၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၅၅. ကေနစိ ဝိညေယျံ ကုသလံ ဓမ္မံ ပဋိစ္စ ကေနစိ ဝိညေယျော ကုသလော ဓမ္မော ဥပ္ပဇ္ဇတိ ဟေတုပစ္စယာ. ကေနစိ ဝိညေယျံ ကုသလံ ဓမ္မံ ပဋိစ္စ ကေနစိ နဝိညေယျော ကုသလော ဓမ္မော ဥပ္ပဇ္ဇတိ ဟေတုပစ္စယာ. ကေနစိ ဝိညေယျံ ကုသလံ ဓမ္မံ ပဋိစ္စ ကေနစိ ဝိညေယျော ကုသလော စ ကေနစိ နဝိညေယျော ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃) (သံခိတ္တံ.)

၅၆. ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ (သံခိတ္တံ).

ပစ္စနီယံ

နအဓိပတိပစ္စယော

၅၇. ကေနစိ ဝိညေယျံ ကုသလံ ဓမ္မံ ပဋိစ္စ ကေနစိ ဝိညေယျော ကုသလော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၅၈. နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ နဝ၊ နဝိပါကေ နဝ။ပေ။ နဝိပ္ပယုတ္တေ နဝ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)

ပစ္စယစတုက္ကံ

ဟေတုပစ္စယော

၅၉. ကေနစိ ဝိညေယျော ကုသလော ဓမ္မော ကေနစိ ဝိညေယျဿ ကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၆၀. ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ။ပေ။ ကမ္မေ နဝ။ပေ။ အဝိဂတေ နဝ (သံခိတ္တံ).

နဟေတုယာ နဝ၊ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ နဝ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ. ကေနစိ ဝိညေယျံ အကုသလမ္ပိ ကေနစိ ဝိညေယျံ အဗျာကတမ္ပိ ကေနစိ ဝိညေယျကုသလသဒိသံ ဝိတ္ထာရေတဗ္ဗံ).

ကေနစိဝိညေယျဒုကကုသလတ္တိကံ နိဋ္ဌိတံ.

စူဠန္တရဒုကံ နိဋ္ဌိတံ.