၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၅၀. လောကိယံ အဗျာကတံ ဓမ္မံ ပဋိစ္စ လောကိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)
လောကုတ္တရံ အဗျာကတံ ဓမ္မံ ပဋိစ္စ လောကုတ္တရော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
လောကိယံ အဗျာကတဉ္စ လောကုတ္တရံ အဗျာကတဉ္စ ဓမ္မံ ပဋိစ္စ လောကိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၅၁. ဟေတုယာ ပဉ္စ၊ အာရမ္မဏေ ဒွေ။ပေ။ အာသေဝနေ ဧကံ၊ ကမ္မေ ပဉ္စ၊ ဝိပါကေ ပဉ္စ။ပေ။ အဝိဂတေ ပဉ္စ (သံခိတ္တံ၊ အနုလောမံ).
၅၂. နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ ဒွေ။ပေ။ နပုရေဇာတေ စတ္တာရိ၊ နပစ္ဆာဇာတေ ပဉ္စ။ပေ။ နကမ္မေ ဧကံ၊ နဝိပါကေ ဧကံ၊ နအာဟာရေ ဧကံ။ပေ။ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ ဒွေ၊ နောနတ္ထိယာ တီဏိ၊ နောဝိဂတေ တီဏိ (သံခိတ္တံ၊ ပစ္စနီယံ).
(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)
ပစ္စယစတုက္ကံ
ဟေတုပစ္စယော
၅၃. လောကိယော အဗျာကတော ဓမ္မော လောကိယဿ အဗျာကတဿ ဓမ္မဿ ဟေတုပစ္စယေန ပစ္စယော. (၁)
လောကုတ္တရော အဗျာကတော ဓမ္မော လောကုတ္တရဿ အဗျာကတဿ ဓမ္မဿ ဟေတုပစ္စယေန ပစ္စယော။ တီဏိ (သံခိတ္တံ).
၅၄. ဟေတုယာ စတ္တာရိ၊ အာရမ္မဏေ တီဏိ၊ အဓိပတိယာ စတ္တာရိ၊ အနန္တရေ စတ္တာရိ၊ သဟဇာတေ ပဉ္စ၊ အညမညေ ဒွေ၊ နိဿယေ သတ္တ၊ ဥပနိဿယေ စတ္တာရိ၊ ပုရေဇာတေ ဒွေ၊ ပစ္ဆာဇာတေ ဒွေ၊ အာသေဝနေ ဧကံ၊ ကမ္မေ စတ္တာရိ၊ ဝိပါကေ စတ္တာရိ၊ အာဟာရေ စတ္တာရိ။ပေ။ မဂ္ဂေ စတ္တာရိ၊ သမ္ပယုတ္တေ ဒွေ၊ ဝိပ္ပယုတ္တေ တီဏိ၊ အတ္ထိယာ သတ္တ။ပေ။ အဝိဂတေ သတ္တ (သံခိတ္တံ).
(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)
လောကိယဒုကကုသလတ္တိကံ နိဋ္ဌိတံ.