၂. အကုသလပဒံ

ဟေတုပစ္စယော

၃၂. အာသဝဉ္စေဝ သာသဝဉ္စ အကုသလံ ဓမ္မံ ပဋိစ္စ အာသဝေါ စေဝ သာသဝေါ စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သာသဝဉ္စေဝ နော စ အာသဝံ အကုသလံ ဓမ္မံ ပဋိစ္စ သာသဝေါ စေဝ နော စ အာသဝေါ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အာသဝဉ္စေဝ သာသဝဉ္စ အကုသလဉ္စ သာသဝဉ္စေဝ နော စ အာသဝံ အကုသလဉ္စ ဓမ္မံ ပဋိစ္စ အာသဝေါ စေဝ သာသဝေါ စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၃၃. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ (သံခိတ္တံ).

ပစ္စနီယံ

နဟေတုပစ္စယော

၃၄. သာသဝဉ္စေဝ နော စ အာသဝံ အကုသလံ ဓမ္မံ ပဋိစ္စ အာသဝေါ စေဝ သာသဝေါ စ အကုသလော ဓမ္မော ဥပ္ပဇ္ဇတိ နဟေတုပစ္စယာ (သံခိတ္တံ).

၃၅. နဟေတုယာ ဧကံ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ဝိတ္ထာရေတဗ္ဗာ.)