၇. ပဉှာဝါရော

၃၆. အာသဝေါ စေဝ သာသဝေါစ အကုသလော ဓမ္မော အာသဝဿ စေဝ သာသဝဿ စ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၃၇. ဟေတုယာ သတ္တ၊ အာရမ္မဏေ နဝ၊ အဓိပတိယာ နဝ။ပေ။ ဥပနိဿယေ အာသေဝနေ နဝ၊ ကမ္မေ အာဟာရေ ဣန္ဒြိယေ ဈာနေ တီဏိ၊ မဂ္ဂေ သမ္ပယုတ္တေ နဝ။ပေ။ အဝိဂတေ နဝ (သံခိတ္တံ).

၃၈. အာသဝေါ စေဝ သာသဝေါ စ အကုသလော ဓမ္မော အာသဝဿ စေဝ သာသဝဿ စ အကုသလဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော (သံခိတ္တံ).

၃၉. နဟေတုယာ နဝ၊ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ သတ္တ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)

၄၀. သာသဝဉ္စေဝ နော စ အာသဝံ အဗျာကတံ ဓမ္မံ ပဋိစ္စ သာသဝေါ စေဝ နော စ အာသဝေါ အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၄၁. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ ။ပေ။ ပဉှာဝါရေပိ သဗ္ဗတ္ထ ဧကံ.)

အာသဝသာသဝဒုကကုသလတ္တိကံ နိဋ္ဌိတံ.