၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၁. ပရာမာသဝိပ္ပယုတ္တံ ပရာမဋ္ဌံ ကုသလံ ဓမ္မံ ပဋိစ္စ ပရာမာသဝိပ္ပယုတ္တော ပရာမဋ္ဌော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပရာမာသဝိပ္ပယုတ္တံ အပရာမဋ္ဌံ ကုသလံ ဓမ္မံ ပဋိစ္စ ပရာမာသဝိပ္ပယုတ္တော အပရာမဋ္ဌော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၂. ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ. လောကိယလောကုတ္တရဒုကသဒိသံ. သဟဇာတဝါရောပိ။ပေ။ ပဉှာဝါရောပိ ဝိတ္ထာရေတဗ္ဗာ.)

၃၃. ပရာမာသဝိပ္ပယုတ္တံ ပရာမဋ္ဌံ အကုသလံ ဓမ္မံ ပဋိစ္စ ပရာမာသဝိပ္ပယုတ္တော ပရာမဋ္ဌော အကုသလော ဓမ္မော ဥပ္ပဇ္ဇတိ ဟေတုပစ္စယာ (သဗ္ဗတ္ထ ဧကံ).

၃၄. ပရာမာသဝိပ္ပယုတ္တံ ပရာမဋ္ဌံ အဗျာကတံ ဓမ္မံ ပဋိစ္စ ပရာမာသဝိပ္ပယုတ္တော ပရာမဋ္ဌော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

ပရာမာသဝိပ္ပယုတ္တံ အပရာမဋ္ဌံ အဗျာကတံ ဓမ္မံ ပဋိစ္စ ပရာမာသဝိပ္ပယုတ္တော အပရာမဋ္ဌော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ပရာမာသဝိပ္ပယုတ္တံ ပရာမဋ္ဌံ အဗျာကတဉ္စ ပရာမာသဝိပ္ပယုတ္တံ အပရာမဋ္ဌံ အဗျာကတဉ္စ ဓမ္မံ ပဋိစ္စ ပရာမာသဝိပ္ပယုတ္တော ပရာမဋ္ဌော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၅. ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ (သံခိတ္တံ. လောကိယဒုကသဒိသံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)

ပရာမာသဂေါစ္ဆကကုသလတ္တိကံ နိဋ္ဌိတံ.