဝီသတိဝိဓေန သင်္ခါရက္ခန္ဓော – စက္ခုသမ္ဖဿပစ္စယာ သင်္ခါရက္ခန္ဓော အတ္ထိ သုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ စက္ခုသမ္ဖဿဇာ စေတနာ။ပေ။ မနောသမ္ဖဿဇာ စေတနာ၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ သင်္ခါရက္ခန္ဓော အတ္ထိ သုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောသမ္ဖဿဇာ စေတနာ. ဧဝံ စတုဝီသတိဝိဓေန သင်္ခါရက္ခန္ဓော.

တိံသတိဝိဓေန သင်္ခါရက္ခန္ဓော – စက္ခုသမ္ဖဿပစ္စယာ သင်္ခါရက္ခန္ဓော အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ သင်္ခါရက္ခန္ဓော အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုသမ္ဖဿဇာ စေတနာ။ပေ။ မနောသမ္ဖဿဇာ စေတနာ. ဧဝံ တိံသတိဝိဓေန သင်္ခါရက္ခန္ဓော.

ဗဟုဝိဓေန သင်္ခါရက္ခန္ဓော – စက္ခုသမ္ဖဿပစ္စယာ သင်္ခါရက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ သင်္ခါရက္ခန္ဓော အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောသမ္ဖဿဇာ စေတနာ. ဧဝံ ဗဟုဝိဓေန သင်္ခါရက္ခန္ဓော.

အပရောပိ ဗဟုဝိဓေန သင်္ခါရက္ခန္ဓော – စက္ခုသမ္ဖဿပစ္စယာ သင်္ခါရက္ခန္ဓော အတ္ထိ သုခါယ ဝေဒနာယ သမ္ပယုတ္တော၊ အတ္ထိ ဒုက္ခာယ ဝေဒနာယ သမ္ပယုတ္တော၊ အတ္ထိ အဒုက္ခမသုခါယ ဝေဒနာယ သမ္ပယုတ္တော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ သောတသမ္ဖဿပစ္စယာ။ပေ။ ဃာနသမ္ဖဿပစ္စယာ။ပေ။ ဇိဝှါသမ္ဖဿပစ္စယာ။ပေ။ ကာယသမ္ဖဿပစ္စယာ။ပေ။ မနောသမ္ဖဿပစ္စယာ သင်္ခါရက္ခန္ဓော အတ္ထိ သုခါယ ဝေဒနာယ သမ္ပယုတ္တော ။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော၊ အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော၊ စက္ခုသမ္ဖဿဇာ စေတနာ၊ သောတသမ္ဖဿဇာ စေတနာ၊ ဃာနသမ္ဖဿဇာ စေတနာ၊ ဇိဝှါသမ္ဖဿဇာ စေတနာ၊ ကာယသမ္ဖဿဇာ စေတနာ၊ မနောသမ္ဖဿဇာ စေတနာ. ဧဝံ ဗဟုဝိဓေန သင်္ခါရက္ခန္ဓော.

အယံ ဝုစ္စတိ သင်္ခါရက္ခန္ဓော.