၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၄၃. လောကိယံ ကုသလံ ဓမ္မံ ပဋိစ္စ လောကိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

လောကုတ္တရံ ကုသလံ ဓမ္မံ ပဋိစ္စ လောကုတ္တရော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

လောကိယံ ကုသလံ ဓမ္မံ ပဋိစ္စ လောကိယော ကုသလော ဓမ္မော ဥပ္ပဇ္ဇတိ အာရမ္မဏပစ္စယာ. (၁)

လောကုတ္တရံ ကုသလံ ဓမ္မံ ပဋိစ္စ လောကုတ္တရော ကုသလော ဓမ္မော ဥပ္ပဇ္ဇတိ အာရမ္မဏပစ္စယာ. (၁) (သံခိတ္တံ.)

၄၄. ဟေတုယာ ဒွေ၊ အာရမ္မဏေ ဒွေ၊ အဓိပတိယာ ဒွေ။ပေ။ ကမ္မေ ဒွေ။ပေ။ အဝိဂတေ ဒွေ (သံခိတ္တံ၊ အနုလောမံ).

၄၅. နအဓိပတိယာ ဒွေ။ပေ။ နအာသေဝနေ ဧကံ။ပေ။ နဝိပ္ပယုတ္တေ ဒွေ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)

ပစ္စယစတုက္ကံ

ဟေတုပစ္စယာဒိ

၄၆. လောကိယော ကုသလော ဓမ္မော လောကိယဿ ကုသလဿ ဓမ္မဿ ဟေတုပစ္စယေန ပစ္စယော. (၁)

လောကုတ္တရော ကုသလော ဓမ္မော လောကုတ္တရဿ ကုသလဿ ဓမ္မဿ ဟေတုပစ္စယေန ပစ္စယော. (၁)

လောကိယော ကုသလော ဓမ္မော လောကိယဿ ကုသလဿ ဓမ္မဿ အာရမ္မဏပစ္စယေန ပစ္စယော. (၁)

လောကုတ္တရော ကုသလော ဓမ္မော လောကိယဿ ကုသလဿ ဓမ္မဿ အာရမ္မဏပစ္စယေန ပစ္စယော. (၁)

လောကိယော ကုသလော ဓမ္မော လောကိယဿ ကုသလဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. (၁)

လောကုတ္တရော ကုသလော ဓမ္မော လောကုတ္တရဿ ကုသလဿ ဓမ္မဿ အဓိပတိပစ္စယေန ပစ္စယော – သဟဇာတာဓိပတိ. လောကုတ္တရော ကုသလော ဓမ္မော လောကိယဿ ကုသလဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ. (၂) (သံခိတ္တံ.)

၄၇. ဟေတုယာ ဒွေ၊ အာရမ္မဏေ ဒွေ၊ အဓိပတိယာ တီဏိ၊ အနန္တရေ ဒွေ၊ သမနန္တရေ ဒွေ၊ သဟဇာတေ ဒွေ။ပေ။ ဥပနိဿယေ စတ္တာရိ၊ အာသေဝနေ ဒွေ၊ ကမ္မေ ဒွေ၊ အာဟာရေ ဒွေ။ပေ။ အဝိဂတေ ဒွေ (သံခိတ္တံ.)