၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၅. ပရာမာသဝိပ္ပယုတ္တံ ကုသလံ ဓမ္မံ ပဋိစ္စ ပရာမာသဝိပ္ပယုတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၁၆. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ ။ပေ။ ပဉှာဝါရေပိ သဗ္ဗတ္ထ ဧကံ.)

၁၇. ပရာမာသသမ္ပယုတ္တံ အကုသလံ ဓမ္မံ ပဋိစ္စ ပရာမာသသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပရာမာသဝိပ္ပယုတ္တံ အကုသလံ ဓမ္မံ ပဋိစ္စ ပရာမာသဝိပ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၈. ဟေတုယာ ဒွေ၊ အာရမ္မဏေ ဒွေ (သဗ္ဗတ္ထ ဒွေ)။ပေ။ အဝိဂတေ ဒွေ (သံခိတ္တံ).

နဟေတုယာ ဧကံ၊ နအဓိပတိယာ ဒွေ (သဗ္ဗတ္ထ ဒွေ)။ပေ။ နဝိပ္ပယုတ္တေ ဒွေ (သံခိတ္တံ). (သဟဇာတဝါရောပိ။ပေ။ သမ္ပယုတ္တဝါရောပိ ဝိတ္ထာရေတဗ္ဗာ.)

၁၉. ပရာမာသသမ္ပယုတ္တော အကုသလော ဓမ္မော ပရာမာသသမ္ပယုတ္တဿ အကုသလဿ ဓမ္မဿ ဟေတုပစ္စယေန ပစ္စယော. (၁)

ပရာမာသဝိပ္ပယုတ္တော အကုသလော ဓမ္မော ပရာမာသဝိပ္ပယုတ္တဿ အကုသလဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၂၀. ဟေတုယာ ဒွေ၊ အာရမ္မဏေ စတ္တာရိ၊ အဓိပတိယာ စတ္တာရိ (မဇ္ဈိမေ စ အန္တေ စ အာရမ္မဏာဓိပတိ)၊ အနန္တရေ ဒွေ။ပေ။ သဟဇာတေ ဒွေ။ပေ။ ဥပနိဿယေ စတ္တာရိ၊ အာသေဝနေ ဒွေ၊ ကမ္မေ ဒွေ၊ အာဟာရေ ဒွေ။ပေ။ မဂ္ဂေ ဒွေ။ပေ။ အဝိဂတေ ဒွေ (သံခိတ္တံ).

၂၁. ပရာမာသဝိပ္ပယုတ္တံ အဗျာကတံ ဓမ္မံ ပဋိစ္စ ပရာမာသဝိပ္ပယုတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၂၂. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)